ក្មួយប្រុសលោកថាក់ស៊ីន ស្ថិត​ក្នុង​បញ្ជី​បេក្ខជននាយករដ្ឋមន្ត្រីភឿថៃ

គណបក្សភឿថៃ នឹងប្រកាសបេក្ខជននាយករដ្ឋមន្ត្រីរបស់ខ្លួននៅថ្ងៃអង្គារ​ទី​១៦​ខែ​ធ្នូ​ឆ្នាំ​២០២៥ ដោយក្នុងបញ្ជីនោះ នឹងមានបញ្ចូលឈ្មោះ លោក Yodchanan Wongsawat ដែលជាក្មួយប្រុសរបស់អតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រ។

យោង​តាម​ការ​ចុះ​ផ្សាយ​របស់​បាងកក​ប៉ុស្តិ៍ លោក Yodchanan ដែលមានវ័យ៤៦ឆ្នាំ គឺជាកូនប្រុសច្បងរបស់អតីតនាយករដ្ឋមន្ត្រី លោក Somchai Wongsawat និងអ្នកស្រី Yaowapha Wongsawat ដែលជាបងស្រីរបស់លោកថាក់ស៊ីន។ ក្នុងអំឡុងពេលរដ្ឋបាលរបស់លោកស្រី ផែថងថាន ស៊ីណាវ៉ាត្រ លោក Yodchanan បានបម្រើការជាសមាជិកអ្នកជំនាញនៃក្រុមប្រឹក្សាភិបាលនៃទីភ្នាក់ងារអភិវឌ្ឍន៍រដ្ឋាភិបាលឌីជីថល ដោយផ្តោតលើការគ្រប់គ្រង និងធនធានមនុស្ស។ លោកក៏បានចូលរួមក្នុងកម្មវិធីអ្នកជំនាញវ័យក្មេងភឿថៃក្នុងនាមជាវាគ្មិនផងដែរ។

បច្ចុប្បន្ន លោក Yodchanan កំពុងបម្រើការជាអនុប្រធានផ្នែកស្រាវជ្រាវ និងទំនាក់ទំនងអន្តរជាតិ និងជានាយកមន្ទីរពិសោធន៍ BCI (Brain–Computer Interface) នៃមហាវិទ្យាល័យវិស្វកម្មរបស់សាកលវិទ្យាល័យ Mahidol។

ក្នុងបញ្ជីបេក្ខជន ក៏មានលោក Suriya Jungrungreangkit វ័យ៧១ឆ្នាំ ដែលជាប្រធាននាយកការបោះឆ្នោតរបស់គណបក្សភឿថៃ និងជាអ្នកនយោបាយជើងចាស់ដែលធ្លាប់កាន់តំណែងរដ្ឋមន្ត្រីជាច្រើន រួមទាំងតំណែងជាឧបនាយករដ្ឋមន្ត្រីផងដែរ។ លោកត្រូវបានចាត់ទុកនៅក្នុងបក្សថាជាអ្នកសម្រុះសម្រួលអំណាចដែលមានបទពិសោធន៍។

បេក្ខជនទីបីគឺ លោក Julapun Amornvivat វ័យ៥០ឆ្នាំ ដែលជាប្រធានគណបក្ស និងជាឥស្សរជនឆ្នើមមកពីខេត្តឈៀងម៉ៃ។ លោក Julapun ដែលបានចាប់ផ្តើមអាជីពនយោបាយរបស់លោកក្នុងសម័យកាលថៃរ៉ាក់ថៃ ត្រូវបានគេស្គាល់ដោយសារការផ្តោតលើគោលនយោបាយសេដ្ឋកិច្ច និងបានតស៊ូមតិក្នុងការផ្គូរផ្គងសមាជិកបក្សវ័យក្មេងជាមួយអ្នកនយោបាយជើងចាស់។

ការប្រកាសនេះធ្វើឡើង ខណៈគណបក្សភឿថៃ កំពុងរៀបចំខ្លួនសម្រាប់ដំណាក់កាលបន្ទាប់នៃដំណើរអន្តរកាលនយោបាយរបស់ប្រទេសថៃ បន្ទាប់ពីរដ្ឋសភាត្រូវបានរំលាយ​កាល​ថ្ងៃសុក្រ​ទី​១២​ខែធ្នូ​ឆ្នាំ​២០២៥​ ដែលជាការរំលាយលើកទី១៦ ចាប់តាំងពីការបញ្ចប់របបរាជាធិបតេយ្យផ្តាច់ការក្នុងឆ្នាំ​១៩៣២​មក៕

ប្រែសម្រួល​៖ ឈាង