ពេជ្រ សូលីកា ក្តុកក្តួលរំភើបចិត្តក្រោយឃើញមិត្តអង្គុយផ្ទឹមនឹងគូគាប់ជីវិត ដ្បិតឆ្លងព្យុះភ្លៀងរាប់មិនអស់

ក្នុងឱកាសថ្ងៃចូលរោងជ័យនៃអាពាហ៍ពិពាហ៍របស់គូស្នេហ៍តារាចម្រៀងរ៉េប លោក G-Devith និងអ្នកនាង ទេព បូព្រឹក្ស អ្នកនាង ពេជ្រ សូលីកា រាជិនីមនោសញ្ចេតនា ពេជ្រ សូលីកា ត្រូវជាមិត្តសម្លាញ់របស់អ្នកនាង ទេព បូព្រឹក្ស បានចេញសារជូនពរមិត្តល្អរបស់ខ្លួនប៉ុន្មានឃ្លា ភ្ជាប់នឹងរូបថតបង្ហាញនូវទឹកមុខក្តុកក្តួលរំភើបអរជាមួយក្តីសុខរបស់មិត្ត ដែលទទួលបានបុរសដ៏ល្អម្នាក់ជាស្វាមី។

ពេជ្រ សូលីកា បានរៀបរាប់នៅលើសារលើទំព័រហ្វេសប៊ុកផ្ទាល់ខ្លួនដូច្នេះ “អបអរសាទរមិត្តសម្លាញ់ និងមិត្តថ្លៃ ឆ្លងព្យុះភ្លៀងច្រើនហើយ ពីពេលនេះទៅ នឹងកាន់តែមានសេចក្ដីសុខផ្លូវចិត្តជាមួយគ្រួសារតូចដ៏កក់ក្ដៅមួយនេះនឹងមានសុភមង្គលជានិរន្តរ៍”។

តាមរយៈសារជូនពរ និងរូបភាពជាច្រើនសន្លឹក មហាជនដែលជាអ្នកគាំទ្រអ្នកទាំងពីរ បានចូលរូមអបអរនិងជូនពរផងដែរ។ ភ្ជាប់នឹងសារជូនពរសាម៉ីដើមការ អ្នកគាំទ្ររបស់អ្នកនាង ពេជ្រ សូលីកា ក៏មិនភ្លេចនូវរឿងរ៉ាវកម្សត់នៃជីវិតរបស់រាជិនីមនោសញ្ចេតនានេះនោះឡើយ ដោយបានជូនពរតារាចម្រៀងរូបនេះបានជួបនឹងគូគាប់ជីវិត មានសំណាងនឹងជីវិតគូដូចជាមិត្តសម្លាញ់ដែរ។

គួររំលឹកថា តារាចម្រៀងទាំងពីរដួង គឺជាមិត្តភក្តិស្និទ្ធស្នាលនឹងគ្នាក្នុងអាជីពសិល្បៈ ខណៈកន្លងមកក៏ធ្លាប់បានទម្លាយពីការងក់ងរមិននិយាយស្តីរកគ្នាជាយូរ រហូតចូលមកបន្តមិត្តភាពនេះឡើងវិញ។ ក្រោយត្រូវរូវគ្នាវិញ អ្នកនាងហាក់កាន់តែស្និតខ្លាំងជាងមុន ធ្វើឱ្យអ្នកគាំទ្រ ស្ញប់ស្ញែងនឹងមិត្តភាពនេះផងដែរ៕