អុឹម ជីវ៉ា រម្លឹកទង្វើនៃកម្មវិធី MGI ដោយជឿថា ក្រសួងវប្បធម៌ថៃ នៅពីក្រោយការប្រតិកម្មឈុតតំណាងកម្ពុជាកន្លងមក

ថ្មីៗនេះ តារាសម្តែងលោក អុឹម ជីវ៉ា បានចេញមកទម្លាយរឿងរ៉ាវក្នុងចិត្តទាក់ទងនឹងកម្មវិធីប្រកួតសម្រស់ Miss Grand ដែលតែងតែមិនឱ្យកម្ពុជាបញ្ចេញឈុតតំណាងជាតិប្លែកៗ ឬស្អាតឡើងឆាកប្រកួតឡើយ។ រឿងរ៉ាវ លោកយល់ថា នោះហាក់ជាកលរបស់ក្រុមជ្រុលនិយមថៃ ដែលទំនងជាមានក្រសួងវប្បធម៌នៅពីក្រោយ ដោយឃុបឃិតជាមួយអ្នករៀបចំកម្មវិធីនៅក្នុងប្រទេសរបស់ខ្លួន។

ការលើកឡើងនេះ ធ្វើឡើងក្រោយលោកចេញមុខស្នើដល់ក្រសួងវប្បធម៌ និងក្រសួងពាក់ព័ន្ធ ឱ្យជួយពិនិត្យនិងហាមឃាត់ ធ្វើយ៉ាងណាកុំបើកដៃឱ្យកម្មវិធីរបស់ថៃមួយនេះ មានវត្តមាននៅកម្ពុជាជាបន្តទៀត ដោយយោងលើហេតុផលថា ម្ចាស់ស្ថាប័នមួយនេះ បានប្រមាថដល់ធ្ងន់ធ្ងរដល់ថ្នាក់ដឹកនាំរបស់កម្ពុជា។

ដោយក្តីមិនពេញកប់ទុកក្នុងចិត្តជាយូរមកហើយ លោកសន្មត់ថា អ្វីដែលបវរកញ្ញាកម្ពុជាទទួលរងកន្លងមួយជាមួយនឹងកម្មវិធីគ្មានវិជ្ជាជីវៈនេះ ទំនងជាការចូលដៃចូលជើងគ្នាជាក្រុម ពោលទាំងក្រសួងវប្បធម៌ និងក្រុមបវរកញ្ញា Miss Grand របស់ថៃតែម្តង ដោយតែងបង្កហេតុផ្សេងៗ ពិសេសហាមដាច់ខាតចំពោះកម្ពុជា ក្នុងការប្រើឈុតតំណាងជាតិដែលប្លែកប្រណិតចូលរួម។

ជាមួយគ្នានោះ ក៏មានការបញ្ចេញទស្សន:ពីសំណាក់អ្នកប្រើប្រាស់បណ្តាញសង្គមហ្វេសប៊ុកដែរថា នៅប្រទេសបារាំងគេថា សៀមច្រណែនជាមួយកម្ពុជា។ មូលហេតុ ដោយសារថាកម្ពុជា-បារាំង មានជើងហោះហើរត្រង់ពីប្រទេសបារាំងមកកម្ពុជា ជាហេតុដែលធ្វើឱ្យអ្នកជិតខាងចិញ្ចឹមចិត្តឈ្លានពានមួយនេះ បាត់ប្រយោជន៍របស់ខ្លួន ខណៈអន្តរជាតិសុទ្ធតែបានជ្រាបហើយថា ថៃពុំចង់ឱ្យកម្ពុជារីកចម្រើននោះឡើយ។

ដោយហេតុនេះ សាធារណមួយចំនួន បង្ហាញការសំណូមដូច្នេះថា ខ្មែរមិនបាច់ទៅប្រឡងបវរកញ្ញានៅថៃនោះទេ ព្រោះជាតិសាសន៍នេះ មិនដែលឱ្យតម្លៃខ្មែរឡេីយ។ ម៉្យាងវិញទៀត ខ្មែរក៏មានកម្មវិធីបវរកញ្ញា ដោយមានការចូលរួមពីអន្តរជាតិ ដែលជាការបើកឱកាសឱ្យខ្មែរបានបង្ហាញតម្លៃវប្បធម៌ប្រទេសជាតិទៅកាន់ពិភពលោកផងដែរ៕ ចាន់រ៉ា