លោក អ៉ឹម ជីវ៉ា ហួសចិត្តខ្លាំងក្រោយផ្សាយរឿងនាយ ភូ តែត្រូវក្រុមគ្រួសារប្រតិកម្ម

តារាសម្តែងនិងជាពិធីករលេចធ្លោលើវិថីសិល្ប:លោក អ៉ឹម ជីវ៉ា បានបង្ហាញអារម្មណ៍ហួសចិត្តជាខ្លាំង បន្ទាប់ពីធ្វើបទសម្ភាសនិងផ្សព្វផ្សាយរឿងតារាប្រុយនាយ ភូ ហើយបែរជាក្រុមគ្រួសារតារាប្រុសរូបនេះប្រតិកម្ម។

បើតាមការលើកឡើងរបស់លោក អ៉ឹម ជីវ៉ា បានបញ្ជាក់ថា រឿងហួសចិត្តពេលខ្ញុំជួយនាយភូ ពេលខ្ញុំបង្ហោះរូបនាយភូដំបូងចង់ជួយ និងអាណិតគាត់តែត្រូវក្មួយនិងបងប្អូនបង្កើត និងគ្រួសារនាយ ភូ ប្រតិកម្មដៀល ជេខ្ញុំថាយកនាយភូ មកធ្វើទាក់ទាញចំណាប់អារម្មណ៍ចង់ល្បី។ មិនតែប៉ុណ្ណោះ គឺឱ្យលោកជួយលុបចោលរូបភាពជាបន្ទាន់ ហាក់បីដូចចង់បញ្ជាក់ ឬខ្លាចរឿងអ្វីម្យ៉ាងពេលនោះ។

លោកថា លោកមិនព្រមលុបតាមកាសំណូមពរឡើយ ព្រោះគិតថាបើលោកលុបស្មើនិងផ្សាយពត៌មានមិនពិត ដូចនេះលោកមិនព្រមលុបឡើយ។ លោកថាខ្ញុំដឹងព័ត៌មាននាយ ភូ គឺតាមរយៈមេធាវីខ្ញុំម្នាក់ដែលគាត់ ២នាក់ប្តីប្រពន្ធឃើញនាយ ភូ កំពុងរត់តុហើយមេធាវីខ្ញុំគាត់អាណិតក៏ជួយសុំម្ចាស់ហាងឱ្យប្រាប់នាយ ភូ ដើម្បីធ្វើការសម្ភាសនិងបង្ហោះ។

លោក អ៉ឹម ជីវ៉ា និយាយទៀតថា ម្ចាស់ហាងនិងនាយភូ ក៏យល់ព្រម “ក្រោយការបង្ហោះមិនដល់ ១ម៉ោងផង ក៏មានការឆាត និងមកសុំលេខដោយអះអាងថា ជាក្មួយ និងជាបងប្អូន ហើយសុំឱ្យជួយលុបជាបន្ទាន់ តែខ្ញុំឆ្លើយទៅវិញថា អត់លុបទេព្រោះមិនមែនជាអនិតិជនដែលត្រូវសុំច្បាប់ ឬការអនុញ្ញាតិពីអាណាព្យាបាល ព្រោះនាយ ភូ ធំហើយតែសាម៉ីខ្លួនអនុញ្ញាតគឺគ្រប់គ្រាន់ហើយ ។

តារាសម្តែងលោក អ៉ឹម ជីវ៉ា បន្តថា “អ្វីដែលជាលទ្ធផល ក្រោយពីការបង្ហោះនាយ ភូ មកក៏មានបងបប្អូនព័ត៌មាននិងសិល្បករ អ្នកលក់អនឡាញមកសុំទីតាំងជាបន្តបន្ទាប់ ហើយនាយភូក៏រកប្រាក់ចំណូលបានបន្ថែម ក្រៅពីរបរថ្មីជាអ្នករត់តុពេលនាយ ភូ កំពុងរកចំណូលបានខ្លះៗជាងមុនដូចមិនទាន់ឃើញក្មួយ ឬគ្រួសារមកប្រតិកម្មផុសដៀលដៀមដាមទៀតសោះ”។ 

លោកបន្ថែមថា “ពេលខ្លះត្រូវចាំថាយើងជួយគេអស់លុយខ្លួនឯងដោយអាណិត សិល្បៈចង់ឱ្យគាត់ងើបឡើងវិញ មានលុយចាយ តែត្រូវបានមនុស្សខ្លះ មកមើលងាយទឹកចិត្តយើងទៅវិញ មកដល់ពេលនេះខ្ញុំសប្បាយចិត្តទោះបីខ្ញុំមិនមែនបងប្អូននាយ ភូ នៅក្រោយពេលបង្ហោះនាយ ភូ ហើយគឺមានក្រុមហ៊ុនផលិតផល និងសប្បុរសជនជួយនាយភូច្រើន នោះហើយអ្វីដែលដែលខ្ញុំចង់ឃើញ ចំណែកឯបុណ្យព្រេងវាសនារបស់នាយ ភូ ទៅថ្ងៃខាងមុខយ៉ាងណា វាស្ថិតលើខ្លួននាយ ភូ ផ្ទាល់បើមានគេជួយត្រូវចេះជួយខ្លួនឯងដែរ៕ អត្ថបទ៖ ចាន់រ៉ា