រឿងជម្លោះ ៣០មុឺនដុល្លារ! អុឹម ជីវ៉ា លើកទឹកចិត្តឱ្យដោះស្រាយបញ្ចប់ និងបញ្ឈប់ការហែកហួរគ្នាលើបណ្តាញសង្គម

ជម្លោះបងប្អូនដែលជាម្ចាស់ផលិតផលសម្រស់ ២រូប គឺ​អាជី និងអ្នកស្រី តេង ដាណា រហូតធ្វើឱ្យផ្ទុះការវែកញែកពេញបណ្តាញសង្គម កាលពីយប់មិញនេះ លោក អុឹម ជីវ៉ា ក្នុងនាមជាអ្នកបានស្គាល់បុគ្គលទាំងពីររូបនេះ លើកទឹកចិត្តឱ្យភាគីទាំងពីរទម្លាក់កំហឹងរៀងខ្លួន និងបញ្ឈប់ការហែកហួរគ្នាលើបណ្តាញទំនាក់ទំនងសង្គម។

ដោយមើលឃើញមានការវែកញែកពីអ្នកគាំទ្រម្ខាងៗ និងការចេញវីដេអូយកត្រូវរៀងខ្លួនជាបន្តបន្ទាប់ រហូតសើររើរឿងកាន់តែវែងឆ្ងាយទៅៗ លោក អុឹម ជីរ៉ា បានចេញមុខទទូចសុំឱ្យភាគីជម្លោះទាំងពីរ បញ្ឈប់ការហែកហួរគ្នា និងដាស់តឿនថា យ៉ាងណាក៏ជាបងប្អូននឹងគ្នា កុំឱ្យមានការសោកស្តាយនៅថ្ងៃខាងមុខ។

លោកថា “ការពិតបងចេញមកនិយាយនេះ ព្រោះបងធ្លាប់ស្គាល់ប្អូនទាំងពីរមិនតិចជាង៧ឆ្នាំឡើយ។ ប្អូនទាំងពីរគឺជាបងប្អូនបង្កើត បងមិនចង់ឱ្យប្អូនបន្តការហែកហួរលើបណ្តាញសង្គមនេះច្រើនទៀតទេ ព្រោះសំពត់កំពុងរហែកប្អូនទាំង២ គឺជាមនុស្សស្រីទាំងពីរ ពេលឃើញសំពត់រហែកយើងត្រូវតែដេរឱ្យជិតវិញ”។

លោក អុឹម ជីវ៉ា និយាយទៀតថា “គ្រួសារណាក៏មានបញ្ហា តែមិនត្រូវយកបញ្ហាមកហែកហួរគ្នាបែបនេះឡើយ បើហែកកាន់តែខ្លាំងឈាមកាន់តែចេញសំពត់កានតែរហែក ប្អូនត្រូវចាំថាឈាមខាប់ជាងទឹក ថ្ងៃនេះប្អូនមិនត្រូវគ្នាតែថ្ងៃក្រោយឬប្អូនវ័យច្រើនជាងនេះ ប្អូននឹងយល់ថា អ្វីជាបងប្អូន អ្វីដែលជាអ្នកដទៃ អ្វីដែលចាំសើចយំ ឬជំរុញឱ្យយើងមានបញ្ហាកាន់តែធំ ហើយថ្ងៃណាមួយពួកប្អូនធ្លាក់ គេកាន់តែជាន់ពួកប្អូន”។

លោកបន្ថែមថា “បងចង់សុំសំណូមប្អូនបើឈ្លោះគ្នាកុំយករឿងផ្ទៃក្នុងគ្រួសារហែកហួរឱ្យគេដឹង បើប្អូននៅតែហែកហួប្អូនទាំងពីរ នឹងមានវិប្បដិសារីថ្ងៃក្រោយ! ប្អូនទាំងពីរថយម្នាក់១ជំហ៊ានហើយអ្វីដែ លប្អូនអភ័យឱ្យគ្នាបានក្នុងនាមជាបងប្អូនអភ័យទៅ តែបើអភ័យមិនបានឱ្យគ្នាត្រូវដោះស្រាយដោយសន្តិវិធីកាន់តែល្អ គឺដោះស្រាយបញ្ចប់ជម្លោះក្រៅប្រព័ន្ធតុលាការ។ ត្រូវរស់នៅស្ងប់ស្ងាត់ៗរឿងៗខ្លួន ហើយដល់ពេលប្អូនទាំងពីរមានវ័យច្រើនជាងនេះ ប្អូននឹងយល់ពាក្យថាបងប្អូនបង្កើតឈាមខាប់ជាងទឹក”។

គួរឱ្យដឹងដែរថា រឿងរ៉ាវជម្លោះនេះ គឺផ្តើមចេញពីភាគីម្ខាងចោទភាគីម្ខាង មិនជួយបង់ប្រាក់ពន្ធដាអាជីវកម្មដែលធ្លាប់រួមភាគហ៊ុននឹងគ្នា ខណៈកំពុងរងការពិន័យដល់ទៅប្រមាណ ៣០មុឺនដុល្លារ។ ប៉ុន្តែភាគីម្ខាងទៀតអះអាងថា ខ្លួនបានផ្តិតមេដៃបញ្ចប់ការរកសុីរួមគ្នានោះ តាំងពីឆ្នាំ២០២១មកម្ល៉េះ ហើយប្រាក់ជាប់ពន្ធទាំងនោះ មិនមានជាប់ពាក់ព័ន្ធនឹងខ្លួនឡើយ។

ការបកស្រាយនូវរឿងរ៉ាវនេះ ក៏បានឈានដល់ការហែកហួរគ្នានូវរឿងផ្សេងទៀតដែលធ្លាប់ពាក់ព័ន្ធនឹងគ្នា ខណៈភាគទាំងពីរ ហាក់មិនព្រមទទួលស្គាល់ការចោទប្រកាន់ពីម្ខាងណាឡើយ រហូតមកទល់ថ្ងៃនេះ អ្នកស្រី តេង ដាណា ត្រូវជាប្អូន បានចេញសារមួយឱ្យភាគីខាងបងស្រី បញ្ឈប់សកម្មភាពហែកហួរគ្នាបំពុលសង្គម ដោយដាស់តឿនភាគីម្ខាងទៀត ឱ្យឈប់បំពុលសង្គមតាមរយៈបញ្ហានេះ។ អ្នកស្រីសង្កត់ធ្ងន់ថា រឿងគ្រួសារដោះស្រាយតាមគ្រួសារ រឿងច្បាប់ដោះស្រាយតាមច្បាប់ ហើយបើខ្លាំង ត្រូវតទល់គ្នាមុខច្បាប់ កុំយកហ្វេសប៊ុកជាលេសទៀត ព្រោះប្រទេសកំពុងមានបញ្ហា។