អ្នកគាំទ្របារម្ភ ក្រោយឃើញនាយ តាក់ស៊ី ត្រូវវះកាត់ម្រាមដៃ ម្រាមជើង

មហាជនអ្នកគាំទ្រជាច្រើន បានសម្ដែងការភ្ញាក់ផ្អើល និងស្លុតចិត្តយ៉ាងខ្លាំង បន្ទាប់ពីបានឃើញសភាពជំងឺរបស់តារាកំប្លែង នាយ តាក់ស៊ី ដែលកំពុងសម្រាកព្យាបាលនៅមន្ទីរពេទ្យ ហើយត្រូវវះកាត់ម្រាមដៃ និងម្រាមជើង ដោយសារអាការធ្ងន់ធ្ងរ និងឈឺចាប់ខ្លាំង។

តាមរយៈរូបភាព និងវីដេអូដែលបានបង្ហោះលើបណ្តាញសង្គម បានបង្ហាញឱ្យឃើញសភាពសុខភាពរបស់នាយ តាក់ស៊ី ដែលធ្វើឱ្យអ្នកគាំទ្រមានអារម្មណ៍អាណិត និងព្រួយបារម្ភយ៉ាងខ្លាំង ព្រោះតារាកំប្លែងរូបនេះបានរងគ្រោះពីជំងឺប្រចាំកាយ និងផលវិបាកក្រោយការវះកាត់។

ស្ថិតនៅក្នុងវ័យប្រមាណ ៤៥ ឆ្នាំ នាយ តាក់ស៊ី ត្រូវបានរាយការណ៍ថា កំពុងប្រឈមមុខនឹងជំងឺទឹកនោមផ្អែមធ្ងន់ធ្ងរ ដែលបណ្ដាលឱ្យខូចក្រលៀន និងមានជំងឺទឹកដក់ក្នុងសួតផងដែរ។ តាមការបញ្ជាក់របស់វេជ្ជបណ្ឌិត លោកមានជម្រើសព្យាបាលពីរ គឺទីមួយ ត្រូវលាងឈាមជាប្រចាំមួយសប្ដាហ៍ ៣ ដងពេញមួយជីវិត និងទីពីរ គឺធ្វើការវះកាត់ប្ដូរក្រលៀនថ្មី ដែលត្រូវការចំណាយថវិកាប្រហែល ៥ ម៉ឺនដុល្លារ។

យ៉ាងណាមិញ ក្រោយទទួលបានការឧបត្ថម្ភពីសប្បុរសជនទាំងក្នុង និងក្រៅប្រទេស ជាពិសេសការយកចិត្តទុកដាក់ពី ហ៊ុន ម៉ាណែត ដែលបានជួយគាំទ្រចំណាយថ្លៃព្យាបាលទាំងស្រុង នាយ តាក់ស៊ី ត្រូវបានបញ្ជូនទៅព្យាបាលនៅប្រទេសឥណ្ឌា។

បច្ចុប្បន្ន តារាកំប្លែងរូបនេះ បានទទួលការវះកាត់ប្ដូរក្រលៀនដោយជោគជ័យ ហើយកំពុងស្ថិតក្នុងដំណាក់កាលស្តារសុខភាពឡើងវិញ។ ទោះបីជាកំពុងប្រឈមនឹងការឈឺចាប់ និងការព្យាបាលយូរអង្វែងក៏ដោយ ក៏មានសង្ឃឹមថា នាយ តាក់ស៊ី នឹងអាចវិលត្រឡប់មកបន្តអាជីពសិល្បៈ និងនាំមកនូវសំណើចជូនអ្នកគាំទ្រវិញនៅពេលខាងមុខ៕ ដោយ៖ ចាន់រ៉ា