សំណើរតារាពហុជំនាញ ខាត់ សុឃីម សុំឱ្យលោក ហ្វៃ សំអាង ផលិតរឿងដែលកម្ពុជារងការឈ្លានពាន ត្រូវបានយកទៅពិភាក្សាឆ្លងយោបល់

ថ្មីៗនេះ តារាស្រីពហុជំនាញអ្នកនាង ខាត់ សុឃីម បានចេញមុខស្នើដល់ផលិតករភាពយន្តជើងចាស់ល្បីឈ្មោះលោក ហ្វៃ សំអាង ដោយសុំឱ្យផលិតសាច់រឿងនៃការឈឺចាប់របស់ប្រជាជាតិខ្មែរ ពាក់ព័ន្ធនឹងការឈ្លានពានរបស់សៀម មកលើបូរណភាពទឹកដីកម្ពុជា ដោយស្នើរដូច្នេះថា “បងប្រុសហ្វៃសំអាងផលិតសាច់រឿង (២៤.០៧ .២០២៥) ជាតិខ្មែរឈឺចាប់ជាមួយចោរសៀមមួយរឿងមកបង”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មិនមែនជាលើកដំបូងឡើយ សម្រាប់សកម្មភាពឈ្លានពានរបស់ទ័ពសៀមមកលើអធិបតេយ្យភាពខ្មែរ ប៉ុន្តែក្នុងឆ្នាំ២០២៥នេះ កងទ័ពសៀមដែលក្តោបក្តាប់ដោយមហាក្សត្រនៃប្រទេសមួយនេះ បានបង្កើនសកម្មភាពឈ្លានពានកម្ពុជាកាន់តែខ្លាំង និងឃោរឃៅបំផុតមកលើកម្ពុជា។

ជាក់ស្តែង ក្នុងសង្គ្រាមឈ្លានពានរបស់ទ័ពថៃមកលើកម្ពុជា ចាប់ពីថ្ងៃទី២៤ ខែកក្កដា រហូតដល់មានបទឈប់បាញ់ចូលជាធរមាន នៅថ្ងៃទី២៩ កក្កដា ឆ្នាំ២០២៥ កងទ័ពថៃ បានប្រើសព្វាវុធទំនើបៗរបស់ខ្លួនជាច្រើនប្រភេទ ដែលរួមមានយន្តហោះចម្បាំង F-16 ក៏ដូចជាប្រើផ្សែងពុល ដែលសុទ្ធសឹងជាអាវុធប្រឆាំងនឹងមនុស្សជាតិ មកលើកងទ័ព និងរាស្ត្រកម្ពុជា ជាកំរោលជាទីបំផុត។

មិនតែប៉ុណ្ណោះ ក្រោយបទឈប់បាញ់ កងទ័ពថៃ បានប្រើល្បិចសុំចាប់ដៃបញ្ចប់ជម្លោះជាមួយកម្ពុជា ដើម្បីចាប់ខ្លួនវីរៈកងទ័ពខ្មែរសរុបប្រមាណ២១ រូប ខណៈកាលពីចុងខែកក្កដា បញ្ចូនសាកសពយោធិនមួយរូប និងកាលពីដើមខែសីហា បញ្ជូនយោធិនមកកម្ពុជាវិញ ២រូប ជាមួយនឹងសភាពធ្វើឱ្យមហាជនកម្ពុជាសង្វេគជាពន់ពេក។ ខណៈបច្ចុប្បន្ន ប្រមុខរាជរដ្ឋាភិបាល និងមន្ត្រីពាក់ព័ន្ធក៏កំពុងបន្តដំណើរការនិតិវិធីជំរុញឱ្យកងទ័ពថៃ ឆាប់បញ្ជូនយោធិនខ្មែរសេសសល់មកកម្ពុជាវិញ។

ដោយក្តីឈឺចាប់ឥតឧបមាមិនខុសគ្នាពីជនរួមជាតិខ្មែរ តារាពហុជំនាញរូបនេះ មិនត្រឹមតែចេញមុខស្នើសុំប៉ុណ្ណោះទេ ថែមទាំងប្រកាសថា បើសិនផលិតរឿងតាមសំណើរបានមែន ខ្លួន រួមនិងក្រុមគ្រួសារ មិនយកកម្រៃថតនោះឡើយ។

តបនឹងសំណើរនេះ លោក ហ្វៃ សំអាង បានសម្តែងការអរគុណដល់អ្នកនាង​ ខាត់ សុឃីម ដែលនឹកឃេីញដល់លោក ក្នុងគ្រាត្រូវការស្នើសុំផលិតករផលិតរឿងទាក់ទងនឹងជាតិ។ យ៉ាងណា ទាក់ទងនឹងការផលិតកុនទាក់ទងនឹងសាច់រឿងនេះ លោកកំពុងសិក្សា ពិភាក្សា និងដាក់សំណើរទៅកាន់ថ្នាក់ដឹកនាំជាមុនសិន។

លោក ហ្វៃ សំអាង បន្ថែមថា “អរគុណច្រេីន​ចំពោះទឹកចិត្តបងប្អូនជនរួមជាតិយេីងដែលមានឆន្ទៈ​មនសិការ​ស្នេហា​ជាតិ​មាតុ​ភូមិ​ រួមសាមគ្គី​គ្នា​ក្រោមការដឹកនាំដ៏ឆ្លាត​វៃ​របស់ សម្តេច​តេជោ​ ហ៊ុន​ សែន​ និងសម្តេចមហាបវធិបតី ហ៊ុន​ ម៉ាណែត​ កម្ពុជា​ឈ្នះ​លេី​សមរភូមិ​មុខ ​និង​សមរភូមិ​ការ​ទូត”។

សូមបញ្ជាក់ដែរថា កងទ័ពថៃបានបើកការឈ្លានពានកម្ពុជានៅថ្ងៃទី២៤ ខែកក្កដាឆ្នាំ២០២៥ ដែលបណ្តាលឲ្យមានមនុស្សស្លាប់និងរងរបួស ខណៈពលរដ្ឋភៀសសឹកកម្ពុជាជាង ១៧មុឺននាក់ ត្រូវឃ្លាតឆ្ងាយពីផ្ទះសម្បែង មិនអាចប្រកបរបរចិញ្ចឹមជីវិត។

ថៃបានប្រព្រឹត្តិឧក្រិដ្ឋកម្មសង្គ្រាមតាមរយៈការប្រើប្រាស់គ្រាប់បែកចង្កោម និងផ្សែងពុលរំលោភច្បាប់អន្តរជាតិ ហើយថែម ទាំងបង្កការខូចខាតធ្ងន់ធ្ងរដល់ប្រាសាទព្រះវិហារ ដែលត្រូវបានដាក់បញ្ចូលក្នុងសម្បត្តិបេតិកភណ្ឌរបស់អង្គការយូណេស្កូផងដែរ៕ ចាន់រ៉ា