កំហុសមួយនាំឲ្យ ត្រចៀកកាំ ត្រូវគេបង្កកទ្រព្យសម្បត្តិទាំងអស់ ដល់ថ្នាក់គ្មានលុយសងបំណុល

យោងតាមសារព័ត៌មាន Sina Finance ការខាតបង់ជាប់ៗគ្នារបស់ Zhao Wei ឬតួត្រចៀកកាំ នៅក្នុងបណ្តឹង និងការបង្កកទ្រព្យសម្បត្តិ បានធ្វើឲ្យតារាស្រីរូបនេះស្ថិតក្នុងស្ថានភាពវេទនាជាខ្លាំង។ ទោះជាយ៉ាងណាក៏ដោយ មហាជនមានការយល់ច្រលំថា តារាស្រីចិន ត្រូវបានអ្នកវិនិយោគដាក់ឈ្មោះថា Warren Buffet ចិន ដូចទៅនឹងមហាសេដ្ឋីអាមេរិកដែរ។

បើយោងតាមស្ថិតិពីប្រព័ន្ធផ្សព្វផ្សាយចិន បានឲ្យដឹងថា នៅកំពូលរបស់អតីតគូស្វាមីភរិយា Zhao Wei និង Huang Youlong មានទ្រព្យសម្បត្តិប្រហែលមួយពាន់លានដុល្លារអាមេរិកពិតមែន ដែលនោះបានធ្វើឲ្យពួកគេក្លាយជាអ្នកសិល្បៈកម្រក្លាយជាមហាសេដ្ឋីប្រាក់ដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពដដែល ករណីទ្រព្យសម្បត្តិរបស់តារាស្រីវ័យ៥០ឆ្នាំត្រូវបានបង្កក និងមិនអាចប្រមូលទុនបានគឺពាក់ព័ន្ធនឹងអតីតស្វាមី Huang Youlong ។ ជាពិសេស តារាស្រីរូបនេះធ្លាប់បានក្រោកឈរឡើងជាអ្នកធានាឲ្យក្រុមហ៊ុនដែលផលិតរថយន្តអគ្គិសនីមានតុល្យភាពដោយខ្លួនឯង សម្រាប់ប្អូនថ្លៃស្រីគឺ Hoang Le ។ ប៉ុន្តែនៅឆ្នាំ ២០២១ ក្រុមហ៊ុនគ្រួសាររបស់ Hoang Le បានក្ស័យធន ហើយត្រូវបិទទ្វារភ្លាមៗ។

ក្នុងនាមជាអ្នកធានា តារាស្រីចិនបែរជាត្រូវទទួលខុសត្រូវលើការសងបំណុល ចំណែក Hoang Le និងប្តីបានរត់គេចខ្លួន ហើយអតីតស្វាមីនាង ក៏ជាប់ពាក់ព័ន្ធក្នុងបញ្ហាហិរញ្ញវត្ថុជាច្រើនដែលមានតម្លៃរាប់សិបលានដុល្លារអាមេរិក។ ព័ត៌មានពី Sohu បានបន្ថែមថា ក្នុងឆ្នាំ២០២១ នាងក៏បានបញ្ចប់ដំណើរការលែងលះជាមួយស្វាមីដែរ ប៉ុន្តែនៅតែរងផលប៉ះពាល់យ៉ាងខ្លាំងដោយការបាត់បង់ជំនួញរបស់គ្រួសារអតីតស្វាមី។ នាង​ត្រូវ​បាន​ក្មេង​ទំនើង​តាម​រក​ដើម្បី​ទារ​បំណុល។

កាលពីថ្ងៃទី ៥ ខែសីហា អ្នកសារព័ត៌មានបានពិនិត្យមើលកម្មវិធី Tianyancha ហើយបានរកឃើញថាភាគហ៊ុនរបស់ ត្រចៀកកាំនៅក្នុងក្រុមហ៊ុនចំនួន ៣គឺសុទ្ធតែត្រូវបានបង្កក។ រយៈពេលព្យួរគឺ ៣ ឆ្នាំ ហើយនឹងត្រូវបានអនុវត្តដោយតុលាការប្រជាជនស្រុក Dongcheng ក្នុងទីក្រុងប៉េកាំង។ ឧបទ្ទវហេតុហិរញ្ញវត្ថុជាប់ៗគ្នាបានធ្វើឲ្យក្រុមហ៊ុនរបស់ Zhao Wei ដួលរលំនៅក្នុងប្រតិកម្មសង្វាក់មួយ ហើយបច្ចុប្បន្ននាងមិនមានទ្រព្យសម្បត្តិនៅក្នុងប្រទេសចិនទេ ដូច្នេះវាពិបាកសម្រាប់នាងក្នុងការសងបំណុលណាស់។

មិនតែប៉ុណ្ណោះ ក្នុងឆ្នាំ ២០១៨ គណៈកម្មាធិការនិយតកម្មមូលបត្រចិន (CSRC) បានដាក់ពិន័យលើ Zhao Wei និងអតីតស្វាមីអ្នកជំនួញ Huang Youlong ពីបទរៀបចំទីផ្សារភាគហ៊ុន។ ដូច្នេះហើយ តារាស្រីនិងស្វាមីត្រូវបានផាកពិន័យម្នាក់ៗចំនួន ៣០០,០០០យ័ន និងត្រូវបានហាមឃាត់មិនឲ្យធ្វើអាជីវកម្មនៅក្នុងទីផ្សារភាគហ៊ុនរយៈពេល ៥ ឆ្នាំ។

ពីមុន Huang Youlong កំពុងលាក់ខ្លួននៅបរទេស ដោយទុកឲ្យ Zhao Wei តែម្នាក់ឯងប្រឈមមុខនឹងបណ្តឹងធំ និងតូចប្រហែល ៤០០ នៅក្នុងប្រទេស។ តារាស្រីចិនបានទទួលយករឿងនេះ ដោយសារតែនាងក៏ជាប់ពាក់ព័ន្ធនឹងការក្លែងបន្លំភាគហ៊ុនក្នុងឆ្នាំ ២០១៧។ ក្រោយមកនៅដើមខែមករា នាងបានប្រកាសលែងលះជាសាធារណៈ ដោយសារតែនាងមិនចង់សងបំណុលបន្ថែមទៀតរបស់គ្រួសារ Huang Youlong ។

យ៉ាងណាមិញ បច្ចុប្បន្ន Zhao Wei មិន​អាច​ចូលរួម​ក្នុង​សកម្មភាព​អាជីវកម្ម​ក្នុង​ទីផ្សារ​ភាគហ៊ុន​បាន​ទេ ហើយ​ក៏​មិន​ត្រូវ​បាន​អញ្ជើញឲ្យសម្ដែង​ក្នុង​ភាពយន្ត ឬ​ចូលរួម​កម្មវិធី​កម្សាន្ត​ដែរ។ អាចនិយាយបានថា តារាស្រីរូបនេះ បានធ្លាក់ក្នុងផ្លូវស្លាប់ ព្រោះគ្មានផ្លូវរកលុយ ដើម្បីជំពាក់បំណុលពីមុន៕

អត្ថបទ៖ សាង ស្រីល័ក្ខ

ចុចអាន៖ត្រចៀកកាំ ធ្លាក់​ដល់​ចំណុចសូន្យ ​បាត់បង់ទ្រព្យ រាប់​លាន​ដុល្លារ ក៏គ្មានលុយកាក់សងបំណុលគេដែរ