ចម្រៀងថ្មី សុខ សម្បតិ្ត ឆក់យកអារម្មណ៍អ្នកស្តាប់ តាមរយៈការរៀបរាប់ព្រឹត្តិការណ៍សៀមឈ្លានពាន ពេញដោយអត្ថន័យ

តាមរយៈចម្រៀងមួយបទ ដែលជាស្នាដៃនិពន្ធថ្មីរបស់អ្នកផលិតបទចម្រៀង original song សុខ សម្បត្តិ ចំណងជើង ” Stand For Peace ” បានធ្វើឱ្យមហាជន និងអ្នកមានឥទ្ធិពលលើបណ្តាញទំនាកទំនងសង្គម បញ្ចេញមតិសរសើរគ្រប់គ្នា។

ទន្ទឹមនឹងការបង្ហាញស្នាដៃចម្រៀងថ្មីនេះ លោក សុខ សម្បត្តិ បានភ្ជាប់នឹងសំណេររៀបរាប់ថា “ទីបំផុតខ្ញុំអាចនិយាយថា ខ្មែររកបានសន្តិភាពហើយ! មិនថាថ្ងៃនេះឬថ្ងៃក្រោយ ស្មារតីខ្មែរសាមគ្គីគឺជាប្រវត្តិសាស្រ្តមួយដែលមិនអាចបំភ្លេចបាន” សំណេរនេះ គឺស្របពេលដែលកម្ពុជាបានចូលរួមកិច្ចប្រជុំ GBC និងព្រមព្រៀងគ្នាលើលក្ខខណ្ឌមួយចំនួន ក្នុងកាលៈទេសៈនៃបទឈប់បាញ់ចូលជាធរមាន។

មិនខុសពីសព្វមួយដង ក្នុងការតាក់តែនិពន្ធភ្លេង យុវជនរូបនេះ បានប្រើសំឡេងពីប្រភពសកម្មភាពវីរៈកងទ័ព ក៏ដូចជាជនភៀសសឹក ដោយបន្ថែមនូវសំណេរចម្រៀងរៀបរាប់ពីព្រឹត្តិការណ៍ផ្តើមជម្លោះ រហូតមានការឈ្លានពានទឹកដីខ្មែរ ពីសំណាក់កងទ័ពសៀម។

ជាក់ស្តែងមួយបទនេះ បានធ្វើឱ្យមហាជនកោតសរសើរ ពិសេសអត្ថន័យដែលរៀបរាប់ចេញពីបេះដូងដ៏ស្មោះសនៃប្រជាជនកម្ពុជា ក្នុងបំណងដូចគ្នា គឺចង់បានសន្តិភាពដែលមានស្ថេរភាព។

គួរជម្រាបថា នេះមិនមែនជាដំបូងរបស់លោកឡើយ ក្នុងឱកាសចូលរួមព្រឹត្តិការណ៍សំខាន់ៗរបស់ជាតិ។ ខណៈកន្លងមក លោកធ្លាប់ចេញស្នាដៃលើចម្រៀងព្រឹត្តិការណ៍កីឡា និងព្រឹត្តិការណ៍រៃអង្គាសថវិកាជូនមន្ទីរពេទ្យ ក៏ដូចជាក្នុងព្រឹត្តិការណ៍សង្ក្រាន្តឆ្នាំថ្មីជាដើម៕