លោក ឡី ថៃចាន់ ណែនាំអ្នករិះគន់ម្ចាស់ជំនួយ ស្វែងយល់ធនធានអ្នកផ្តើមមូលនិធិសិន កុំវិភាគទាំងងងើល

ក្រោយមានការវែកញែករឿងសកម្មភាពមនុស្សធម៌ របស់បុគ្គលល្បីឈ្មោះមួយចំនួន ដែលបានផ្តួចផ្តើមមូលនិធិជួយដល់ វីរៈកងទ័ព គ្រួសារយោធិនពលី និងពលរដ្ឋភៀសសឹកកម្ពុជា លោក ឡី ថៃចាន់ ចេញមុខស្នើឱ្យដល់អ្នករិះគន់ថា គួរធ្វើអ្វីនាំចំណេញដល់សង្គមជាតិ បើមិនបានជួយជាកម្លាំងចិត្តដល់ការខិតខំរបស់នរណាម្នាក់ទេ កុំទំនេរវិភាគលុយជំនួយនាំរឿងអំពុល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មួយរយៈពេលនេះ ហាក់មានការវែកញែកពីសំណាក់អ្នកមួយចំនួន រឿងស្បៀងជំនួយទៅកាន់ពលរដ្ឋភៀសសឹកកម្ពុជា បន្ទាប់ពីមើលឃើញចំនួននៃការចូលរួមជាមួយអ្នកផលិតមាតិកា និងអ្នកមានឥទ្ធិពលលើបណ្តាញសង្គមហាក់ផុសផុលខ្លាំងមិនធម្មតា រួមមាន លោក Sem Longdy, លោក តាំង គីមឡេង, លោក ហេង វិសាល ក៏ដូចជា យូរ៉ា CEO ផលិតផលសម្រស់ជាដើម។

តាមរយៈសកម្មភាពមនុស្សធម៌ បុគ្គលល្បីឈ្មោះ ៣រូប ត្រូវបានអ្នកមិនចូលរួមចំណែកមូលនិធិរបស់ខ្លួន លាបពណ៌ និងវែកញែកបែបនេះបែបនោះ ដោយចោទថា កិបកេងថវិកាជំនួយ។ ក្នុងចំណោមនោះ ជើងខ្លាំងខាងធ្វើទីផ្សារ PeyPey Dy ដែលមហាជនស្គាល់ថា ជាម្ចាស់ម៉ាកកាហ្វេ Corner ដ៏ល្បី និងជាផលិតករវ័យក្មេង ត្រូវរងមតិរិះគន់ពីអ្នកមិនចូលរួមមូលនិធិនឹងលោកជាច្រើន ដោយហេតុថា ក្នុងការផ្តើមមូលនិធិជួយ វីរៈកងទ័ព គ្រួសារយោធិនពលី ក៏ដូចជាជនភៀសសឹកនេះ លោកទទួលបានថវិកាចូលរួមដ៏ច្រើន ប្រមាណជាជាង ៨០មុឺនដុល្លារ ។

ឆ្លើយតបនឹងការបែងចែកកញ្ចប់ជំនួយនេះដែរ កាលពីថ្ងៃព្រហស្បតិ៍ ទី០៧ ខែសីហា ឆ្នាំ២០២៥ លោក Sem Longdy បានធ្វើការលម្អិតជូនខ្លះនូវកិច្ចការរៀបចំរបស់ក្រុមបេសកកម្មលោករួចមកហើយ ខណៈដើម្បីតែដឹកនាំចាត់ចែងក្នុងសកម្មភាពមនុស្សធម៌នេះ លោកត្រូវផ្អាកការរកសុីដល់ទៅ ជាង១០ថ្ងៃឯណោះ។

PeyPey Dy ថា កំពុងរៀបចេញពីភ្នំពេញ ដើម្បីបំពេញបេសកកម្មរបស់លោកបន្តទៀត និងបញ្ជាក់ជំនួយកន្លងមក

ដោយឡែក ទាក់ទងនឹងរឿងរ៉ាវរបស់លោក តាំង គីមឡេង ឯណោះវិញ ក៏មិនជាខុសគ្នានឹង PeyPey Dy ប៉ុន្មានដែរ ដែលត្រូវរងពាក្យចោទប្រកាន់ថាប្រើរូបភាពមនុស្សធម៌ ទាញយកផលប្រយោជន៍ផ្ទាល់ខ្លួន ពីសំណាក់នារីម្នាក់យ៉ាងចាស់ដៃ។ ខណៈរឿងរ៉ាវនេះ លោកមិនបានតបឆ្លើយអ្វីឡើយ ដោយទុកឱ្យផ្លូវច្បាប់ជាអ្នកដោះស្រាយ។

រឿងរ៉ាវនៃការវែកញែកខាងលើនេះ ក៏ស្រាប់តែរាលដាល់ដល់លោក ហេង វិសាល និងអ្នកនាង ជា ស្រីនា ដែលមហាជនស្កាល់ថា ជាគូស្វាមីភរិយាអ្នកផលិតមាតិកាដ៏ល្បីឈ្មោះ និងតែងចូលរួមសឹងគ្រប់សកម្មភាពមនុស្សធម៌ និងព្រឹត្តិការណ៍រួមចំណែកនឹងសង្គមជាតិនោះ ថាមិនបានជួយអ្វី និងកិបកេងជំនួយ ដែលផ្ទុយនឹងការពិតទាំងស្រុង។ ដ្បិតជាក់ស្តែង លោក ហេង វិសាល មិនត្រឹមតែរួមចំណែកប៉ុណ្ណោះទេ គឺចូលរួមទាំងគ្រួសារផងដែរ។

យ៉ាងណា ជុំវិញរឿងរ៉ាវនៃការចោទប្រកាន់ខាងលើនេះ លោក ឡី ថៃចាន់ តារាសម្តែង និងជាអ្នកផលិតមាតិកាបែបកំប្លែងស្ងួត បានលើកជាមតិយោបល់ឱ្យអ្នករិះគន់ទាំងអស់ពិចារណាលើ ២ចំណុចធំ៖

១. អ្នកផ្តើមមូលនិធិម្នាក់ៗ​ ជានរណា! ខណៈដែលពួកគាត់ ជាមនុស្សសម្បូរធនធានស្រាប់ទៅហើយ និងថែមទាំងបានចូលរួមជួយសង្គមក៏ច្រើនណាស់ដែរ ហើយចាំបាច់ដែលទេ ដែលពួកគាត់ត្រូវកិបកេងកញ្ចប់ថវិកាដូចពាក្យដែលចោទ។

២. បើនិយាយពីអ្នកចូលរួមមូលនិធិ ពួកគាត់សម្រេចចូលរួមអ្នកណា មានន័យថា ពួកគាត់ស្គាល់បុគ្គលនោះច្បាស់។ ឯអ្នកមិនចូលរួម មិនបាច់ឈឺក្បាលជំនួសអ្នកចូលរួមនោះទេ។

ជាមួយគ្នានេះ តារាសាច់ដុំ ឡី ថៃចាន់ ក៏លើកឡើងករណី យូរ៉ា CEO ផលិតផលសម្រស់ដ៏ល្បី ដែលអ្នកស្រីនិងស្វាមី ពិតជាខ្នះខ្នែងក្នុងការជួយដល់ជនភៀសសឹកកម្ពុជា មិនចាញ់សប្បុរសជនឯទៀតឡើយ។ ដូចនេះ អ្នកផលិតកាបែបកំប្លែងស្ងួតរូបនេះ បានស្នើឱ្យអ្នកដែលមិនចូលរួមអ្វី គួរធ្វើអ្វីនាំចំណេញដល់សង្គមជាតិ បើមិនបានជួយជាកម្លាំងចិត្តដល់ការខិតខំរបស់នរណាម្នាក់ទេ ក៏កុំទំនេរវិភាគលុយជំនួយនាំរឿងអំពុល៕