សាធារណជន ហួសចិត្តនឹងហេតុផលដែលក្រុមហ៊ុនមួយបដិសេធមិនឱ្យអ្នកផលិតមាតិកាធ្វើការជាមួយ “ព្រោះឈឺឆ្អាលរឿងជាតិ”

ក្រោយម្ចាស់ទំព័រហ្វេសប៊ុកមួយឈ្មោះ Navi Clifford ដែលគេស្គាល់ថាជាអ្នកផលិតមាតិកា និងជាអ្នកផ្សព្វផ្សាយផលិតផល បានទម្លាយនូវសារបដិសេធមិនឱ្យធ្វើការជាមួយក្រុមហ៊ុនមួយ តាមរយៈភ្នាក់ងារកណ្តាល (Client) ដោយបញ្ជាក់ពីការបដិសេធនោះ គឺក្រោមហេតុផល “មិនទទួលយករាល់អ្នកផលិតមាតិកាណា ដែលចេញមុខនិយាយពាក់ព័ន្ធនឹងជម្លោះកម្ពុជា-ថៃ”។

ហេតុផលនៃការបដិសេធនេះ បានធ្វើឱ្យមហាជន និងអ្នកមានឥទ្ធិពលលើកបណ្តាញសង្គម មានការហួសចិត្តនិងខឹងសម្បារជាខ្លាំង ខណៈក្នុងចំណោមនោះ មានអ្នកមួយចំនួនបានទម្លាយឈ្មោះក្រុមហ៊ុនផ្សេងទៀត តាមរយៈការបញ្ចេញមតិលើ post របស់អ្នកផលិតមាតិកាដែលបានចែករំលែកនូវរឿងរ៉ាវនេះផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះមិនបានទម្លាយអត្តសញ្ញាណក្រុមហ៊ុន តែពាក់ព័ន្ធនឹងហេតុផលដែលនៅពីក្រោយការបដិសេធនេះ សាធារណជន ក៏ដូចជាអ្នកមានឥទ្ធិពលលើបណ្តាញទំនាក់ទំនងសង្គម បានសម្តែងការហួសចិត្តជាខ្លាំង និងណែនាំដល់អ្នកមាតិកាដទៃទៀតណា ដែលអាចនឹងជួបករណីដូច Navi Clifford គឺមិនបាច់ធ្វើការឱ្យក្រុមហ៊ុនប្រភេទនោះឡើយ។

តាមរយៈវីដេអូខ្លីជិត១នាទី អ្នកផលិតមាតិកាដ៏មានប្រជាប្រិយ គ្រីស ឌីណា បានបង្ហាញការមិនពេញចិត្ត និងស្នើដល់អ្នកដែលបានដឹងឮទាក់ទងនឹងក្រុមហ៊ុនប្រភេទខាងលើ អាចទាក់ទងប្រាប់លោកដោយផ្ទាល់ ក្នុងន័យដើម្បីលោកឈប់ធ្វើការជាមួយក្រុមហ៊ុននោះតែម្តង។ លោកស្នើដល់សាធារណជនដែរថា បើគ្រាន់តែក្នុងនាមជាអ្នកផលិតមាតិកាមួយរូប ដែលនិយាយពីប្រទេសជាតិ ការពារប្រទេសជាតិ ជួយប្រទេសជាតិ ក្រុមហ៊ុនណាមិនធ្វើការជាមួយដែរ ដូច្នេះមិនចាំបាច់គាំទ្រក្រុមហ៊ុនបែបនេះនោះទៀតទេ។

ទន្ទឹមនឹងបានដឹងឮនូវហេតុផលនេះ Q-win ដែលជាអ្នកផលិតកាដ៏មានប្រជាប្រិយមួយរូបដែរ បានសម្តែងការមិនពេញចិត្ត ខណៈក៏មិនខុសគ្នាពីសាធារណជនផងដែរ ដែលចង់ដឹងថា តើជាក្រុមហ៊ុនមួយណា។