ជីវិតកម្សាន្ដ

សុគន្ធ នីសា ខ្លោចចិត្តអាណិត ពេជ្រ រដ្ឋា ខ្លាំង ទើបជួបគ្នាបាន ១ ថ្ងៃ ទទួលដំណឹងមរណភាព

បានផុស

១ year មុន

នៅ

ថ្ងៃពុធ ២៩ វិច្ឆិកា ២០២៣

ដោយ

តារាចម្រៀងសំនៀងផ្អែមអ្នកនាង សុគន្ធ នីសា បានបង្ហាញអារម្មណ៍រន្ធត់ចិត្តខ្លាំង បន្ទាប់ពីទទួលដំណឹងមរណភាពរបស់តារាចម្រៀងសិស្សប្អូនលោក ពេជ្រ រដ្ឋា ដោយសារហេតុការណ៍គ្រោះថ្នាក់ចរាចរណ៍ កាលពីទៀបភ្លឺឈានចូលថ្ងៃទី ២៩ ខែវិច្ឆិកា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាង សុគន្ធ នីសា បានរៀបរាប់ទាំងក្តីរន្ធត់ចិត្តថា «ពុទ្ធោអើយ បងទើបបានជួបច្រៀងជាមួយប្អូនលើកទីមួយម្សិលម្ង៉ៃនេះទេ គឺឃើញប្អូនប្រុសស្លូតបូតណាស់ ខ្លោចចិត្តណាស់ប្អូនអើយ ជីវិតមនុស្សគ្មានអ្វីទៀងជាងការស្លាប់នោះឡើយ មួយថ្ងៃជួប មួយថ្ងៃបែក មួយថ្ងៃសើច មួយថ្ងៃទៀតក៏យំ»។

តារាចម្រៀងមនោសញ្ចេតនា សុគន្ធ នីសា បានបន្តថា «សូមចូលរួមរំលែកទុក្ខក្រុមគ្រួសារប្អូនប្រុស ពេជ្រ រដ្ឋា តារាចម្រៀងប្រចាំផលិតកម្ម Town Production ដែលបានទទួលមរណភាពកាលពីពាក់កណ្តាលយប់មិញនេះដោយគ្រោះថ្នាក់ចរាចរណ៍ សូមប្អូនបានទៅកាន់ទីស្ងប់សុខ(អស់វេលាថ្ងៃស្អែក)»។

សូមបញ្ជាក់ថា តារាចម្រៀងរបស់ផលិតកម្ម Town Production លោក ពេជ្រ រដ្ឋា បានទទួលមរណភាពដោយគ្រោះថ្នាក់ចរាចរណ៍ នៅស្រុកភ្នំក្រវាញ ខេត្តពោធិ៍សាត់ កាលពីវេលាទៀបភ្លឺថ្ងៃទី ២៩ ខែវិច្ឆិកា ឆ្នាំ ២០២៣ ពោល នៅថ្ងៃទី ៣ នៃចុងបញ្ចប់ព្រះរាជពិធីបុណ្យអុំទូក។

ជាមួយដំណឹងមរណភាពរបស់តារាចម្រៀងវ័យក្មេងលោក ពេជ្រ រដ្ឋា បានធ្វើឲ្យមហាជន និងអ្នកគាំទ្រ ព្រមទាំងសិល្បករ-សិល្បការិនីជាច្រើន បានសម្តែងការសោកស្ដាយ និងមានក្តីរន្ធត់ចិត្តជាពន់ពេក ខណៈខ្លះទៀតចូលរួមរំលែកទុក្ខក្រុមគ្រួសារ នៃសពផងដែរ៕

អត្ថបទ ៖ ចាន់រ៉ា