ការសិក្សាថ្មីមួយរកឃើញថាស្ត្រីមានហ្សែនបង្កើនហានិភ័យជំងឺធ្លាក់ទឹកចិត្តជាងបុរស

យោងតាមការចេញផ្សាយរបស់សារព័ត៌មាន CNA នៅថ្ងៃទី០៨ខែ តុលា ការសិក្សាថ្មីមួយរបស់អូស្ត្រាលីបានរកឃើញថាស្ត្រីទំនងជាមានហ្សែនច្រើនជាងបុរសដែលបង្កើនហានិភ័យនៃជំងឺធ្លាក់ទឹកចិត្ត។

អ្នកវិទ្យាសាស្ត្រមកពីវិទ្យាស្ថានស្រាវជ្រាវវេជ្ជសាស្ត្រ Berghofer បានសិក្សា DNA របស់មនុស្សជិត២០ម៉ឺន នាក់ដែលមានជំងឺធ្លាក់ទឹកចិត្ត។ ពួកគេបានរកឃើញថាស្ត្រីមានសញ្ញាហ្សែនប្រហែល១ម៉ឹន៣ពាន់នាក់ ដែលផ្សារភ្ជាប់ទៅនឹងជំងឺធ្លាក់ទឹកចិត្ត ខណៈដែលបុរសមានប្រហែល ៧ពាន់។ នេះមានន័យថា ស្ត្រីអាចមានហ្សែនច្រើនជាងពីរដង ដែលធ្វើឱ្យពួកគេងាយកើតជំងឺធ្លាក់ទឹកចិត្ត។

អ្នកស្រាវជ្រាវនិយាយថា ភាពខុសគ្នានៃហ្សែនទាំងនេះអាចប៉ះពាល់ដល់អរម៉ូន និងការរំលាយអាហារ ដែលអាចពន្យល់ពីមូលហេតុដែលស្ត្រីដែលមានជំងឺធ្លាក់ទឹកចិត្តតែងតែជួបប្រទះការផ្លាស់ប្តូរទម្ងន់ ឬមិនសូវមានថាមពល។

ការសិក្សានេះបានចេញផ្សាយនៅក្នុង Nature Communications បង្ហាញថាផ្នែកហ្សែននៃការធ្លាក់ទឹកចិត្តគឺខ្លាំងជាងចំពោះស្ត្រី។ អ្នកវិទ្យាសាស្ត្រជឿថា នេះអាចជួយគ្រូពេទ្យបង្កើតការព្យាបាលដែលមានលក្ខណៈផ្ទាល់ខ្លួន និងប្រសើរជាងសម្រាប់បុរស និងស្ត្រីនាពេលអនាគត។

ការរកឃើញនេះចង្អុលបង្ហាញថា ការស្រាវជ្រាវកន្លងមក និងថ្នាំសម្រាប់ជំងឺធ្លាក់ទឹកចិត្តភាគច្រើនផ្តោតសំខាន់លើបុរស ដូច្នេះការរកឃើញថ្មីទាំងនេះគឺជាជំហានដ៏សំខាន់មួយឆ្ពោះទៅរកការយល់ដឹងពីរបៀបដែលជំងឺធ្លាក់ទឹកចិត្តប៉ះពាល់ដល់ស្ត្រីខុសៗគ្នា។ បច្ចុប្បន្ននេះ ជំងឺធ្លាក់ទឹកចិត្តប៉ះពាល់ដល់មនុស្សជាង ៣០០លាននាក់នៅទូទាំងពិភពលោក នេះបើយោងតាមអង្គការសុខភាពពិភពលោក៕