ព័ត៌មានអន្ដរជាតិ

ឆេះឡានក្រុងនៅឥណ្ឌា ស្លាប់មនុស្ស២០នាក់

បានផុស

៨ ខែ មុន

នៅ

ថ្ងៃពុធ ១៥ តុលា ២០២៥

ដោយ

Chheang

យ៉ាងហោចណាស់មនុស្ស២០នាក់បានបាត់បង់ជីវិត នៅពេលដែលរថយន្តក្រុងដឹកអ្នកដំណើរមួយគ្រឿងបានឆាបឆេះ ខណៈពេលកំពុងធ្វើដំណើររវាងទីក្រុង Jaisalmer និងទីក្រុង Jodhpur ក្នុងរដ្ឋ Rajasthan ភាគខាងលិចប្រទេសឥណ្ឌា កាលពីថ្ងៃអង្គារទី១៤ខែតុលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រថយន្តក្រុងដឹកអ្នកដំណើរជាង៥០នាក់បានផ្ទុះឆេះបន្ទាប់ពីឃើញមានផ្សែងហុយចេញពីខាងក្រោយរថយន្ត។ មន្ត្រីប៉ូលិសជាន់ខ្ពស់ Rajesh Meena បានប្រាប់ទីភ្នាក់ងារព័ត៍មាន AFP ថា «អ្នកដំណើរ១៩នាក់បានស្លាប់នៅក្នុងឡានក្រុង ហើយម្នាក់បានស្លាប់ដោយសាររងរបួសរលាកនៅតាមផ្លូវទៅដឹកទៅកាន់ទីក្រុង Jodhpur»។

យោងតាមសារព័ត៌មាន Press Trust of India អ្នកបើកបរបានឈប់រថយន្តក្រុងនៅតាមបណ្តោយផ្លូវហាយវេ នៅពេលដែលគាត់បានកត់សម្គាល់ឃើញផ្សែង ប៉ុន្តែអណ្តាតភ្លើងបានរីករាលដាលយ៉ាងឆាប់រហ័ស ដោយបានឆាបឆេះរថយន្តទាំងមូលក្នុងរយៈពេលតែមួយភ្លែត។ អគ្គិភ័យបានឆាបឆេះភ្លាមៗបន្ទាប់ពីរថយន្តក្រុងបានចាកចេញពីទីក្រុង Jaisalmer នៅម៉ោងប្រហែល៣រសៀលម៉ោងក្នុងស្រុក។

ទូរទស្សន៍ឥណ្ឌា NDTV បានរាយការណ៍ថា ការឆ្លងភ្លើងអាចបណ្តាលឲ្យមានអគ្គិភ័យនេះ ទោះបីជាវាមិនត្រូវបានបញ្ជាក់ជាផ្លូវការក៏ដោយ។

នាយករដ្ឋមន្រ្តីឥណ្ឌា Narendra Modi បានសម្តែងការរំលែកទុក្ខរបស់គាត់ដោយនិយាយថា គាត់«សោកសៅចំពោះការបាត់បង់ជីវិត» និងអធិស្ឋានសម្រាប់អ្នករងរបួស។ លោកបានប្រកាសផ្តល់សំណងចំនួន ២០០ ០០០រូពី (ប្រមាណ ២ ៩២៥ ដុល្លារអាមេរិក) សម្រាប់គ្រួសារអ្នកស្លាប់ និង ៥០ ០០០រូពី សម្រាប់អ្នករងរបួស។

ប្រទេសឥណ្ឌាមានកំណត់ត្រាគ្រោះថ្នាក់ចរាចរណ៍ដ៏អាក្រក់បំផុតមួយរបស់ពិភពលោក។ ក្នុងឆ្នាំ២០២៣ ប្រទេសនេះបានរាយការណ៍ពីគ្រោះថ្នាក់ចរាចរណ៍ជាង ៤៨០ ០០០ករណី ដែលបណ្តាលឲ្យមនុស្សស្លាប់ជិត ១៧៣ ០០០នាក់ និងរបួស ៤៦៣ ០០០នាក់។ នេះបើយោងតាមទិន្នន័យរបស់រដ្ឋាភិបាល៕