អ្នកនាំពាក្យកងទ័ពថៃ ដោះសារទាំងមិនចេះខ្មាសថា ថៃអត់ដែលប្រើអាវុធគីមីលើកម្ពុជាទេ

អ្នកនាំពាក្យកងទ័ពជើងគោកថៃលោក Winthai Suvari បានចេញមុខបដិសេធថា ថៃមិនដែលប្រើអាវុធគីមី បាញ់ស្រោចមកលើកម្ពុជានោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការនិយាយទាំងមិនចេះខ្មាសមាត់នេះគឺឆ្លើយតបទៅនាយឧត្តមសេនីយ៍ ផន ណារ៉ា អគ្គលេខាធិការនៃអគ្គលេខាធិការដ្ឋាន អាជ្ញាធរជាតិទប់ស្កាត់អាវុធគីមី នុយក្លេអ៊ែរ ជីវសាស្រ្ត និងវិទ្យុសកម្មនៃប្រទេសកម្ពុជា ដែលទម្លាយថា អាជ្ញាធរជំនាញបានរកឃើញសារធាតុគីមីច្រើនប្រភេទនៅតាមបណ្តោយព្រំដែនកម្ពុជា-ថៃ ក្រោយបញ្ចប់សង្គ្រាម។ ការរកឃើញនេះ បន្ទាប់ពីយោធាថៃបានប្រើប្រាស់គ្រាប់បែកប្រភេទធុនធ្ងន់ គ្រាប់បែកចង្កោម និងផ្សែងពុល ដែលច្បាប់អន្តរជាតិបានហាមឃាត់។

ទន្ទឹមនោះ នាយឧត្តមសេនីយ៍ ផន ណារ៉ា សង្កត់ធ្ងន់ថា ក្រោយសង្គ្រាមបញ្ចប់ នៅក្នុងតំបន់ព្រំដែនទាំងអស់មិនមែនមានតែមីនសុទ្ធនោះទេ ដោយឥឡូវរកឃើញទាំងសារធាតុគីមីមួយចំនួនដែលគួរឲ្យចាប់អារម្មណ៍និងធ្វើផែនការរៀបចំដើម្បីបន្សាបឬបំផ្លាញចោល ដែលទាមទារឲ្យមានការរៀបចំថវិកាមួយចំនួនដើម្បីដោះស្រាយ។

ឆ្លើយតបចំពោះរឿងនេះ អ្នកនាំពាក្យកងទ័ពថៃ បែរជានិយាយទាំងមិនចេះខ្មាសថា កម្ពុជាកំពុងបំភ្លៃស្ថានការណ៍ ដើម្បីបង្កើតការយល់ច្រឡំនិងសុំជំនួយពីបរទេស។ នេះបើតាមការផ្សាយរបស់ Khaosod កាលពីថ្ងៃចន្ទទី២០ខែតុលាឆ្នាំ២០២៥។

លោក Winthai ចេះនិយាយទៅរួចថា ការ​ចោទ​ប្រកាន់​នេះគឺ​ជា​ការ​បំភ្លៃ​ការពិតសុទ្ធសាធ គ្មានព័ស្តុតាង​គាំទ្រនិង​ខ្វះ​ទម្ងន់​ផ្លូវ​ច្បាប់។ លោក​​បញ្ជាក់​ថា ថៃ​មិន​ដែល​ធ្វើ​ប្រតិបត្តិការ​អាវុធ​គីមី​អ្វី​ឡើយ។

ទាក់ទិននឹងម្សៅផូស្វ័រពណ៌ស អ្នកនាំពាក្យរូបនេះអះអាងថា គោលបំណងចម្បងរបស់វាគឺដើម្បីបង្កើតផ្សែង ពន្លឺ ការផ្ទុះនិងភ្លើង។ វាមិនត្រូវបានចាត់ថ្នាក់ជាអាវុធគីមីនៅក្រោមអនុសញ្ញាអាវុធគីមី (CWC) ទេ។ ជាងនេះទៅទៀត មិនមានសន្ធិសញ្ញាអន្តរជាតិហាមឃាត់ការរក្សាទុកឬប្រើប្រាស់គ្រាប់រំសេវប្រភេទនេះឡើយ។ ដូច្នេះថៃ​អាច​រក្សាទុក និង​ប្រើប្រាស់​វា​សម្រាប់​បេសកកម្ម​យោធា​ក្រោម​ក្របខណ្ឌ​នៃ​ច្បាប់​អន្តរជាតិ។

ទោះបីជាយ៉ាងណា នេះគឺជាការដោះសារយ៉ាងត្រឡប់ត្រឡិនផ្ទុយពីកាលមុន ដែលលោក Winthai ខ្លួនឯងនេះហើយ ជាអ្នកទទួលស្គាល់ចេញពីមាត់ផ្ទាល់ថា ថៃពិតជាប្រើប្រាស់សារធាតុគីមី ផូស្វ័រពណ៌ស បាញ់ស្រោចលើកងទ័ពកម្ពុជាមែន។

ការទទួលស្គាល់នោះគឺនៅថ្ងៃអង្គារទី១៩ខែសីហាឆ្នាំ២០២៥ និងត្រូវបានចុះផ្សាយដោយសារព័ត៌មាន Thai Enquirer ថែមទៀតផង។ លោកសារភាពថា កងទ័ពថៃបានប្រើសារធាតុគីមីនេះក្នុងការប្រយុទ្ធចន្លោះថ្ងៃទី២៤-២៨ខែកក្កដា៕

អត្ថបទ៖ សុខ សុវណ្ណ

ចុចអាន៖ ថៃ ទទួលស្គាល់ថា ខ្លួនពិតជាបាញ់សារធាតុគីមី «ផូស្វ័រពណ៌ស» ស្រោចលើកងទ័ពកម្ពុជា មែន