គ្រឿងអលង្ការដែលចោរលួចពីសារមន្ទីរ Louvre ប្រទេសបារាំង មានតម្លៃដល់ទៅ១០២លានដុល្លារ

គ្រឿងអលង្ការ ដែលត្រូវបានចោរចូលលួចដ៏សាហាវទាំងព្រឹកកាលពីថ្ងៃអាទិត្យពីសារមន្ទីរ Louvre ក្នុងទីក្រុងប៉ារីស ប្រទេសបារាំង មានតម្លៃដល់ទៅ ៨៨លានអឺរ៉ូ(១០២លានដុល្លារ)ឯណោះ។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី២២ខែតុលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រឿងអលង្ការដែលត្រូវបានចោរលួចនោះ រួមមានគ្រឿងអលង្ការរាជវង្ស ដែលធ្លាប់ជាកម្មសិទ្ធិរបស់មហាក្សត្រិយានី និងអធិរាជបារាំង ដែលធ្វើឱ្យវាក្លាយជាការលួចដ៏ធំបំផុត និងគួរឱ្យតក់ស្លុតបំផុតក្នុងប្រវត្តិសាស្ត្ររបស់ប្រទេសបារាំង។

ក្រុមទាំងនោះចោរ​ពាក់​ម៉ាស់​មានគ្នាបួន​នាក់​បាន​ប្រើ​ឡាន​ដឹកជណ្ដើរជនមួយ​ដើម្បី​ឡើងទៅ​ដល់​យ៉រ​នៃ​សាលសិល្បៈ Galerie d’Apollon របស់សារមន្ទី Louvre ក្បែរ​ទន្លេ Seine។ ពួកគេពីរនាក់ចូលតាមបង្អួច គំរាមកំហែងសន្តិសុខ និងលួចគ្រឿងអលង្ការចំនួនប្រាំបីក្នុងរយៈពេលតិចជាងប្រាំបីនាទី។ ក្រោយមកពួកគេបានរត់គេចខ្លួនតាមម៉ូតូអគ្គិសនីចេញពីសារមន្ទីរបានសម្រេច។

របស់ដែលលួចបានរួមមាន មកុដ ខ្សែកពេជ្រ និងត្បូងមរកត ដែលអធិរាជណាប៉ូឡេអុង ប្រគល់ឱ្យមហេសីបស់ទ្រង់ Marie-Louise ខ្សែចងមាសពាក់ដោយ អធិរាជ Eugénie និងគ្រឿងអលង្ការរបស់ម្ចាស់ក្សត្រី Marie-Amélie។ ក្នុងនោះមានមកុដ​មួយ រងការខូចខាត​ត្រូវ​បាន​រកឃើញទម្លាក់ចោលក្បែរសារមន្ទី​ក្នុង​ពេលចោរ​រត់​គេចខ្លួន។

ប្រធានាធិបតីបារាំងលោក Emmanuel Macron បានហៅការលួចនេះថាជា «ការវាយប្រហារលើបេតិកភណ្ឌរបស់ប្រទេសបារាំង» ខណៈដែលរដ្ឋមន្ត្រីក្រសួងយុត្តិធម៌បានទទួលស្គាល់ថាប្រព័ន្ធសន្តិសុខបានបរាជ័យ ដោយសារនៅកន្លែងខ្លះរបស់សារមន្ទីរមិនមាន CCTV ហើយសំឡេងរោទិ៍មិនបន្លឺឡើយ។

អ្នកជំនាញជឿថា ចោរប្លន់ទាំងនោះគឺជាអ្នកជំនាញ ហើយខ្លាចថាគ្រឿងអលង្ការទាំងនោះ ប្រហែលជាត្រូវបានបំបែកហើយរត់ពន្ធចេញពីប្រទេស។ រដ្ឋអាជ្ញាបារាំងលោក Laure Beccuau បាននិយាយថា ការខាតបង់នេះគឺ «មិនធម្មតា» មិនត្រឹមតែខាតបង់ប្រាក់ប៉ុណ្ណោះទេ ប៉ុន្តែខាតបង់បំណែកនៃប្រវត្តិសាស្ត្របារាំងដែលមិនអាចកាត់ថ្លៃបានថែមទៀត៕

អត្ថបទ៖ ប៊ុន សុភាព