ពូទីន៖ បើអ៊ុយក្រែនហ៊ានបាញ់ Tomahawk, រុស្ស៊ីនឹងឆ្លើយតបវិញខ្លាំងបំផុត គ្រប់គ្នាច្បាស់ជាភ្ញាក់ផ្អើល 

រឿងរ៉ាវជុំវិញការបញ្ជូនមីស៊ីល Tomahawk របស់អាមេរិកទៅឲ្យអ៊ុយក្រែន ដើម្បីវាយប្រហាររុស្ស៊ី, ពេលនេះមេដឹកនាំវិមានក្រឹមឡាំងព្រមានថា បើទីក្រុងកៀវ ហ៊ានយកមីស៊ីលរយៈចម្ងាយឆ្ងាយនេះវាយប្រហាររុស្ស៊ីមែន ទីក្រុងមូស្គូនឹងឆ្លើយតបវិញយ៉ាងធ្ងន់ធ្ងរបំផុត ហើយគ្រប់គ្នានឹងភ្ញាក់ផ្អើលជាក់ជាមិនខាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រាប់ទៅអ្នកសារព័ត៌មានបន្ទាប់ពីកិច្ចប្រជុំមួយក្នុងទីក្រុងមូស្គូ កាលពីថ្ងៃព្រហស្បតិ៍ទី២៣ខែតុលាឆ្នាំ២០២៥ លោក វ្ល៉ាឌីមៀរ ពូទីន ព្រមានថា «រាល់ការប្រើមីស៊ីល Tomahawk ប្រឆាំងនឹងទឹកដីរុស្ស៊ី ច្បាស់ជាបង្កឲ្យមានប្រតិកម្មខ្លាំងក្លា។ នេះគឺជាការប៉ុនប៉ងបង្កើនភាពតានតឹង ហើយប្រសិនបើអាវុធបែបនេះត្រូវបានប្រើដើម្បីវាយប្រហារទឹកដីរុស្ស៊ី ការឆ្លើយតបនឹងមានលក្ខណៈធ្ងន់ធ្ងរខ្លាំងបំផុត ឬក៏អាចជាការឆ្លើយតបដ៏គួរឲ្យភ្ញាក់ផ្អើលក៏ថាបាន»។

ទន្ទឹមនោះ បើតាមការផ្សាយរបស់ RT, ប្រធានាធិបតីរុស្ស៊ី បានស្តីបន្ទោសលោកខាងលិច ចំពោះការផ្គត់ផ្គង់មីស៊ីលនេះឲ្យអ៊ុយក្រែន ដោយចាត់ទុកថា វាជាការប៉ុនប៉ងបញ្ឆេះភាពតានតឹង។

តាមសម្តីលោកពូទីន, ចំណាត់ការបែបនេះនឹងជាការបញ្ឆេះកម្តៅស្ថានការណ៍ បង្កើនភាពតានតឹង ដូច្នេះសូមមេដឹកនាំលោកខាងលិច ពិចារណាអំពីរឿងនេះ ឲ្យមែនទែន។

អ្វីដែលគេកំពុងតាមដានខ្លាំង គឺថា មុននេះលោកពូទីន បានចេញ​បញ្ជា​រួចហើយ ឲ្យ​រៀបចំ​សមយុទ្ធនុយក្លេអ៊ែរជាយុទ្ធសាស្ត្រ​ទ្រង់ទ្រាយធំ ពាក់ព័ន្ធនឹងការបាញ់សាកល្បងមីស៊ីល​បាលិស្ទិក​អន្តរទ្វីប។

ប្រភពពីវិមានក្រឹមឡាំង, សមយុទ្ធនេះបានសាកល្បងសមាសធាតុទាំងអស់នៃ​នុយក្លេអ៊ែរ​របស់រុស្ស៊ី រួមទាំងប្រព័ន្ធ​នៅ​លើ​ដី សមុទ្រ និងផ្លូវអាកាស។ មីស៊ីល Yars ICBM មួយគ្រាប់​ ត្រូវបានបាញ់ចេញពី​ទីលាន​បាញ់​បង្ហោះ Plesetsk នៅភាគពាយព្យប្រទេសរុស្ស៊ី ខណៈ​មីស៊ីល​មួយ​គ្រាប់​ទៀតឈ្មោះ Sineva ត្រូវបានបាញ់ចេញពីនាវាមុជទឹកនៅ​សមុទ្រ Barents។

មិនត្រឹមប៉ុណ្ណឹង យន្តហោះទម្លាក់គ្រាប់បែកយុទ្ធសាស្ត្រ Tu-95 ក៏បានបាញ់មីស៊ីលរយៈចម្ងាយឆ្ងាយផងដែរ អំឡុងពេលធ្វើសមយុទ្ធ៕

អត្ថបទ៖ សុខ សុវណ្ណ

ចុចអាន៖ ពូទីនចេញ​បញ្ជា​ឲ្យ​ធ្វើ​សមយុទ្ធ​នុយក្លេអ៊ែរ ក្រោយ​ត្រាំពន្យារពេលកិច្ចប្រជុំកំពូលស្ដី​ពី​អ៊ុយក្រែន