មីយ៉ាន់ម៉ា ទម្លាក់គ្រាប់បែកកម្ទេចអគារ Scammer ខណៈមនុស្សជិត ១ ៧០០នាក់ រត់ចូលដីថៃ

យោធាមីយ៉ាន់ម៉ា បានបើកប្រតិបត្តិការទម្លាក់គ្រាប់បែកកម្ទេចអគារជាច្រើននៅក្នុងតំបន់ Myawaddy ដែលជឿថា ជាកន្លែងលាក់បាំងក្រុមឧក្រិដ្ឋជនអនឡាញ (Scammer)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ Khaosod, ប្រតិបត្តិការនេះធ្វើឡើងកាលពីរាត្រីថ្ងៃសុក្រទី២៤ខែតុលាឆ្នាំ២០២៥ ក្នុងតំបន់សេដ្ឋកិច្ចពិសេសរបស់ចិន ឈ្មោះថា KK Park។

ជុំវិញយុទ្ធនាការបង្ក្រាបនេះផងដែរ សារព័ត៌មាន Bangkok Post ចុះផ្សាយថា ត្រឹមរយៈពេល២ថ្ងៃ ​មានមនុស្សជិត១ ៧០០នាក់ មកពី២១ប្រទេសបានសម្រុកចាកចេញពី KK Park ដោយឆ្លងដែនចូលដីថៃក្នុងភូមិសាស្រ្តខេត្ត Tak ខណៈជាង ២ ០០០នាក់ទៀត ត្រូវគេរំពឹឹងថា នឹងរត់ចេញជាបន្តបន្ទាប់។

តាមការបញ្ជាក់ពីមន្ត្រីថៃ ជនបរទេសដែលរត់ចូលដីរបស់ខ្លួនមានសញ្ជាតិដូចជា ចិន ឥណ្ឌា នេប៉ាល់ កេនយ៉ា វៀតណាម ស្រីលង្កា អេត្យូពី បង់ក្លាដែស ហ្វីលីពីន ប៉ាគីស្ថាន និងថៃគ្នាឯង។

ទន្ទឹមនោះ ថៃក៏បានឃាត់ខ្លួនមនុស្សចំនួន១៩៧នាក់ផងដែរ សម្រាប់ការសាកសួរនិងពិនិត្យពិច័យ។

តាមពិតទៅ យោធាមីយ៉ាន់ម៉ា ចាប់ផ្តើមការវាយឆ្មក់នៅ KK Park តាំងពីដើមខែតុលាមកម្ល៉េះ ដោយកាន់កាប់បានអគារជាង២០០អគារ និងឃាត់ខ្លួនមនុស្សជាង ២ ០០០នាក់។

ក្នុងអំឡុងពេលនៃការឆ្មក់ចូល ទាហានបានរឹបអូសឧបករណ៍ រួមទាំងដុំផ្កាយរណប Starlink ចំនួន៣០គ្រឿងផងដែរ។ ឧបករណ៍ទាំងនេះ ត្រូវបានក្រុមឆបោក ប្រើប្រាស់សម្រាប់ប្រតិបត្តិការឧក្រិដ្ឋកម្មតាមអ៊ីនធឺណិតរបស់ពួកគេ៕

អត្ថបទ៖  សុខ សុវណ្ណ

ចុចអាន៖ ចំនួនអ្នករត់គេចពីការបង្ក្រាបមជ្ឈមណ្ឌលឆបោកនៅម៉ាយាន់ម៉ាចូលថៃកើនដល់ជាង១ពាន់នាក់