ចំនួនអ្នករត់គេចពីការបង្ក្រាបមជ្ឈមណ្ឌលឆបោកនៅម៉ាយាន់ម៉ាចូលថៃកើនដល់ជាង១ពាន់នាក់

ជនបរទេសដែលរត់គេចខ្លួនចូលទៅក្នុងប្រទេសថៃបានកើនដល់ជាង១០០០នាក់ បន្ទាប់ពីយោធាមីយ៉ាន់ម៉ាវាយឆ្មក់ចូលមជ្ឈមណ្ឌលឆបោកតាមអ៊ីនធឺណិតដ៏ធំមួយឈ្មោះ «KK Park» ក្នុងទីក្រុង Myawaddy ជិតទីក្រុង Mae Sot ជាប់ខេត្ត Tak ប្រទេសថៃ។ នេះបើយោងតាមការចេញផ្សាយរបស់សារព័ត៌មាន Khaosod នៅថ្ងៃទី២៤ខែតុលា។

ការបង្រ្គាបរបស់មីយ៉ាន់ម៉ា បានបណ្តាលឱ្យមានមនុស្សរត់ឆ្លងកាត់ព្រំដែនចូលថៃយ៉ាងច្រើន។ ក្រុមធំជាងគេគឺជនជាតិឥណ្ឌា (៣៩៩ នាក់) និងជនជាតិចិន (១៤៧ នាក់) រួមជាមួយអ្នកផ្សេងទៀតមកពីប្រទេសវៀតណាម ហ្វីលីពីន ឥណ្ឌូនេស៊ី ប៉ាគីស្ថាន អេត្យូពី នេប៉ាល់ និងពលរដ្ឋថៃចំនួន ៣១ នាក់។

ដើម្បីគ្រប់គ្រងស្ថានការណ៍ អាជ្ញាធរថៃបានបង្កើតប៉ុស្ត៍ត្រួតពិនិត្យ និងតំបន់ត្រួតពិនិត្យតាមដងទន្លេ Moei ព្រំដែនមីយ៉ាន់ម៉ា។ មន្ត្រីថៃកំពុងពិនិត្យមើលអត្តសញ្ញាណ និងប្រវត្តិឧក្រិដ្ឋកម្មរបស់អ្នកទាំងនោះ។ មនុស្សមួយចំនួនត្រូវបានរកឃើញថាមានកំណត់ត្រាឧក្រិដ្ឋកម្ម ខណៈដែលមនុស្សជាច្រើនមិនមានលិខិតឆ្លងដែននោះទេ។ អ្នកទាំងនេះកំពុងទទួលបានអាហារ ទឹក និងជំនួយផ្នែកវេជ្ជសាស្រ្ត ដោយប៉ូលិសបានញែកជនរងគ្រោះនៃការឆបោក ចេញពីអ្នកដែលពាក់ព័ន្ធនឹងសកម្មភាពឧក្រិដ្ឋកម្ម។

បើតាមយោធាមីយ៉ាន់ម៉ាបាននិយាយថា ខ្លួនបានបិទ KK Park ចាប់ខ្លួនមនុស្សជាង ២,០០០នាក់ និងរឹបអូសឧបករណ៍អ៊ីនធឺណិត Starlink ដែលប្រើសម្រាប់ប្រតិបត្តិការឆបោក។

គួរបញ្ជាក់ថា KK Park ត្រូវបានគេស្គាល់ថាជាមជ្ឈមណ្ឌលបោកប្រាស់ជនបរទេសតាមរយៈការផ្តល់ជូនការងារក្លែងក្លាយ ហើយបន្ទាប់មកបង្ខំពួកគេឱ្យធ្វើការឆបោកតាមអ៊ីនធឺណិតបន្តបន្ទាប់ទៅលើអ្នកផ្សេងទៀត៕

អត្ថបទ៖ ប៊ុន សុភាព