ឈៀងម៉ៃ ក្លាយជាតំបន់ប្រកាសអាសន្នពណ៌ក្រហម ដោយសារកូវីដ

ការកើនឡើងនៃករណីជំងឺកូវីដ-១៩ នៅ ឈៀងម៉ៃ ត្រូវបានគេចាត់ទុកថាជាការ ប្រកាសអាសន្នពណ៌ក្រហម បន្ទាប់ពីខេត្តភាគខាងជើងមួយនេះ បានរកឃើញអ្នកឆ្លង ២៦៩ករណីបន្ថែមទៀត ដែលភាគច្រើនទាក់ទងទៅនឹងកន្លែងកម្សាន្តពេលរាត្រី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីម្សិលមិញ ឈៀងម៉ៃ បាននាំមុខទីក្រុងបាងកកនិងឆុនបូរី ចំពោះការឆ្លងជំងឺកូវីដ-១៩ ខណៈប្រទេសថៃបានបំបែកកំណត់ត្រាឆ្លងថ្មីចំនួន ៩៨៥ករណី។

មជ្ឈមណ្ឌលគ្រប់គ្រងស្ថានភាពជំងឺកូវីដ១៩របស់ប្រទេសថៃ (CCSA) បាននិយាយថា ឈៀងម៉ៃ បាននាំមុខជាមួយករណីថ្មីចំនួន ២៦៩ករណី បន្ទាប់មកបាងកក ១៣៧ករណីនិង ឆុនបូរី ៩២ករណី។

យោងតាមអភិបាលខេត្តបានឲ្យដឹងថា ចំនួនមនុស្សដែលមានហានិភ័យខ្ពស់នៅ ឈៀងម៉ៃ ត្រូវបានគេប៉ាន់ប្រមាណថា មានប្រហែលពី៥,០០០ ទៅ៦,០០០នាក់។

ការឆ្លងថ្មី ៩៨៥ករណីដែលបានរាយការណ៍ដោយ CCSA គឺជាចំនួនសរុបប្រចាំថ្ងៃខ្ពស់បំផុតចាប់តាំងពីរោគរាតត្បាតផ្ទុះឡើង ហើយបង្កើនចំនួនសរុបដល់ ៣,៣៦១០ករណី។

តួលេខនៅឈៀងម៉ៃ បូករួមទាំងចង្កោមធំមួយ ដែលត្រូវបានរកឃើញនៅក្នុងខេត្តកាលពីរសៀលថ្ងៃអាទិត្យផងដែរ។

អគ្គនាយកនៃនាយកដ្ឋានប្រយុទ្ធប្រឆាំងជំងឺឆ្លងលោក Opas Karnkawinpong បាននិយាយថា តួលេខដែលពួកគេរាយការណ៍បន្ទាប់ពីពិធីបុណ្យសង្ក្រាន្តចូលឆ្នាំថ្មី នឹងកំណត់ទិសដៅក្នុងរលកទី៣នេះ។ និន្នាការនៅតែកើនឡើង យើងនឹងពិនិត្យមើលតួលេខបន្ទាប់ពីពិធីបុណ្យសង្ក្រាន្ត។

លោកនិយាយថា ករណីថ្មីៗភាគច្រើននៅតែមានជាប់ទាក់ទងទៅនឹងកន្លែងកម្សាន្តពេលយប់ ហើយបានព្រមានថា ការឈប់សម្រាករដូវក្តៅរបស់សកលវិទ្យាល័យ អាចបណ្តាលឲ្យមានការកើនឡើងមួយទៀត ប្រសិនបើនិស្សិតកាត់បន្ថយការការពាររបស់ពួកគេ៕

ប្រែសម្រួលដោយ៖ Vann Vann

ប្រភព៖ Bangkok Post

ចុចអាន៖ ថៃ រកឃើញករណីឆ្លងកូវីដក្នុងកម្រិតកំណត់ត្រា ថ្ងៃចន្ទនេះ ហក់ដល់ជិតខ្ទង់ពាន់