ឆ្មក់ចូលទីតាំងលួចផលិតប្រេងកូឡា ថៃ មួយកន្លែង​ ក្រោយរកឃើញសារធាតុពុលនាំឲ្យខូចសួត

រដ្ឋបាលចំណីអាហារ និងឱសថ (FDA) ក្នុងប្រទេសថៃ នាថ្ងៃទី ៣០ ខែតុលា បានសហការជាមួយនាយកដ្ឋានប៉ូលិសការពារអ្នកប្រើប្រាស់ (CPPD) និងការិយាល័យសុខភាពសាធារណៈខេត្តសាមុតសាខន បានធ្វើការឆ្មក់ចូលនៅទីតាំងលួចផលិតប្រេងកូឡានិងបំពង់ហឺត Hong Thai និងផ្ទុកខុសច្បាប់ចំនួន៤ ដោយរឹបអូសផលិតផលឱសថចំនួន៩ប្រភេទ មានចំនួនសរុប ២លានដប ដែលមានតម្លៃប៉ាន់ស្មានលើសពី ១២០ លានបាត (ជិត៤លានដុល្លារ) ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការឆ្មក់ចូលនេះ បានកើតឡើងបន្ទាប់ពីការរកឃើញនៅក្នុងមន្ទីរពិសោធន៍ថា ប្រេងកូឡាក្រោមយីហោ Hong Thai បានផ្ទុកនូវសារធាតុបំពុល ដោយអតិសុខុមប្រាណអាចបង្កគ្រោះថ្នាក់ខ្លាំងដល់សុខភាព។ ក្នុងនោះដែរ មន្ត្រីនៃនាយកដ្ឋានវិទ្យាសាស្ត្រវេជ្ជសាស្ត្របានព្រមានថា ការស្រូបចូលផលិតផលដែលមានមេរោគ អាចបណ្តាលឲ្យមានការឆ្លងមេរោគទងសួត ឬខូចខាតសួត។

ផ្អែកតាមការស៊ើបអង្កេតរបស់ប៉ូលិសបានបង្ហាញថា ទោះបីជាក្រុមហ៊ុននេះទទួលបានអាជ្ញាប័ណ្ណផលិតសម្រាប់រោងចក្រមួយដែលមានទីតាំងនៅ Bang Phai នៃទីក្រុងបាងកកក៏ដោយ ក៏វាបានផលិតផលិតដោយសម្ងាត់នៅកន្លែងផ្សេងទៀតដោយគ្មានការយល់ព្រមពី FDA ដែលនោះគឺជាការរំលោភយ៉ាងធ្ងន់ធ្ងរលើច្បាប់សុខភាពសាធារណៈ។

លោកស្រី Supatra Boonserm អគ្គលេខាធិការ FDA ​​បានសង្កត់ធ្ងន់ថា សហគ្រិនត្រូវតែគោរពច្បាប់យ៉ាងតឹងរ៉ឹង ដោយព្រមានថា ការផលិត ឬលក់ឱសថបុរាណក្លែងក្លាយ នឹងត្រូវផ្តន្ទាទោសដាក់ពន្ធនាគារអតិបរមា១០ឆ្នាំ ពិន័យជាប្រាក់រហូតដល់មួយលានបាត ឬទាំងពីរ។

លោកស្រីបានបន្ថែមថា FDA នឹងចាប់ផ្តើមការប្រមូលផលិតផលឱសថក្លែងក្លាយ ឬមិនមានសុវត្ថិភាពទាំងអស់ដែលជាប់ពាក់ព័ន្ធនឹងករណីនេះជាបន្ទាន់។ គំរូត្រូវបានបញ្ជូនទៅនាយកដ្ឋានវិទ្យាសាស្ត្រវេជ្ជសាស្ត្រសម្រាប់ការវិភាគបន្ថែម ហើយលទ្ធផលនឹងត្រូវប្រកាសជាសាធារណៈក្នុងពេលឆាប់ៗនេះ។

លោកស្រី Supatra បានមានប្រសាសន៍ថា ប្រេងកូឡាផ្សំពីឱសថបុរាណ Hong Thai ដែលមានមេរោគ ត្រូវបានរកឃើញនៅកន្លែងផលិតទាំងបួនដែលគ្មានការអនុញ្ញាតនេះមានរូបមន្ត និងគំរូផលិតកម្មផ្សេងៗគ្នា។ ផលិតផលដែលផលិតនៅកន្លែងខុសច្បាប់បែបនេះមិនអាចធានាសុវត្ថិភាព ឬគុណភាពបានទេ ហើយអាចមានសារធាតុគ្រោះថ្នាក់បង្កដល់សុខភាព៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ថៃ រកឃើញសារធាតុពុលដាក់ក្នុងប្រេងកូឡា អាចឲ្យខូចសួត និងប្រព័ន្ធផ្លូវដង្ហើម