ត្រាំ​​ព្រមាន​ម៉ាឌូរ៉ូ​ឲ្យ​រាប់​ថ្ងៃ​ថយ​ក្រោយ ខណៈអាមេរិកពង្រីកវត្តមានយោធានៅ​ការ៉ាប៊ីន

ប្រធានាធិបតី​អាមេរិក លោក ដូណាល់ ត្រាំ បានព្រមានមេដឹកនាំវ៉េណេស៊ុយអេឡា លោក នីកូឡាស ម៉ាឌូរ៉ូ ឲ្យ​រាប់​ថ្ងៃ​ថយ​ក្រោយ ខណៈដែលសហរដ្ឋអាមេរិក​អនុវត្ត​ការកសាងយោធាដ៏ធំបំផុតរបស់ខ្លួនមិន​ធ្លាប់​មាន​​នៅតំបន់ការ៉ាប៊ីន​ក្នុងរយៈពេលជាង​៣៥ឆ្នាំ​។

យោង​តាម​ការ​ចុះ​ផ្សាយ​របស់​ New York Post នា​ថ្ងៃ​ទី​៤​ខែ​វិច្ឆិកា​ឆ្នាំ​២០២៥ លោក​ត្រាំបានចោទប្រកាន់របបរបស់លោក​ម៉ាឌូរ៉ូ ពីការ​នាំ​គ្រឿងញៀន ឧក្រិដ្ឋជន និងអ្នកជំងឺវិកលចរិក​យ៉ាង​ច្រើន​សន្ធឹក​សន្ធាប់​ចូល​ទឹក​ដី​អាមេរិក ដោយនិយាយថា «ពួកគេបានបោះចោលមនុស្សរាប់សែននាក់ចូលទៅក្នុងប្រទេសរបស់យើង ដែលយើងមិនចង់បាន – មនុស្ស​មក​ពីពន្ធនាគារ និងមណ្ឌល​ផ្លូវចិត្ត»។

វត្តមាន​អាមេរិក​នៅ​ការ៉ាប៊ីន​រួមមាន នាវាផ្ទុកយន្តហោះUSS Gerald R. Ford នាវាមុជទឹកនុយក្លេអ៊ែរ និងនាវាពិឃាតមីស៊ីល។ មន្ទីរបញ្ចកោណបាន​លើក​ឡើង​ថា នាវាចម្បាំងចំនួន​១៤​គ្រឿង និងកងទ័ពជាង ១០ ០០០​នាក់ នឹងស្ថិតនៅក្នុងតំបន់ឆាប់ៗនេះ ដែលគាំទ្រដោយ​យន្តហោះចម្បាំង F-35 និងយន្តហោះចាក់​​ប្រេង​ដែលមានមូលដ្ឋាននៅ​ប្រទេស​​ព័រតូរីកូ។

លោកត្រាំ មិន​បាន​បញ្ជាក់ថាតើការវាយប្រហារតាមអាកាសលើវ៉េណេស៊ុយអេឡាត្រូវបានគ្រោងទុក​ឬ​ក៏​អត់ ប៉ុន្តែបានចង្អុលបង្ហាញថា សម្ពាធអាចនាំមកនូវការផ្លាស់ប្តូររបបដោយគ្មានសង្គ្រាម។

លោក​ម៉ាឌូរ៉ូ ដែលកាន់អំណាចតាំងពីឆ្នាំ​២០១៣ នៅតែរឹងរូស ទោះបីជាមានការដាក់ទណ្ឌកម្មអន្តរជាតិ និងការចោទប្រកាន់ពីការក្លែងបន្លំការបោះឆ្នោតក៏ដោយ។ មេបក្សប្រឆាំង​វ៉េណេស៊ុយអេឡាលោកស្រី María Corina Machado ដែល​ទើប​ទទួល​បាន​ពាន​រង្វាន់​ណូបែល​សន្តិភាព​កាល​ពី​ពេល​ថ្មីៗ​នេះ បាននិយាយថា ជននិរទេសវ៉េណេស៊ុយអេឡារាប់លាននាក់នឹងត្រឡប់ទៅផ្ទះវិញ ប្រសិនបើ​លោក​ម៉ាឌូរ៉ូ​ត្រូវបានដកចេញ៕

ដោយ៖​ ឈាង