រុស្ស៊ី​ ហាមឃាត់​ជនជាតិ​ជប៉ុន​៣០នាក់​ ជា​ការ​ឆ្លើយតបនឹង​ទណ្ឌកម្ម​របស់ជប៉ុនដាក់មកលើខ្លួន

យោងតាមការចេញផ្សាយរបស់ទីភ្នាក់ងារព័ត៌មាន Reuters រុស្ស៊ីបានប្រកាសនៅថ្ងៃអង្គារ ថ្ងៃទី១១ ខែវិច្ឆិកានេះថា ខ្លួនបានហាមឃាត់ពលរដ្ឋជប៉ុនចំនួន ៣០នាក់ មិនឲ្យចូលប្រទេសខ្លួន រួមទាំងមន្ត្រីក្រសួងការបរទេសម្នាក់ផងដែរ ដើម្បីសងសឹកចំពោះទណ្ឌកម្មរបស់ជប៉ុនដែលទាក់ទងនឹងសង្គ្រាមរបស់ទីក្រុងមូស្គូនៅអ៊ុយក្រែន។

ក្រសួងការបរទេសរុស្ស៊ីបាននិយាយថា ការហាមឃាត់នេះ ផ្តោតលើអ្នកកាសែត អ្នកសិក្សា និងមន្ត្រីរដ្ឋាភិបាល ហើយនឹងនៅតែមានសុពលភាពជារៀងរហូត។ ក្នុងចំណោមអ្នកមានឈ្មោះក្នុងបញ្ជីហាមឃាត់ក៏មានលោក Toshihiro Kitamura មន្ត្រីសារព័ត៌មានមកពីក្រសួងការបរទេសជប៉ុនផងដែរ។

គួរបញ្ជាក់ថាទីក្រុងតូក្យូបានដាក់ទណ្ឌកម្មថ្មីនៅក្នុងខែកញ្ញាប្រឆាំងនឹងក្រុមហ៊ុន បុគ្គល និងអង្គភាពរបស់រុស្ស៊ី ខណៈពេលដែលជប៉ុនក៏បានបន្ថយតម្លៃប្រេងឆៅរបស់រុស្ស៊ីស្របតាមសម្ព័ន្ធមិត្តលោកខាងលិចដែរ។ ដោយសារតែទង្វើនេះ ទីក្រុងមូស្គូបាននិយាយថា ការសម្រេចចិត្តរបស់ជប៉ុនឆ្លុះបញ្ចាំងពីជំហរ «អរិភាព» របស់ជប៉ុន ខណៈដែលទំនាក់ទំនងរវាងប្រទេសទាំងពីរបន្តធ្លាក់ចុះដោយសារជម្លោះនៅអ៊ុយក្រែន៕

អត្ថបទ៖ ប៊ុន សុភាព