ទេសចរអាល្លឺម៉ង់ម្នាក់ ត្រូវគេបោកឲ្យទិញប្រេងដូងតម្លៃជាង៤ពាន់ដុល្លារនៅប៉ាតាយ៉ា

យោងតាមការចេញផ្សាយរបស់សារព័ត៌មាន Khaosod នៅថ្ងៃទី ១៣ ខែ វិច្ឆិកា ទេសចរអាល្លឺម៉ង់ម្នាក់ត្រូវបានគេបោកប្រាស់អស់ប្រាក់ ៤០០០ អឺរ៉ូ (ប្រហែល ១៤០០០០ បាតឬ ៤,៣២០ ដុល្លារអាមេរិក) បន្ទាប់ពីត្រូវបានគេបោកបញ្ឆោតឱ្យទិញប្រេងដូងនៅប៉ាតាយ៉ា ប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនរងគ្រោះមានឈ្មោះ Nadir Altaf អាយុ ៥២ ឆ្នាំ បាននិយាយថាមាន បុរសបរទេសម្នាក់ ដែលគេជឿថាមានដើមកំណើតមជ្ឈិមបូព៌ា បានមករកលោក ហើយបានព្យាយាមបញ្ចុះបញ្ជូលលោកឲ្យទិញប្រេងដូងដែលអះអាងថាជួយជំរុញការលូតលាស់សក់។ បុរសនោះបាននិយាយថា ប្រេងដូង ៥ដប តម្លៃ «៤០០០» ដែល Nadir គិតថា​ជា៤០០០បាត មិនមែន៤០០០អឺរ៉ូទេ។ បន្ទាប់ពីបង់ប្រាក់តាមកាត លោកបានរកឃើញថាលោក ត្រូវបានគេគិតប្រាក់ ៤០០០ អឺរ៉ូវិញ។

ក្រោយកើតហេតុ Nadir បានដាក់ពាក្យបណ្តឹងទៅប៉ូលិសក្រុងប៉ាតាយ៉ា។​ បើតាមប៉ូលិសនៅប៉ាតាយ៉ា ការបោកប្រាស់បែបនេះគឺជារឿងធម្មតានៅក្នុងតំបន់ទេសចរណ៍ ហើយជារឿយៗធ្វើឱ្យខូចកេរ្តិ៍ឈ្មោះរបស់ទីក្រុងនេះ។ ប៉ូលិសកំពុងធ្វើការដើម្បីកំណត់អត្តសញ្ញាណជនសង្ស័យ និងទាមទាររកប្រាក់របស់ជនរងគ្រោះមកវិញ។

គួរបញ្ជាក់ថាករណីនេះបង្ហាញពីបញ្ហាដែលកំពុងកើនឡើងនៅក្នុងទីក្រុងប៉ាតាយ៉ា ជាកន្លែងដែលអ្នកទេសចរតែងតែក្លាយជាជនរងគ្រោះនៃការបោកប្រាស់ រួមទាំងការកក់សណ្ឋាគារក្លែងក្លាយដែលបានធ្វើឱ្យភ្ញៀវទេសចរខាតបង់ប្រាក់រាប់រយរាប់ពាន់បាត។ ក្នុងករណីខ្លះ អ្នកលក់ផលិតផលសម្រកទម្ងន់ ឬផលិតផលបណ្ដុះសក់ បោកប្រាស់ទេសចរដោយការបង្ខំឱ្យទិញទំនិញ និងការលួចលូកចូលហោប៉ៅនៅក្នុងតំបន់ទេសចរណ៍ដ៏មមាញឹក។

ទោះបីអាជ្ញាធរមូលដ្ឋានថៃ បានធ្វើការចាប់ខ្លួនក្នុងករណីស្រដៀងគ្នានេះជាច្រើនមកហើយក្ដី ប៉ុន្តែប៉ូលិសនៅតែព្រមានថា ការបោកប្រាស់បែបនេះនៅតែបន្តកើតមាន។ អ្នកទេសចរទៅលេងប៉ាតាយ៉ា ត្រូវបានណែនាំឱ្យបញ្ជាក់តម្លៃ ផ្ទៀងផ្ទាត់ការកក់ទុកតាមរយៈប្រភពដែលអាចទុកចិត្តបាន និងប្រុងប្រយ័ត្នចំពោះការផ្តល់ជូនដែលហាក់ដូចជាល្អពេកមិនគួរឱ្យជឿ ជាពិសេសនៅក្នុងតំបន់ទេសចរណ៍ដែលមានមនុស្សច្រើន ឬពេញនិយម៕

អត្ថបទ៖ ប៊ុន សុភាព