ព័ត៌មានអន្ដរជាតិ

ក្រោយជោគជ័យក្នុងជម្លោះ ថៃ-កម្ពុជា លោក អាន់វ៉ា បង្ហាញក្តីរីករាយទៅចូលរួមប្រជុំ G-20 ក្នុងនាមប្រធានអាស៊ាន

បានផុស

៥ ខែ មុន

នៅ

ថ្ងៃអង្គារ ១៨ វិច្ឆិកា ២០២៥

ដោយ

បន្ទាប់ពីសម្របសម្រួលដោយជោគជ័យក្នុងជម្លោះព្រំដែនរវាងថៃនិងកម្ពុជា ដោយមានការគាំទ្រផ្នែកនយោបាយ និងសម្ពាធសេដ្ឋកិច្ចពីប្រធានាធិបតីសហរដ្ឋអាមេរិក លោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី បានដឹកនាំគណៈប្រតិភូម៉ាឡេស៊ី ទៅចូលរួមប្រជុំកំពូល G-20 នៅអាហ្វ្រិកខាងត្បូង ក្នុងនាមជាប្រធានអាស៊ាន។

ក្នុងនាមប្រធានប្តូរវេននៃសមាគមអាស៊ាន លោក អាន់វ៉ា អ៊ីប្រាហ៊ីម ត្រូវបានគេមើលឃើញថា ជាតួអង្គដ៏សំខាន់ក្នុងការសម្របសម្រួលបញ្ចប់ជម្លោះរវាងប្រទេសថៃនិងកម្ពុជា ចាប់តាំងពីថ្ងៃផ្ទុះអាវុធនៅថ្ងៃទី២៤ខែកក្កដា ដោយមានការជ្រុមជ្រែងដាក់សម្ពាធដល់ភាគីជម្លោះពីប្រធានាធិបតីសហរដ្ឋអាមេរិក លោក ដូណាល់ ត្រាំ ធ្វើឲ្យលោកបានប្រឹងប្រែងសម្របសម្រួលឲ្យមានបទឈប់បាញ់ ដែលបានចុះហត្ថលេខានៅថ្ងៃទី២៨ខែកក្កដា។

នៅក្នុងអំឡុងពេលនៃការអនុវត្តបទឈប់បាញ់ លោក អាន់វ៉ា ត្រូវបានគេមើលឃើញថា ជាអ្នកតាមដានដ៏ស្អិតលើការអនុវត្តបទឈប់បាញ់ដែលមានភាពផុយស្រួយបំផុត រហូតដល់ការចរចាឈានទៅកំណត់ពេលវេលាចុះកិច្ចព្រមព្រៀងសន្តិភាព នៅថ្ងៃទី២៦ខែតុលាឆ្នាំ២០២៥ ដែលជាការឆ្លើយតបទៅនឹងការចង់បានរបស់រដ្ឋបាលសហរដ្ឋអាមេរិក ដឹកនាំដោយប្រធានាធិបតី ដូណាល់ ត្រាំ ដែលត្រូវបានគេប្រសិទ្ធនាមថា «ប្រធានាធិបតីសន្តិភាព»។

ក្នុងការចេញដំណើរទៅកាន់អាហ្វ្រិកខាងត្បូងនៅថ្ងៃទី១៨ខែវិច្ឆិកានេះ លោក អាន់វ៉ា បានដឹកនាំគណៈប្រតិភូម៉ាឡេស៊ី ចាកចេញទៅមុន ដោយបំណងឈប់សំចតតាមផ្លូវដើម្បីរៀបចំជំនួបទ្វេភាគី មុនទៅដល់ទីក្រុង Johannesburg ប្រទេសអាហ្វ្រិកខាងត្បូង ជាទីដែលរៀបចំកិច្ចប្រជុំកំពូលនៃប្រទេសរីកលួតលាស់សេដ្ឋកិច្ច ហៅកាត់ថា G-20 នៅថ្ងៃទី២២និង២៣ខែវិច្ឆិកានេះ។

ក្នុងដំណើរទៅកាន់អាហ្វ្រិកខាងត្បូងនេះ ទីក្រុងដែលគណៈប្រតិភូដឹកនាំដោយ លោក អាន់វ៉ា នឹងត្រូវចុះសំចតនិងធ្វើសវនាការ គឺទីក្រុង Addis Ababa នៃសាធារណៈរដ្ឋប្រជាធិបតេយ្យសហព័ន្ធអេត្យូពី ដើម្បីរៀបចំជំនួបទ្វេភាគីជាមួយនាយករដ្ឋមន្ត្រី Abiy Ahmed Ali។ ក្រៅពីនោះ ក៏មានរៀបចំជំនួបជាមួយអ្នកដឹកនាំធុរកិច្ចនិងឧស្សាហកម្ម និងអ្នកដឹកនាំគណៈសាសនាអ៊ីស្លាមនៅទីនោះផងដែរ។

លោក ក៏នឹងជួបដាច់ដោយឡែក ជាមួយប្រធានាធិបតី អាហ្វ្រិកខាងត្បូង លោក Cyril Ramaphosa អំឡុងពេលនៃកិច្ចប្រជុំ G-20 នៅអាហ្វ្រិកខាងត្បូង ហើយ ក្រោយកិច្ចប្រជុំនោះចប់ លោក ក៏នឹងដឹកនាំគណៈប្រតិភូទៅកាន់ប្រទេសកែនយ៉ា ដើម្បីជួបពិភាក្សាជាមួយប្រធានាធិបតី William Ruto ដើម្បីពង្រឹងទំនាក់ទំនងទ្វេភាគី។

មុនពេលចេញដំណើរ លោកអាន់វ៉ា បានបង្ហោះសារលើបណ្តាញសង្គមថា៖«ម៉ាឡេស៊ីនឹងបន្តលើកតម្កើងសារៈសំខាន់ និងសំឡេងរបស់ប្រទេស ក្រៅពីស្វែងរកការពង្រឹងពហុភាគីនិយម ពង្រីកការវិនិយោគ និងឱកាសសេដ្ឋកិច្ច ព្រមទាំងពង្រឹងសិល្បៈការទូត និងទំនាក់ទំនងអន្តរជាតិរបស់ប្រទេស»។

លោក បានសរសេរចុងក្រោយថា៖«សូមបួងសួងសម្រាប់មិត្តទាំងអស់ សូមឲ្យកិច្ចការរបស់ខ្ញុំ និងគណៈប្រតិភូម៉ាឡេស៊ី ប្រព្រឹត្តទៅដោយរលូន និងនាំមកនូវផលប្រយោជន៏ល្អៗ និងបានវិលមកប្រទេសវិញ»៕

រ៉ាន់ រើយ