ព័ត៌មានអន្ដរជាតិ

ហ្វីលីពីនលុបចោលការហោះហើរក្នុងស្រុក ៧៨ជើង ក្រោយ Airbus ជូនដំណឹង

បានផុស

៧ ខែ មុន

នៅ

ថ្ងៃសៅរ៍ ២៩ វិច្ឆិកា ២០២៥

ដោយ

ក្រុមហ៊ុនអាកាសចរណ៍ហ្វីលីពីន (PAL) និង Cebu Pacific ដែលប្រើប្រាស់យន្តហោះរបស់ក្រុមហ៊ុនអឺរ៉ុប Airbus បានលុបចោលជើងហោះហើរសរុបចំនួន៧៨ភ្លាមៗ នៅថ្ងៃទី២៩ខែវិច្ឆិកា បន្ទាប់ពីមានការជូនដំណឹងអំពីបញ្ហាបច្ចេកវិទ្យាSoftware ដែលប៉ះពាល់ដល់ម៉ូដែលយន្តហោះប្រភេទ A320 និង A321 មួយចំនួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចេញផ្សាយរបស់បណ្តាញសារព័ត៌មានហ្វីលីពីន ក្រុមហ៊ុនអាកាសចរណ៍ PAL បានជូនដំណឹងដល់អ្នកដំណើរដែលរងផលប៉ះពាល់ថា ពួកគេអាចជ្រើសរើសយកជម្រើស៣ ក្នុងនោះ មានការកក់សំបុត្ធ្វើដំណើររបស់ពួកគេឡើងវិញ បំប្លែងតម្លៃសំបុត្រនោះទៅជាឥណទានធ្វើដំណើរ ឬស្នើសុំការបង្វិលសងវិញ។

នៅក្នុងការណែនាំដាច់ដោយឡែកមួយទៀត ក្រុមហ៊ុនអាកាសចរណ៍ Cebu Pacific បាននិយាយថា ប្រតិបត្តិការ និងក្រុមវិស្វកម្មរបស់ខ្លួនកំពុងធ្វើការដោយព្យាយាម ដើម្បីបញ្ចប់ការធ្វើបច្ចុប្បន្នភាព (អាប់ដេត)កម្មវិធីចាំបាច់ និងណែនាំអ្នកធ្វើដំណើរឱ្យពិនិត្យមើលស្ថានភាពជើងហោះហើរតាមរយៈគេហទំព័ររបស់ខ្លួន មុនពេលទៅអាកាសយានដ្ឋាន។

ក្រុមហ៊ុន Cebu Pacific ក៏បានប្រកាសថា ខ្លួនកំពុងផ្តល់ការកក់ឡើងវិញដោយឥតគិតថ្លៃ និងការផ្លាស់ប្តូរមូលនិធិធ្វើដំណើរសម្រាប់អ្នកដំណើរដែលរងផលប៉ះពាល់ដែលគ្រោងនឹងហោះហើររវាងថ្ងៃទី ២៩ខែវិច្ឆិកាដល់ថ្ងៃទី ១ខែធ្នូ។

ក្រុមហ៊ុន Airbus បានចេញការជូនដំណឹងជាបន្ទាន់មួយ ដែលប៉ះពាល់ដល់យន្តហោះគ្រួសារ A320 រហូតដល់ទៅ ៦០០០ គ្រឿងនៅជុំវិញពិភពលោក បន្ទាប់ពីមានបញ្ហាបច្ចេកទេសក្នុងខែតុលា ដែលពាក់ព័ន្ធនឹងជើងហោះហើរ JetBlue។

ក្រុមហ៊ុនផលិតយន្តហោះអ៊ឺរ៉ុបបានណែនាំប្រតិបត្តិករឱ្យអនុវត្ត «វិធានការប្រុងប្រយ័ត្នជាបន្ទាន់» បន្ទាប់ពីការពិនិត្យឃើញថា វិទ្យុសកម្មព្រះអាទិត្យខ្លាំងអាចខូចទិន្នន័យគ្រប់គ្រងការហោះហើរ។

កម្មវិធីដែលជាចំណុចកណ្តាលនៃបញ្ហាគឺ Elevator និង Aileron Computer ទាមទារការអាប់ដេតដែលអាចចំណាយពេលច្រើនម៉ោងសម្រាប់យន្តហោះភាគច្រើន ទោះបីជាយន្តហោះរហូតដល់ ១០០០គ្រឿងអាចត្រូវការពេលជាច្រើនសប្តាហ៍ដើម្បីជួសជុល៕

រ៉ាន់ រើយ