លោក ណេតាន់យ៉ាហ៊ូ ស្នើសុំលើកលែងទោសពីប្រធានាធិបតី អ៊ីស្រាអែល

នាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ ដែលប្រឈមមុខនឹងសំណុំរឿងពុករលួយយូរអង្វែង បានដាក់សំណើសុំការលើកលែងទោសជាផ្លូវការទៅកាន់ប្រធានាធិបតីលោក Isaac Herzog (អាយស៊ីក ហឺហ្សូក) នេះបើយោងតាមការលើកឡើងរបស់ប្រមុខរដ្ឋនៅថ្ងៃទី១ ខែធ្នូ ឆ្នាំ២០២៥ និងចុះផ្សាយដោយសារព័ត៌មាន RT ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការិយាល័យរបស់លោក Herzog បាននិយាយនៅក្នុងសេចក្តីថ្លែងការណ៍មួយថា ខ្លួនបានទទួលលិខិតមួយច្បាប់ពីលោកណេតាន់យ៉ាហ៊ូ និងឯកសារដ៏ធំមួយដែលមានចំនួន១១១ ទំព័រពីមេធាវីរបស់លោក គឺ Amit Hadad (អាមីត ហាដាដ)។ការិយាល័យប្រធានាធិបតីក៏ដឹងទៀតថា នេះគឺជាសំណើមិនធម្មតាមួយ ដែលមានផលវិបាកយ៉ាងសំខាន់ៗ។

យ៉ាងណា ប្រធានាធិបតីបានជជែកវែកញែកនៅក្នុងសំណើនេះថា «ការយល់ព្រមលើសំណើនេះនឹងអនុញ្ញាតឲ្យនាយករដ្ឋមន្ត្រីលះបង់ពេលវេលា សមត្ថភាព និងថាមពលទាំងអស់របស់លោក ដើម្បីជំរុញប្រទេសអ៊ីស្រាអែលនៅក្នុងគ្រាលំបាកទាំងនេះ និងដើម្បីដោះស្រាយបញ្ហាប្រឈម និងឱកាសដែលនៅចំពោះមុខ»។

ការិយាល័យបានបន្ថែមទៀតថា បន្ទាប់ពីទទួលបានយោបល់ពាក់ព័ន្ធទាំងអស់ ប្រធានាធិបតីនឹងពិចារណាលើសំណើនេះដោយការទទួលខុសត្រូវ និងដោយស្មោះសរបំផុត។ សំណើនេះទៀតសោត នឹងត្រូវបានពិនិត្យដោយនាយកដ្ឋានច្បាប់នៃប្រធានាធិបតី ខណៈដែលនាយកដ្ឋានលើកលែងទោសរបស់ក្រសួងយុត្តិធម៌ នឹងប្រមូលយោបល់ពីអាជ្ញាធរពាក់ព័ន្ធទាំងអស់នៅក្នុងក្រសួង។

ដោយឡែក មេធាវីរបស់លោកណេតាន់យ៉ាហ៊ូ បានណែនាំបន្ថែមថា ការលើកលែងទោសដល់នាយករដ្ឋមន្ត្រី នឹងជួយ ជួសជុលជម្លោះរវាងវិស័យផ្សេងៗនៃសាធារណជន ក៏ដូចជារួមចំណែកដល់ការពង្រឹងភាពធន់ជាតិរបស់ប្រទេស។

ជាក់ស្ដែង សូម្បីតែប្រធានាធិបតីអាមេរិក ដូណាល់ ត្រាំ បានសរសេរទៅកាន់លោក Herzog កាលពីដើមខែនេះដោយស្នើសុំឲ្យលោកលើកលែងទោសដល់លោកណេតាន់យ៉ាហ៊ូ ដោយបដិសេធម្តងហើយម្តងទៀតចំពោះទង្វើខុសឆ្គងនៅក្នុងសំណុំរឿងតុលាការដែលកំពុងដំណើរការ។

សូមបញ្ចាក់ថា នាយករដ្ឋមន្ត្រីវ័យ៧៦ឆ្នាំ ត្រូវបានរំខានដោយការចោទប្រកាន់ពីបទពុករលួយអស់រយៈពេលជិតមួយទសវត្សរ៍មកហើយ។ លោកត្រូវបានចោទប្រកាន់ពីបទសូកប៉ាន់ ការក្លែងបន្លំ និងការរំលោភលើទំនុកចិត្តកាលពីឆ្នាំ ២០១៩ ប៉ុន្តែការកាត់ក្តីនៅតែមិនទាន់បញ្ចប់នៅឡើយទេ។ ក្រុមអ្នករិះគន់បានចោទប្រកាន់លោកណេតាន់យ៉ាហ៊ូថា បានពន្យារពេលជម្លោះជាមួយប្រទេសជិតខាងអ៊ីស្រាអែលដោយចេតនា ដើម្បីការពារខ្លួនពីដំណើរការផ្លូវច្បាប់ និងកាន់អំណាច៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

លោកត្រាំ នឹងប្រគល់ទឹកដីដែលអ៊ុយក្រែន កាន់កាប់ ឲ្យពូទីន