យោធាមីយ៉ាន់ម៉ាដោះលែងអ្នក ទោស ជាង ២៣,០០០ នាក់ តែគ្មានសកម្មជនដែលចាប់ខ្លួន អំឡុងរដ្ឋប្រហារ ១ កុម្ភៈ នោះទេ

យោធារបស់មីយ៉ាន់ម៉ានៅថ្ងៃសៅរ៍នេះបានប្រកាសថា បានលើកលែងទោស និងដោះលែងអ្នកទោសជាង ២៣,០០០ នាក់ដើម្បីប្រារព្ធពិធីឈប់សម្រាកបុណ្យចូលឆ្នាំថ្មី ប៉ុន្តែមិនទាន់ច្បាស់ទេថាតើពួកគេទាំងនោះមានសកម្មជនដែលត្រូវបានចាប់ឃុំខ្លួន ដោយសាររដ្ឋប្រហារខែកុម្ភៈ ឬក៏យ៉ាងណានោះ ។

ការដោះលែងនេះត្រូវបានប្រកាសនៅលើកញ្ចក់ទូរទស្សន៍រដ្ឋ MRTV ដែលបាននិយាយថា មេដឹកនាំយោធាលោកឧត្តមសេនីយ Min Aung Hlaing បានលើកលែងទោសដល់អ្នកទោស ២៣,០៤៧ នាក់រួមទាំងជនបរទេស ១៣៧ នាក់ដែលនឹងត្រូវនិរទេសចេញពីប្រទេសមីយ៉ាន់ម៉ា ខណៈលោកក៏បានកាត់បន្ថយទោសចំពោះអ្នកដទៃផងដែរ ។

ការដោះលែងអ្នកទោសបែបនេះគឺជាទម្លាប់ក្នុងពិធីបុណ្យសំខាន់ៗនៅក្នុងប្រទេស ប៉ុន្តែនេះជាលើកទី ២ ហើយដែលរបបយោធាដែលកំពុងកាន់អំណាចបានធ្វើដូច្នេះ ចាប់តាំងពីបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី បង្កឲ្យមានការតវ៉ាជារៀងរាល់ថ្ងៃ ការចាប់ខ្លួន និងសម្លាប់ដោយកងកម្លាំងសន្តិសុខ ។

យោងតាមសមាគមជំនួយសម្រាប់អ្នកទោសនយោបាយ (AAPP) ដែលឃ្លាំមើលការស្លាប់ និងការចាប់ខ្លួនបានឲ្យដឹងថា កងកម្លាំងរដ្ឋាភិបាលបានសម្លាប់អ្នកតវ៉ា និងអ្នកឈរក្បែរយ៉ាងហោចណាស់ចំនួន ៧២៦ នាក់ចាប់តាំងពីការកាន់កាប់អំណាច ។ ក្រុមនេះនិយាយថា មនុស្ស ២,៧២៨ នាក់រួមទាំងលោកស្រី អ៊ុងសាន ស៊ូជី កំពុងជាប់ឃុំ ។

គួររំឭកថា យោធាមីយ៉ាន់ម៉ាក៏ធ្លាប់បានដោះលែងអ្នកទោសជាង ២៣,០០០ នាក់ផងដែរដើម្បីប្រារព្ធទិវាឯករាជ្យនៅថ្ងៃទី ១២ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ បាញ់សម្លាប់បាតុករហើយ យោធាមីយ៉ាន់ម៉ា ទារប្រាក់៨៥ដុល្លារពីសាច់ញាតិទៀត បើចង់យកសពទៅផ្ទះ

ចុចអាន ៖ លោកស្រី អ៊ុងសាន ស៊ូជី រងការចោទប្រកាន់បទឧក្រិដ្ឋថ្មីមួយទៀត សរុបឡើងដល់ ៦ ករណី