ជប៉ុន ព្រមានពីការរញ្ជួយដីថ្មីទៀត ខណៈអ្នករបួសកើនដល់ ៣០នាក់

ប្រទេសជប៉ុន​ បានព្រមានពីគ្រោះរញ្ជួយដីថ្មីទៀតនៅប៉ុន្មានថ្ងៃខាងមុខ ខណៈរញ្ជួយដីកម្រិត៧.៦រ៉ិចទ័រ វាយប្រហារភាគឦសានកាលពីរាត្រីថ្ងៃចន្ទទី៨ខែធ្នូឆ្នាំ២០២៥ ​បណ្តាលឲ្យមនុស្ស៣០នាក់រងរបួស ​និងឈានដល់ការទាញសញ្ញាព្រមានរលកយក្សស៊ូណាមិទៀតផង ប៉ុន្តែក្រោយមកក៏ដកចេញវិញ ដ្បិតមនុស្សជិត ១ ០០០ ០០០នាក់ ត្រូវជម្លៀស។ 

តាមការផ្សាយរបស់ The Star, នាយករដ្ឋមន្ត្រីជប៉ុនលោកស្រី Sanae Takaichi បានបញ្ជាក់ពីការរបួសមនុស្សមនុស្ស៣០នាក់ ក្នុងគ្រោះរញ្ជួយដីដែលវាយប្រហារតំបន់ Aomori នាវេលាម៉ោង១១:១៥នាទីយប់ ជាមួយជម្រៅ ៥០គីឡូម៉ែត្រ។

តាមការបញ្ជាក់ពីភ្នាក់ងារគ្រប់គ្រងគ្រោះមហន្តរាយនិងអគ្គិភ័យ, ក្នុងចំណោមអ្នករបួស គឺមានមនុស្សម្នាក់របួសធ្ងន់នៅកោះ Hokkaido។

ក្រៅមនុស្សរបួស គ្រោះរញ្ជួយដីនេះក៏បណ្តាលឲ្យអគារមួយចំនួនខូចខាត បំផ្លាញផ្លូវថ្នល់ កាត់ផ្តាច់អគ្គិសនីទៅកាន់តំបន់ជាច្រើន និងបង្កជាអគ្គិភ័យឆាបឆេះផ្ទះសម្បែងផងដែរ។

សូមជម្រាបជាថ្មី ជប៉ុនតែងជួបគ្រោះរញ្ជួយដី ព្រោះតែកត្តាភូមិសាស្រ្តរបស់ប្រទេសនេះ ស្ថិតនៅលើតំបន់ដែលគេហៅថា ខ្សែក្រវាត់ភ្នំភ្លើង «Ring of Fire»។

គ្រោះរញ្ជួយដីដ៏មហន្តរាយគឺកើតឡើងក្នុងឆ្នាំ២០១១ ដែលកាលនោះរញ្ជួយដីកម្រិត ៩.០ រ៉ិចទ័របានបង្កឲ្យមានរលកយក្សស៊ូណាមិ បណ្តាលឲ្យមនុស្ស ១៨ ៥០០នាក់ ស្លាប់ឬបាត់ខ្លួន ព្រមទាំងធ្វើឲ្យមានការរលាយដ៏សាហាវនៅរោងចក្រថាមពលនុយក្លេអ៊ែរ Fukushima៕

អត្ថបទ៖ សុខ សុវណ្ណ