ព័ត៌មានអន្ដរជាតិ

មេបក្សប្រឆាំងថៃដែលសង្ឃឹមឈ្នះឆ្នោត បារម្ភថា ថៃជាប់ឈ្មោះជា«ប្រទេសឈ្លានពានគេ»

បានផុស

៧ ខែ មុន

នៅ

ថ្ងៃព្រហស្បតិ៍ ១១ ធ្នូ ២០២៥

ដោយ

នាយករដ្ឋមន្ត្រីខ្សត់អំណាចរបស់ប្រទេសថៃ លោក អានុទីន ឆានវីរៈគុល កំពុងស្ថិតក្រោមសម្ពាធនយោបាយដ៏ខ្លាំង និង កំពុងរងការចោទថា បានដឹកនាំប្រទេសទៅរកភាពមហន្តរាយ ដោយការបង្កើតសត្រូវមិនត្រឹមតែជាមួយប្រទេសជិតខាង មានកម្ពុជាប៉ុណ្ណោះទេ ប៉ុន្តែជាមួយមហាអំណាច មានសហរដ្ឋអាមេរិកដែលជាសម្ព័ន្ធមិត្តយូរអង្វែងនៅក្នុងតំបន់។

លោក Natthapong Ruengpanyawut មេដឹកនាំគណបក្សប្រឆាំង ដ៏មានឥទ្ធិពល។ FB

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អានុទីន ដែលគេដឹងថា មានទំនោរនយោបាយលម្អៀងទៅរកក្រុមយោធានិយមថៃ និង របបរាជានិយមដែលក្តោបក្តាប់សិទ្ធិអំណាចលើក្រុមយោធា បាននិយាយដោយខ្វះការពិចារណា ជុំវិញការបើកការវាយប្រហារមកលើប្រទេសកម្ពុជា និង បានព្រមានសហរដ្ឋអាមេរិកមិនឲ្យដាក់គំនាបលើខ្លួនសម្រាប់ការចរចាលើកក្រោយ។

តាមការចុះផ្សាយរបស់បណ្តាញសារព័ត៌មាននានារបស់ថៃ លោក អានុទីន បានលើកឡើងថា ការចរចាជាមួយកម្ពុជាលើកក្រោយ គឺត្រូវតែអនុវត្តតាមលក្ខខណ្ឌរបស់ថៃ «Thai Terms» ដោយមិនឲ្យភាគីទី៣ណាមកជ្រៀតជ្រៀកចូលកិច្ចការចរចាឡើយ។

ប៉ុន្តែសម្រាប់បក្សប្រឆាំដែលគាំទ្រលោក អានុទីន ឲ្យឡើងកាន់អំណាចត្រឹមរយៈពេល៤ខែដែលជិតផុតកំណត់វិញ បានមើលឃើញថា នាយករដ្ឋមន្ត្រី អានុទីន កំពុងរុញប្រទេសថៃទៅរកចំណុចគ្រោះថ្នាក់មិនត្រឹមតែគោលនយោបាយការបរទេសទេ សូម្បីតែតែវិស័យសេដ្ឋកិច្ចនឹងគ្រោះថ្នាក់ដូចគ្នា។

តាមសារព័ត៌មាន The Thai Enquirer លោក Natthapong Ruengpanyawut មេដឹកនាំគណបក្សប្រឆាំង ដ៏មានឥទ្ធិពល និងទំនងអាចដឹកនាំបក្សប្រឆាំងឈ្នះការបោះឆ្នោតក្នុងដើមឆ្នាំ២០២៦ បើសិនមានការបោះឆ្នោតដូចការគ្រោងទុកនោះ បានអំពាវនាវឱ្យរដ្ឋាភិបាលថៃរបស់លោក អានុទីន បញ្ចប់នូវភាពតានតឹងព្រំដែនដែលកំពុងបន្តជាមួយកម្ពុជា។

តាមការចុះផ្សាយនោះ លោក Natthapong បានលើកឡើងថា ប្រទេសថៃប្រឈមនឹងឈ្មោះ «ជាអ្នកឈ្លានពាន» ទោះបីជាសមត្ថភាពរបស់យោធាថៃអាចបំផ្លាញសមត្ថភាពយោធារបស់កម្ពុជា។

ចាប់ពីក្រោយការផ្ទុះអាវុធ នៅពេលដែលប្រជាជនពិភពលោកដឹងថា ថៃជាប្រទេសឈ្លានពាន នោះកិច្ចសហប្រតិបត្តិការនានាជាមួយបណ្តាប្រទេសនានា នឹងត្រូវរាំងស្ទះ ដោយសារតែការកែតម្រូវនិងសិក្សាឡើងវិញ។ កត្តានោះ នឹងធ្វើឲ្យសេដ្ឋកិច្ចកិច្ចថៃចាប់ផ្តើមដាំក្បាលចុះ និងរកប្រទេសជាតិមិត្តជិតស្និទ្ធមិនបាន ដោយសារតែសហរដ្ឋអាមេរិកដែលជាសម្ព័ន្ធមិត្តជិតស្និទ្ធក៏ថៃលែងស្តាប់ដែរ៕

រ៉ាន់ រើយ