ពូទីន បើកចំហការចរចាជាមួយលោក Macron ទាក់ទិននឹងសន្តិភាពជូន អ៊ុយក្រែន

ការិយាល័យប្រធានាធិបតីនៅទីក្រុងប៉ារីសបានចេញសេចក្ដីថ្លែងការមួយ កាលថ្ងៃអាទិត្យទី២១ធ្នូថា បារាំងបានកត់សម្គាល់ពីការបើកចំហរបស់រុស្ស៊ី ក្នុងការចរចាជាមួយប្រធានាធិបតីលោក Emmanuel Macron ហើយនឹងរកវិធីល្អបំផុត ដើម្បីនាំសន្តិភាពជូនអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះជាយ៉ាងណាក៏ដោយ ប្រធានាធិបតីបារាំងបានសង្កត់ធ្ងន់ថា ការពិភាក្សាណាមួយជាមួយទីក្រុងមូស្គូនឹងត្រូវធ្វើឡើង ដោយមានតម្លាភាពពេញលេញ ជាមួយប្រធានាធិបតីអ៊ុយក្រែន លោក វ៉ូឡូឌីមៀរ​ ហ្សេលេនស្គី និងសម្ព័ន្ធមិត្តអឺរ៉ុប ហើយគោលដៅរបស់ខ្លួននៅតែធានា សន្តិភាពរឹងមាំ និងយូរអង្វែងសម្រាប់អ៊ុយក្រែនជានិច្ច។

អ្នកនាំពាក្យវិមានក្រឹមឡាំង លោកឌីមីទ្រី ប៉េស្កូវ (Dmitry Peskov) បាននិយាយថា ប្រធានាធិបតីរុស្ស៊ី លោកវ្ល៉ាឌីមៀ ពូទីន បានត្រៀមខ្លួនរួចជាស្រេចដើម្បីធ្វើកិច្ចចរចាជាមួយលោក Macron ប្រសិនបើមានឆន្ទៈនយោបាយទៅវិញទៅមក នេះបើយោងតាមការកត់សម្គាល់ដែលបានចេញផ្សាយដោយទីភ្នាក់ងារសារព័ត៌មាន RIA កាលពីថ្ងៃទី២១។

លោក Macron កាលពីដើមសប្តាហ៍នេះ ក៏បានបញ្ចាក់ដោយជឿជាក់ថា អឺរ៉ុបគួរតែទាក់ទងលោកពូទីនម្តងទៀត ជាជាងទុកឲ្យសហរដ្ឋអាមេរិកនៅម្នាក់ឯង ដើម្បីដឹកនាំការចរចា ដើម្បីបញ្ចប់ជម្លោះនៅអ៊ុយក្រែន ដែលបានចាប់ផ្តើមជាមួយនឹងការឈ្លានពានទ្រង់ទ្រាយធំរបស់រុស្ស៊ីក្នុងឆ្នាំ ២០២២។

យ៉ាងណា សហរដ្ឋអាមេរិកកំពុងធ្វើជាម្ចាស់ផ្ទះនៃការចរចាបន្ថែមទៀត ដែលមានគោលបំណងបញ្ចប់ជម្លោះនៅចុងសប្តាហ៍នេះ នៅឯរដ្ឋផ្លរីដា។ ការចរចានេះត្រូវបានសម្របសម្រួលដោយលោក Steve Witkoff បេសកជនពិសេសរបស់សហរដ្ឋអាមេរិក និងលោក Jared Kushner កូនប្រសារបស់ប្រធានាធិបតី ដូណាល់ ត្រាំ ដោយមានបេសកជនអ៊ុយក្រែន និងអឺរ៉ុបនៅម្ខាង និងបេសកជនរុស្ស៊ី Kirill Dmitriev ដែលបានមកដល់កាលពីថ្ងៃសៅរ៍ នៅម្ខាងទៀត។

ដោយឡែក លោក ហ្សេលេនស្គី បាននិយាយថា ទីក្រុងវ៉ាស៊ីនតោនបានស្នើឡើងនូវទម្រង់ត្រីភាគី ដែលនឹងសម្គាល់ការចរចាទល់មុខគ្នាលើកដំបូងរបស់ទីក្រុងមូស្គូ និងទីក្រុងកៀវក្នុងរយៈពេលកន្លះឆ្នាំមកនេះ។ ប៉ុន្តែនៅថ្ងៃអាទិត្យម្សិលមិញនេះ វិមានក្រឹមឡាំងបែរជាដិសេធថា ការចរចាបីផ្លូវ រវាងអ៊ុយក្រែន រុស្ស៊ី និងសហរដ្ឋអាមេរិក កំពុងស្ថិតក្នុងស្ថានភាពមិនច្បាស់លាស់៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

លោក ហ្សេលេនស្គី គាំទ្រសំណើអាមេរិក ក្នុងការចរចាត្រីភាគីជាមួយ រុស្ស៊ី