លោកត្រាំ អបអរសាទរ បទឈប់បាញ់រវាង កម្ពុជានិងថៃ

ប្រធានាធិបតីអាមេរិក លោក ដូណាល់ ត្រាំ កាលពីថ្ងៃអាទិត្យទី ២៨ ខែធ្នូ បានចេញសារមួយរំលេចនូវការអបអរសាទរដល់មេដឹកនាំកម្ពុជា និងថៃ ចំពោះបទឈប់បាញ់ដែលបានព្រមព្រៀងគ្នាកាលពីថ្ងៃសៅរ៍ទី២៧ ខែធ្នូ ឆ្នាំ២០២៥ បន្ទាប់ពីការប៉ះទង្គិចគ្នាតាមព្រំដែនអស់រយៈពេលជាច្រើនសប្តាហ៍ ដោយសម្លាប់មនុស្សរាប់សិបនាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចេញផ្សាយដោយ CNA នៅក្នុងការបង្ហោះមួយនៅលើវេទិកា Truth Social លោកត្រាំបាននិយាយថា «ខ្ញុំសូមអបអរសាទរមេដឹកនាំដ៏អស្ចារ្យទាំងពីរចំពោះភាពវៃឆ្លាតរបស់ពួកគេ ក្នុងការឈានដល់ការបញ្ចប់យ៉ាងឆាប់រហ័ស និងយុត្តិធម៌នេះ»។ លោកបានហៅលទ្ធផលចុងក្រោយថា «រហ័ស និងម៉ឺងម៉ាត់ ដូចដែលស្ថានភាពទាំងអស់នេះគួរតែមាន!»។

ប្រធានាធិបតីអាមេរិកបញ្ចាក់បន្ថែមថា ទីក្រុងវ៉ាស៊ីនតោនបានចូលរួមក្នុងកិច្ចខិតខំប្រឹងប្រែងសម្របសម្រួលរួមជាមួយប្រទេសចិន និងម៉ាឡេស៊ី ដូច្នេះហើយ ពួកយើងពិតជាមានមោទនភាពក្នុងការជួយយ៉ាងខ្លាំង។

យ៉ាងណាមិញ នៅមុនពេលចរចាជាមួយប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី កាលពីថ្ងៃអាទិត្យ លោកត្រាំក៏មិនភ្លេចសរសើរតួនាទីដែលប្រកាសដោយខ្លួនឯងរបស់លោក ក្នុងការបញ្ចប់ជម្លោះពិភពលោក ដោយនិយាយថា «ប្រហែលជាសហរដ្ឋអាមេរិកបានក្លាយជាអង្គការសហប្រជាជាតិពិតប្រាកដ។ អង្គការសហប្រជាជាតិ ត្រូវតែចាប់ផ្តើមចូលរួមយ៉ាងសកម្ម និងចូលរួមក្នុងសន្តិភាពពិភពលោក!»។

ទន្ទឹមគ្នានោះ មុនពេលលោកត្រាំចេញសារអបអរ លោក Marco Rubio រដ្ឋមន្ត្រីការបរទេសអាមេរិក ក៏បានស្វាគមន៍ចំពោះបទឈប់បាញ់រវាងកម្ពុជានិងថៃ កាលពីថ្ងៃសៅរ៍ ដោយអំពាវនាវឲ្យភាគីទាំងពីរគោរពការប្តេជ្ញាចិត្តនេះភ្លាមៗ។

ដោយឡែក បន្ទាប់ពីបទឈប់បាញ់ អ្នកការទូតកំពូលរបស់ចិន លោក Wang Yi ដែលដើរតួជាម្ចាស់ផ្ទះទទួលរដ្ឋមន្ត្រីការបរទេសកម្ពុជា និងថៃសម្រាប់កិច្ចពិភាក្សារយៈពេលពីរថ្ងៃ កាលពីថ្ងៃអាទិត្យ បានថ្លែងប្រាប់ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ លោក ប្រាក់ សុខុន ថា បទឈប់បាញ់បានបើកដំណើរការនៃការកសាងសន្តិភាពឡើងវិញ។ ភាគីទាំងពីរគួរតែបន្តមួយជំហានម្តងៗ ដើម្បីលើកកម្ពស់បទឈប់បាញ់ដ៏ទូលំទូលាយ និងយូរអង្វែង ហើយកសាងទំនុកចិត្តគ្នាទៅវិញទៅមកឡើងវិញ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

លោក អាន់វ៉ា សាទរចំពោះបទឈប់បាញ់ រវាង កម្ពុជា-ថៃ ខណៈ៤ថ្ងៃទៀត បញ្ចប់​តួនាទី​​ជាប្រធានអាស៊ាន