Hegseth៖ ចិន-រុស្ស៊ី ​នឹង​«មិនហ៊ានសាកកម្លាំង» ឡើយ ក្រោយហេតុការណ៍នៅវ៉េណេស៊ុយអេឡា

រដ្ឋមន្ត្រីការពារជាតិ​អាមេរិក លោក Pete Hegseth បានមានប្រសាសន៍កាលពីថ្ងៃចន្ទ​ទី​៥​ខែ​មករា​ឆ្នាំ​២០២៦​ថា ទីក្រុងវ៉ាស៊ីនតោនកំពុងកសាងកម្លាំងយោធាឡើងវិញ​ឲ្យ​មានឥទ្ធិពលខ្លាំងក្លាបំផុត រហូតដល់ថ្នាក់​ប្រទេសចិន និងរុស្ស៊ី «មិនហ៊ាន» មកប្រកួតប្រជែងឡើយ ដោយលោកបានចង្អុលបង្ហាញពីប្រតិបត្តិការរបស់អាមេរិកនាពេលថ្មីៗនេះនៅវ៉េណេស៊ុយអេឡាថា ជាភស្តុតាងនៃអំណាចរារាំងជាថ្មីរបស់អាមេរិក។

យោង​តាម​​សារព័ត៌មាន SCMP លោក Hegseth បានលើកឡើងថា ការចាប់ខ្លួនមេដឹកនាំវ៉េណេស៊ុយអេឡា លោក នីកូឡាស ម៉ាឌូរ៉ូ បានបង្ហាញ​ឲ្យ​ឃើញពីសមត្ថភាព​មាន​កំណត់នៃប្រព័ន្ធយោធារបស់គូប្រជែង ហើយវាជាសញ្ញានៃការផ្លាស់ប្តូរ បន្ទាប់ពីរយៈពេលជាច្រើនឆ្នាំដែលគេមើលឃើញថាអាមេរិកមានភាពទន់ខ្សោយ។

លោក Hegseth បាននិយាយថា «យើងកំពុងបង្កើតឡើងវិញនូវអំណាចរារាំងដែលដាច់ខាត និងមិនអាចចោទសួរបាន រហូតដល់សត្រូវរបស់យើងនឹងមិនហ៊ានសាកល្បងជាមួយយើងឡើយ» ដោយលោកបានបន្ថែមថា រាល់មន្ទិលសង្ស័យអំពីការដឹកនាំរបស់អាមេរិកក្រោមរដ្ឋបាលមុនៗគឺ «បានបញ្ចប់ហើយ»។

លោក Hegseth បានកត់សម្គាល់ថា ប្រព័ន្ធការពារអាកាសរបស់វ៉េណេស៊ុយអេឡាពឹងផ្អែកយ៉ាងខ្លាំងលើប្រព័ន្ធដែលផលិតដោយរុស្ស៊ី រួមមានប្រភេទ S-300 និង Buk ហើយលោកបាន​បញ្ជាក់​ថា ការបរាជ័យនៃប្រព័ន្ធទាំងនោះក្នុងអំឡុងពេលនៃការឆ្មក់វាយប្រហាររបស់អាមេរិក បានបង្ហាញពីការត្រៀមខ្លួនប្រយុទ្ធជាថ្មីរបស់អាមេរិក។

ប្រតិបត្តិការនេះបានកើតឡើងខណៈដែលវ៉េណេស៊ុយអេឡាបានពង្រឹងទំនាក់ទំនងយ៉ាងស៊ីជម្រៅជាមួយចិន រុស្ស៊ី និងអ៊ីរ៉ង់ ដែលឯកអគ្គរដ្ឋទូតនៃប្រទេសទាំងនោះស្ថិតក្នុងចំណោមអ្នកដំបូងគេដែលបានចូលរួមអបអរសាទរប្រធានាធិបតីបណ្តោះអាសន្ន លោកស្រី Delcy Rodríguez បន្ទាប់ពីការស្បថចូលកាន់តំណែងរបស់លោកស្រី។

លោក Hegseth បាន​ប្រាប់​ទៀត​ថា អាមេរិកស្វែងរកទំនាក់ទំនងប្រកបដោយស្ថិរភាពជាមួយប្រទេសចិន ប៉ុន្តែបានត្រៀមខ្លួនរួចជាស្រេចសម្រាប់ជម្លោះនៅក្នុងអ្វីដែលលោកហៅថា «យុគសម័យថ្មីនៃការប្រកួតប្រជែងមហាអំណាច» ដោយប្តេជ្ញាថា អាមេរិកនឹងមានឧត្តមភាពនៅលើលំហសមុទ្រ និងការការពារផ្លូវនាវាចរណ៍សកល។

ស្ថានទូតចិនប្រចាំទីក្រុងវ៉ាស៊ីនតោន មិនទាន់មានការឆ្លើយតបភ្លាមៗចំពោះសំណើសុំអត្ថាធិប្បាយនៅឡើយទេ។

ការលើកឡើងនេះធ្វើឡើងខណៈដែលរដ្ឋបាលលោកត្រាំ កំពុងជំរុញឲ្យមានការរស់ឡើងវិញនូវការផលិតនាវារបស់អាមេរិក ដើម្បីទប់ទល់នឹងការពង្រីកកងទ័ពជើងទឹកយ៉ាងឆាប់រហ័សរបស់ចិន។ បច្ចុប្បន្ន ប្រទេសចិនផលិតនាវាពាណិជ្ជកម្មប្រហែលពាក់កណ្តាលនៃពិភពលោក ខណៈដែល​អាមេរិកបានផលិតនាវាត្រឹមតែ​៨គ្រឿងប៉ុណ្ណោះកាលពីឆ្នាំមុន។

លោក Hegseth បានបញ្ជាក់ថា កងនាវាអាមេរិកដែលធំជាងមុន និងទំនើបជាងមុន រួមទាំងនាវាចម្បាំង និងនាវាមុជទឹកថ្មីៗ នឹងផ្តល់នូវ «អំណាចរារាំងដែលមិនអាចប្រកែកបាន» និងធានានូវឧត្តមភាពជើងទឹកអាមេរិកសម្រាប់ជាច្រើនទសវត្សរ៍ខាងមុខ៕

ប្រែសម្រួល៖ ឈាង