វ៉េណេស៊ុយអេឡា ទម្លាយចំនួនអ្នកស្លាប់ក្នុងការវាយប្រហារ ដោយអាមេរិក

រដ្ឋមន្ត្រីក្រសួងមហាផ្ទៃវ៉េណេស៊ុយអេឡា លោក Diosdado Cabello បានប្រកាសកាលពីថ្ងៃពុធទី៧មករាថា មនុស្ស ១០០ នាក់បានស្លាប់និងរបួសជាច្រើន បន្ទាប់ពីការវាយឆ្មក់ដោយសហរដ្ឋអាមេរិក និងឈានដលការចាប់ខ្លួនប្រធានាធិបតី Nicolas Maduro កាលពីថ្ងៃសៅរ៍សប្ដាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម Reuters នៅក្នុងសុន្ទរកថានៅថ្ងៃដដែលនោះ លោក Cabello បញ្ជាក់ថា នេះជាលើកដំបូងហើយដែលទីក្រុង Caracas បានចេញផ្សាយតួលេខផ្លូវការលើចំនួនអ្នកស្លាប់នៅក្នុងសមរភូមិប្រយុទ្ធមួយនេះ។

ពីមុនមក ទីក្រុង Caracas មិនបានផ្តល់ចំនួនអ្នកស្លាប់លម្អិតទេ ប៉ុន្តែកងទ័ពបានបង្ហោះបញ្ជីឈ្មោះអ្នកស្លាប់ចំនួន ២៣ នាក់ ក្នុងចំណោមកងកម្លាំងរបស់ខ្លួន។ មន្ត្រីវ៉េណេស៊ុយអេឡាបាននិយាយថា ក្រុមសន្តិសុខរបស់លោក Maduro ភាគច្រើនត្រូវគេសម្លាប់ដោយឈាមត្រជាក់ ខណៈប្រទេសគុយបាក៏ចេញមុខអះអាងដែរថា យោធា និងសេវាស៊ើបការណ៍សម្ងាត់របស់ខ្លួននៅក្នុងប្រទេសវ៉េណេស៊ុយអេឡាសុ​ទ្ធតែត្រូវសម្លាប់ដូចគ្នា។

រដ្ឋមន្ត្រីក្រសួងមហាផ្ទៃវ៉េណេស៊ុយអេឡាបានបញ្ចាក់បន្ថែមទៀតថា ភរិយារបស់លោក Maduro គឺលោកស្រី Cilia Flores ដែលកំពុងឃុំខ្លួនជាមួយគាត់ បានរងរបួសក្បាលក្នុងអំឡុងពេលវាយឆ្មក់ដោយសហរដ្ឋអាមេរិក ចំណែកលោក Maduro រងរបួសត្រង់ជើងរបស់គាត់។

រដ្ឋាភិបាលវេណេស៊ុយអេឡាបានប្រកាសកាន់ទុក្ខជាតិរយៈពេលមួយសប្តាហ៍ ដើម្បីរំលឹកដល់ទាហានដែលបានស្លាប់នៅក្នុងការវាយឆ្មក់។ ការសម្រេចចិត្តនេះត្រូវបានធ្វើឡើងជាជំហានផ្លូវការមួយ ដើម្បីទទួលស្គាល់ការបាត់បង់ជីវិត និងបង្ហាញពីការដឹងគុណចំពោះកងកម្លាំងដែលបាត់បង់ជីវិតនៅក្នុងយុទ្ធនាការយោធា ដែលនាំឲ្យមានការដួលរលំនៃរដ្ឋាភិបាលរបស់លោកប្រធានាធិបតី Maduro៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

លោក Rubio ប្រាប់ ផែនការ៣ជំហាន ដែលអាមេរិកផ្ដល់ឲ្យ វ៉េណេស៊ុយអេឡា