វ៉េណេស៊ុយអេឡា បញ្ជូនគណៈប្រតិភូ ទៅ អាមេរិក ត្រៀមស្តារទំនាក់ទំនងឡើងវិញ

រដ្ឋាភិបាលវ៉េណេស៊ុយអេឡាបានចេញសេចក្តីថ្លែងការណ៍មួយកាលពីថ្ងៃសុក្រទី៩មករា ដោយនិយាយថា ខ្លួនសម្រេចចិត្តចាប់ផ្តើមបញ្ជូនគណៈប្រតិភូទៅកាន់សហរដ្ឋអាមេរិក ក្នុងគោលបំណងដើម្បីបង្កើតនូវបេសកកម្មការទូតរវាងប្រទេសទាំងពីរឡើងវិញ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន NHK រដ្ឋាភិបាលលើកឡើងថា គោលបំណងគឺដើម្បីដោះស្រាយផលវិបាកនៃការឈ្លានពាន និងការចាប់ជំរិត ប្រធានាធិបតីវ៉េណេស៊ុយអេឡា និងភរិយារបស់គាត់ ហើយក៏ដើម្បីដោះស្រាយរបៀបវារៈការងារដែលមានផលប្រយោជន៍ទៅវិញទៅមកផងដែរ។

កាសែតឈានមុខគេរបស់អេស្ប៉ាញ ABC បានរាយការណ៍ថា ប្រធានាធិបតីបណ្តោះអាសន្នក្នុងប្រទេស វ៉េណេស៊ុយអេឡាគឺ លោកស្រី Delcy Rodriguez នាបច្ចុប្បន្ននេះ ក៏កំពុងស្វែងយល់ពីលទ្ធភាពនៃកិច្ចប្រជុំជាមួយប្រធានាធិបតីអាមេរិក ដូណាល់ ត្រាំ នៅទីក្រុងវ៉ាស៊ីនតោន។

ប៉ុន្តែទីភ្នាក់ងារសារព័ត៌មាន Reuters បានដកស្រង់សម្តីរដ្ឋាភិបាលវ៉េណេស៊ុយអេឡាដោយថា ប្រធានាធិបតីបណ្តោះអាសន្នមិនមានដំណើរកម្សាន្តអន្តរជាតិដែលបានកំណត់សម្រាប់អនាគតដ៏ខ្លីខាងមុខនេះទេ ដោយសាររដ្ឋបាលរបស់លោកស្រី «ផ្តោតលើរបៀបវារៈក្នុងស្រុកជារដ្ឋាភិបាល»។

ទោះជាយ៉ាងណា លោកត្រាំបានប្រាប់អ្នកយកព័ត៌មានកាលពីថ្ងៃសុក្រថា លោកនឹងជួបជាមួយតំណាងផ្សេងៗនៃប្រទេសវ៉េណេស៊ុយអេឡា ប្រហែលជាឆាប់ៗនេះ ទោះបីជាមិនទាន់មានកាលបរិច្ឆេទត្រូវបានកំណត់ក៏ដោយ។

មេដឹកនាំអាមេរិកក៏បានអះអាងទៀតថា ទំនាក់ទំនងដែលសហរដ្ឋអាមេរិកមានជាមួយប្រជាជនដែលកំពុងគ្រប់គ្រងប្រទេសវ៉េណេស៊ុយអេឡាគឺល្អណាស់។ លោកក៏រំពឹងថា នឹងជួបជាមួយមេដឹកនាំប្រឆាំងរបស់វ៉េណេស៊ុយអេឡា និងជាម្ចាស់រង្វាន់ណូបែលសន្តិភាពលោកស្រី Maria Corina Machado នៅថ្ងៃអង្គារ ឬថ្ងៃពុធ សប្តាហ៍ក្រោយ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

មេដឹកនាំកំពូល អ៊ីរ៉ង់ ប្រកាសជំហររឹងរូស មិនព្រមចុះចាញ់ដាច់ខាត