ព័ត៌មានអន្ដរជាតិ

អាមេរិកប្រាប់ពលរដ្ឋខ្លួនចាកចេញពីវ៉េណេស៊ុយអេឡាបន្ទាន់ ពេលផ្លូវអាកាសបើកវិញ

បានផុស

៦ ខែ មុន

នៅ

ថ្ងៃអាទិត្យ ១១ មករា ២០២៦

ដោយ

រដ្ឋាភិបាលសហរដ្ឋអាមេរិកបានចេញសេចក្តីជូនដំណឹងសន្តិសុខថ្មីមួយនៅថ្ងៃសៅរ៍ (ត្រូវព្រឹកថ្ងៃអាទិត្យម៉ោងនៅកម្ពុជា) ដោយជំរុញឲ្យប្រជាជនជាតិអាមេរិកនៅវ៉េណេស៊ុយអេឡាឱ្យចាកចេញពីប្រទេសនេះជាបន្ទាន់ ដោយលើកឡើងពីការព្រួយបារម្ភអំពីសន្តិសុខ និងអសមត្ថភាពរបស់រដ្ឋាភិបាលសហរដ្ឋអាមេរិកក្នុងការផ្តល់ជំនួយសង្គ្រោះបន្ទាន់។ នេះបើយោងតាមស្ថានទូតអាមេរិកនៅទីក្រុងការ៉ាកាស។

ទង់ជាតិវ៉េណេស៊ុយអេឡា ត្រូវបាតុករប្រើប្រាស់កន្លងមក។ CNN

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ថានទូតបាននិយាយនៅក្នុងសេចក្តីជូនដំណឹងសន្តិសុខនៅថ្ងៃទី១០ខែមករាថា «ពលរដ្ឋអាមេរិកនៅវ៉េណេស៊ុយអេឡាគួរតែចាកចេញពីប្រទេសនេះជាបន្ទាន់»។ នេះបើយោងការចេញផ្សាយរបស់ FOX NEWS ដែលមានមូលដ្ឋាននៅសហរដ្ឋអមេរិក

ការព្រមាននេះបានលើកឡើងពីរបាយការណ៍របស់ក្រុមប្រដាប់អាវុធដែលកំពុងប្រតិបត្តិការនៅលើដងផ្លូវវ៉េណេស៊ុយអេឡា។

ស្ថានទូតសហរដ្ឋអាមេរិកនៅទីក្រុងការ៉ាកាសបាននិយាយថា «មានរបាយការណ៍អំពីក្រុមកងជីវពលប្រដាប់អាវុធ ដែលគេស្គាល់ថាជា «colectivos» កំពុងរៀបចំរបាំងផ្លូវ និងត្រួតពិនិត្យយានយន្តសម្រាប់ភស្តុតាងនៃសញ្ជាតិអាមេរិក ឬការគាំទ្រដល់សហរដ្ឋអាមេរិក»។

ការជូនដំណឹងនេះកើតឡើងនៅពេលដែលជម្រើសធ្វើដំណើរអន្តរជាតិបានបើកឡើងវិញ។

ស្ថានទូតសហរដ្ឋអាមេរិក បាននិយាយថា «នៅពេលដែលជើងហោះហើរអន្តរជាតិបានចាប់ផ្តើមបើកឡើងវិញ ពលរដ្ឋអាមេរិកនៅវ៉េណេស៊ុយអេឡាគួរតែចាកចេញពីប្រទេសនេះជាបន្ទាន់ដូចគ្នាដែរ»។

ក្រសួងការបរទេសសហរដ្ឋអាមេរិកបន្តដាក់ប្រទេសវ៉េណេស៊ុយអេឡានៅកម្រិតព្រមានធ្វើដំណើរខ្ពស់បំផុតរបស់ខ្លួន។

ក្រសួងការបរទេសបាននិយាយថា «ប្រទេសវ៉េណេស៊ុយអេឡាមានកម្រិតណែនាំអំពីការធ្វើដំណើរខ្ពស់បំផុត – កម្រិត ៤៖ កុំធ្វើដំណើរ – ដោយសារតែហានិភ័យធ្ងន់ធ្ងរដល់ជនជាតិអាមេរិក»។

ភាពតានតឺងរវាងសហរដ្ឋអាមេរិកបានកើតឡើងយ៉ាងខ្លាំង បន្ទាប់ពីប្រធានាធិបតីអាមេរិក លោក ដូណាល់ ត្រាំ បានបញ្ជាឲ្យបើកប្រតិបត្តិការយោធាចូលប្រទេសវ៉េណេស៊ុយអេឡាកាលថ្ងៃទី៣ខែមករា២០២៦ ដោយចាប់បានប្រធានាធិបតីវ៉េណេស៊ុយអេឡា លោក នីកូឡា ម៉ាឌូរ៉ូ និង ភរិយាគាត់ នាំយកទៅកាន់ទីក្រុងញ៉ូវយ៉កសម្រាប់ការចោទប្រកាន់ពាក់ព័ន្ធជូញដូរគ្រឿងញៀនចូលសហរដ្ឋអាមេរិក បង្កអំពើភេរវកម្ម និង ការកាន់កាប់អាវុធ។

លោក ត្រាំ សង្ឃឹមថា អនុប្រធានាធិបតីវ៉េណេស៊ុយអេឡា លោកស្រី Delcy Rodriguez នឹងសហការជាមួយអាជ្ញាធរសហរដ្ឋអាមេរិកក្នុងការស្តារស្ថិរភាពវ៉េណេស៊ុយអេឡាឡើងវិញ ប៉ុន្តែលោកស្រីអនុប្រធានាធិបតីដែលស្បថចូលកាន់តំណែងប្រធានាធិបតីបណ្តោះអាសន្ន បានចោទប្រកាន់អាមេរិកធ្វើប្រតិបត្តិការដោយខុសច្បាប់ ស្របពេលដែលបណ្តាប្រទេសនានាក៏ថ្កោលទោសអាមេរិកដូចគ្នា។

ការណ៍បានធ្វើឲ្យស្ថានភាពនៅវ៉េណេស៊ុយអេឡាញ ពើបប្រទះនឹងហានិភ័យឆ្ពោះទៅរកអំពើហិង្សាកាន់តែខ្លាំង បើប្រជាជនវ៉េណេស៊ុយអេឡាងើបតតាំងជាមួយវត្តមានរបស់សហរដ្ឋអាមេរិកនៅវ៉េណេស៊ុយអេឡានោះ៕

រ៉ាន់ រើយ