ម៉ាឡេស៊ី និងឥណ្ឌូណេស៊ី បិទកម្មវិធី Grok របស់ Elon Musk ជុំវិញក្តីបារម្ភពីរូបភាពអាសអាភាស

ប្រទេសម៉ាឡេស៊ី និងឥណ្ឌូណេស៊ី បានក្លាយជាប្រទេសដំបូងគេដែលបានសម្រេចបិទកម្មវិធី Grok ដែលជាបច្ចេកវិទ្យាបញ្ញាសិប្បនិម្មិត (AI) បង្កើតឡើងដោយក្រុមហ៊ុន xAI របស់លោក Elon Musk។

យោង​តាម​សារព័ត៌មាន NPR ចុះ​ផ្សាយ​ថ្ងៃ​ទី​១២​ខែ​មករា​នេះ អាជ្ញាធរនៃប្រទេសទាំងពីរក្នុងតំបន់អាស៊ីអាគ្នេយ៍​ បានប្រកាសពីការរឹតត្បិតនេះកាលពីចុងសប្តាហ៍កន្លងទៅ ដោយលើកឡើងពីការយកកម្មវិធីនេះទៅប្រើប្រាស់ក្នុងផ្លូវខុស ដើម្បីបង្កើតរូបភាពអាសអាភាស និងរូបភាពកាត់តដោយគ្មានការអនុញ្ញាត។ ចំណាត់ការនេះ បានឆ្លុះបញ្ចាំងពីការព្រួយបារម្ភកាន់តែខ្លាំងឡើងនៅទូទាំងសកលលោក ចំពោះកង្វះខាតប្រព័ន្ធការពារនៅក្នុងបច្ចេកវិទ្យា AI ដែលត្រូវបានគេយកទៅប្រើដើម្បីបង្កើតរូបភាពក្លែងក្លាយ (Deepfake) បង្កផលប៉ះពាល់ដល់ស្ត្រី និងអនីតិជន។

រដ្ឋមន្ត្រីក្រសួងទំនាក់ទំនង និងកិច្ចការឌីជីថលឥណ្ឌូណេស៊ី លោកស្រី Meutya Hafid បានចាត់ទុកការបង្កើតរូបភាពអាសអាភាសក្លែងក្លាយដោយគ្មានការព្រមព្រៀងថាជា «ការរំលោភសិទ្ធិមនុស្សយ៉ាងធ្ងន់ធ្ងរ» និងជាការគំរាមកំហែងដល់សុវត្ថិភាពឌីជីថល។ ស្របពេលជាមួយគ្នានេះ គណៈកម្មាធិការទំនាក់ទំនង និងពហុព័ត៌មានម៉ាឡេស៊ី (MCMC) បានបញ្ជាក់ថា ប្រព័ន្ធគ្រប់គ្រងដែលមានស្រាប់លើកម្មវិធីនេះនៅមានកម្រិត ដោយផ្អែកខ្លាំងពេកលើការរាយការណ៍ពីអ្នកប្រើប្រាស់ ជាជាងការទប់ស្កាត់ជាមុន។ ទោះបីជាក្រុមហ៊ុន xAI ទើបតែបានរឹតត្បិតការបង្កើតរូបភាពឲ្យប្រើប្រាស់បានតែចំពោះអ្នកបង់ប្រាក់ក៏ដោយ ក៏និយតករនៅទីក្រុងហ្សាកាតា និងកូឡាឡាំពួ នៅតែរក្សាជំហរបន្តបិទកម្មវិធីនេះ រហូតទាល់តែក្រុមហ៊ុនបង្ហាញពីវិធានការសុវត្ថិភាពដែលកាន់តែរឹងមាំ និងមានប្រសិទ្ធភាពជាងមុន៕

ប្រែសម្រួល៖ ឈាង