តើណាតូ នឹងទៅជាយ៉ាងណា បើអាមេរិក វាយយក Greenland មែន?

ក្រោយវាយប្រហារវ៉េណេស៊ុយអេឡា ប្រធានាធិបតីអាមេរិក ដូណាល់ ត្រាំ បានបង្ហាញគោលដៅនៅកន្លែងផ្សេងទៀត ក្នុងនោះក៏រួមមានទាំងកោះ Greenland ផងដែរ ដែលមានម្ចាស់ជាសមាជិកអង្គការណាតូ គឺប្រទេសដាណឺម៉ាក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វោហាស័ព្ទយ៉ាងក្តៅគគុករបស់លោក ត្រាំ បានបង្កក្តីព្រួយបារម្ភក្នុងចំណោមរដ្ឋដែលជាសមាជិកនៃសម្ព័ន្ធភាពដឹកនាំដោយអាមេរិកមួយនេះ ហើយវាក៏បង្ហាញពីការរង្គោះរង្គើផ្ទៃក្នុងរបស់ណាតូដែរ។

ទោះបង្ហាញផែនការទិញ ប៉ុន្តែម្តងហើយម្តងទៀត អាមេរិកមិនមែនបោះបង់ចោលជម្រើសយោធាឡើយ ក្នុងការនាំយក Greenland មកគ្រប់គ្រង ដោយលើកឡើងពីបញ្ហាសន្តិសុខដែលគំរាមកំហែងពីសំណាក់ចិននិងរុស្ស៊ី។

ចុះបើអាមេរិក ប្រើយោធាវាយប្រហារដណ្តើមយកកោះនេះមែន តើនឹងមានអ្វីកើតឡើងក្នុងណាតូ?

បើដូច្នោះ នឹងមានផលវិបាកជាច្រើនដូចជា៖

១. ការរំលោភលើសន្ធិសញ្ញាណាតូ មាត្រា៥

ណាតូ ត្រូវបានបង្កើតឡើងដើម្បីការពារសមាជិកពីការឈ្លានពានខាងក្រៅ។ ដាណឺម៉ាក គឺជាសមាជិកស្ថាបនិកមួយរបស់ណាតូ។ ដូច្នេះប្រសិនបើអាមេរិក ប្រើប្រាស់កម្លាំងយោធាលើសមាជិកខ្លួនឯងមែន វានឹងធ្វើឲ្យសន្ធិសញ្ញាទីក្រុងវ៉ាស៊ីនតោនក្លាយជាអសាបង់។ ប្រទេសអឺរ៉ុបផ្សេងទៀតនឹងលែងមានទំនុកចិត្តលើអាមេរិក ហើយណាតូអាចត្រូវរលាយភ្លាមៗ។

២. អឺរ៉ុប-អាមេរិក នឹងត្រូវបែកបាក់

ប្រទេសនានាដូចជាបារាំងនិងអាល្លឺម៉ង់ នឹងប្រើប្រាស់ហេតុការណ៍នេះជាលេសដើម្បីបង្កើតកងទ័ពអឺរ៉ុបផ្ទាល់ខ្លួន ដោយមិនពឹងផ្អែកលើអាមេរិកទៀតឡើយ។

ទន្ទឹមនោះ សហភាពអឺរ៉ុប (EU) អាចនឹងដាក់ទណ្ឌកម្មសេដ្ឋកិច្ចលើអាមេរិក ដែលនាំឲ្យមានសង្គ្រាមពាណិជ្ជកម្មសកល។

៣. មូលដ្ឋានទ័ព Thule

បច្ចុប្បន្ន អាមេរិកមានមូលដ្ឋានទ័ពអាកាសដ៏ធំមួយនៅ Greenland រួចទៅហើយ ក្រោមសន្ធិសញ្ញាជាមួយដាណឺម៉ាក នោះគឺមូលដ្ឋាន Thule។ ការវាយប្រហារយោធានឹងធ្វើឲ្យអាមេរិកបាត់បង់សិទ្ធិស្របច្បាប់លើមូលដ្ឋាននេះ ហើយបង្កជាអស្ថិរភាពដល់ប្រព័ន្ធការពារមីស៊ីលរបស់អាមេរិកខ្លួនឯង។

ដូចនេះ ប្រសិនបើមានការវាយប្រហារយោធាមែន នោះគឺជាទីបញ្ចប់នៃសណ្ដាប់ធ្នាប់ពិភពលោកនាពេលបច្ចុប្បន្នហើយ។ ណាតូនឹងរលាយ ចំណែកពិភពលោកនឹងបែងចែកជាបក្សពួកតូចៗដែលបង្កគ្រោះថ្នាក់បំផុត៕

អត្ថបទ៖ សុខ សុវណ្ណ