ព័ត៌មានអន្ដរជាតិ

នាវាមុជទឹកតៃវ៉ាន់តម្លៃ១.៥៨ប៊ីលានដុល្លា បញ្ចប់ការធ្វើតេស្តសាកល្បង

បានផុស

៥ ខែ មុន

នៅ

ថ្ងៃសុក្រ ៣០ មករា ២០២៦

ដោយ

តៃវ៉ាន់បានបញ្ចប់ការសាកល្បងដំណើរការនាវាមុជទឹកផលិតក្នុងស្រុកដំបូងកាលពីថ្ងៃព្រហស្បតិ៍ ចំពេលមានភាពតានតឹងនៅច្រកសមុទ្រតៃវ៉ាន់។ គម្រោងនាវាមុជទឹកតៃវ៉ាន់ ដែលបំពាក់គ្រឿងបន្លាស់ពីបស្ចឹមប្រទេសនេះ ជាព្រឹត្តិការណ៍ដ៏សំខាន់មួយនៅក្នុងគោលបំណងពង្រឹងសមត្ថភាពយោធារបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កោះតៃវ៉ាន់ ដែលចិនតែងអះអាងថាជាទឹកដីរបស់ខ្លួន បានអនុវត្តនូវកម្មវិធីនាវាមុជទឹកខ្នាតតូច ដែលជាផ្នែកមួយដ៏សំខាន់ ដើម្បីធ្វើទំនើបកម្មកងកម្លាំងប្រដាប់អាវុធរបស់ខ្លួន។ ខណៈទីក្រុងប៉េកាំង ធ្វើសមយុទ្ធយោធាស្ទើរតែរាល់ថ្ងៃ ក្នុងការទាមទារអធិបតេយ្យភាពរបស់ខ្លួន។

កម្មវិធីនាវាមុជទឹកនេះ ជារបកគំហើញថ្មីសម្រាប់តៃវ៉ាន់ មានអ្នកជំនាញនិងបច្ចេកវិទ្យាមកពីប្រទេសមួយចំនួន រួមទាំងសហរដ្ឋអាមេរិក និងចក្រភពអង់គ្លេស។

ក្រុមហ៊ុន CSBC Corp របស់តៃវ៉ាន់បើកទំព័រថ្មី ឈានមុខគេ ក្នុងការសាងសង់អ្វីដែលបានគ្រោងទុក មាននាវាមុជទឹកចំនួន៨ ពិសេសក្រុមហ៊ុនបាននិយាយនៅក្នុងសេចក្តីថ្លែងការណ៍មួយកាលពីល្ងាចថ្ងៃព្រហស្បតិ៍ថា កប៉ាល់ទីមួយដែលមានឈ្មោះថា Narwhal បានបញ្ចប់ការសាកល្បងក្រោមទឹកជាលើកដំបូងនៅសមុទ្រ។

ក្រុមហ៊ុននិយាយថា៖ «នាវាមុជទឹកនេះគឺជាសមត្ថភាពយុទ្ធសាស្ត្រដ៏សំខាន់ ក្នុងការរារាំងឥទ្ធិពលចិនតាមផ្លូវទឹក។ វាបានសាកល្បងនៅឯកំពង់ផែ Kaohsiung ភាគខាងត្បូងតៃវ៉ាន់»។

តៃវ៉ាន់បានបន្តទៀតថា ខ្លួនសង្ឃឹមថានឹងអាចដាក់ពង្រាយយ៉ាងហោចណាស់នាវាមុជទឹកដែលបង្កើតក្នុងស្រុក បែបនេះចំនួនពីរ នៅឆ្នាំ២០២៧ ជាពិសេសអាចបំពាក់នូវមីស៊ីលនៅជំនាន់ក្រោយៗទៀត។

គួរបញ្ជាក់ថា នាវាមុជទឹកទីមួយនេះមានតម្លៃ ១.៥៨ប៊ីលានដុល្លា នឹងប្រើប្រាស់ប្រព័ន្ធប្រយុទ្ធដោយក្រុមហ៊ុន Lockheed Martin Corp ផលិតដោយសហរដ្ឋអាមេរិកទម្ងន់ធ្ងន់ ម៉ាក Mark-៤៨ ៕

ប្រែសម្រួល៖ ណឺ មិនា