អានុទីន ថា ជ័យជម្នះបោះឆ្នោតកំពុងស្ថិតក្នុងកណ្តាប់ដៃ ទោះការស្ទង់មតិបង្ហាញលទ្ធផល ផ្ទុយស្រឡះ

ខណៈការបោះឆ្នោតថៃនឹងឈានចូលមកដល់នៅសប្តាហ៍នេះ នាយករដ្ឋមន្ត្រីចាំផ្ទះ អានុទីន ឆាន់វីរៈគុល បានប្រកាសក្តែងៗថា លោកមានទំនុកចិត្តយ៉ាងមុតមាំនឹងឈ្នះ! ជ័យជម្នះកំពុងស្ថិតក្នុងកណ្តាប់ដៃរបស់ខ្លួនហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាសែត Bangkok Post បានដកស្រង់សម្តីលោកអានុទីន ដែលថ្លែងក្នុងកម្មវិធី Kammakorn Khaoកាលពីថ្ងៃចន្ទទី២ខែកុម្ភៈឆ្នាំ២០២៦ថា លោកបានដាក់គោលដៅបញ្ចប់នៅចំណាត់ថ្នាក់លេខមួយ ឬបើមិនឈ្នះលេខមួយទូទាំងប្រទេស យ៉ាងហោចណាស់ក៏នាំមុខគេដែរ ក្នុងប្លុកនយោបាយរបស់ខ្លួន។

លោកអះអាងថា គណបក្សភូមិចៃថៃ កំពុងស្ថិតក្នុងស្ថានភាពអំណោយផលក្នុងការដណ្តើមបានអាសនៈភាគច្រើន នៅក្នុងការបោះឆ្នោតសកលនេះ។ យ៉ាងណា ពេលត្រូវបានគេសួរអំពីការព្យាករអាសនៈដែលអាចឡើងដល់១៨០ បុរសម្នាក់នេះមិនហ៊ានផ្តល់ចម្លើយច្បាស់លាស់ឡើយ។

ជំនឿចិត្តរបស់អនុទីន ត្រូវគេមើលឃើញថា ផ្ទុយស្រឡះពីការស្ទង់មតិនាពេលថ្មីៗ ដែលបង្ហាញថា គណបក្សពីរនិងបេក្ខជននាយករដ្ឋមន្ត្រីពីរ ដែលកំពុងប្រជែងគ្នាខ្លាំង គឺមិនមែនគណបក្សរបស់លោកនិងគ្មានឈ្មោះអានុទីនឡើយ។

ការស្ទង់មតិកាលពីសប្តាហ៍មុនរបស់ Rajabhat ទូទាំងប្រទេសលើមនុស្ស ១១ ៧០០នាក់ចន្លោះថ្ងៃទី១៩ដល់២៥ខែមករា បានបង្ហាញថា គណបក្សប្រជាជនឈរនៅលេខ១ និងភឿថៃនៅលេខ២។

តាមលទ្ធផល, គណបក្សប្រជាជនមានសំឡេងគាំទ្រ៣៨.៨% នាំមុខគណបក្សភឿថៃដាច់ ដែលមានត្រឹម១៧.៩%។ បើនិយាយពីបេក្ខជននាយករដ្ឋមន្ត្រីវិញ លោក Natthaphong Rueangpanyawut ​នៃគណបក្សប្រជាជន គឺទទួលបានសំឡេងគាំទ្រ៣៩.២% ក៏នាំមុខដាច់ដែរលើលោក Yodchanan Wongsawat នៃគណបក្សភឿថៃ ដែលមានសំឡេងគាំទ្រ១៥.៩%។

ងាកទៅមើលការស្ទង់មតិរបស់ Suan Dusit ដែលធ្វើឡើងលើមនុស្ស ២ ៥៨៦ នាក់ទូទាំងប្រទេស ចន្លោះថ្ងៃទី ១៣ ដល់ ១៦ ខែមករា ក៏បង្ហាញដែរថា គណបក្សប្រជាជន មានសំឡេងនាំមុខដាច់នៅក្នុងជម្រើសគោលនយោបាយធំៗចំនួន ៤ ក្នុងចំណោម ៥ ខណៈគណបក្សភឿថៃ កំពុងតាមពីក្រោយ នៅលំដាប់ទី២៕

អត្ថបទ៖ សុខ សុវណ្ណ