ទាំងបក្សប្រជាជននិងបេក្ខជននាយករដ្ឋមន្ត្រីរបស់ខ្លួន កំពុងមានសំឡេងគាំទ្រដាច់គេ ក្នុងការស្ទង់មតិនៅថៃ

ស្របពេលការបោះឆ្នោតថៃនៅសល់ពេលត្រឹមជាងមួយសប្តាហ៍ទៀតប៉ុណ្ណោះនឹងចូលមកដល់នោះ ការស្ទង់មតិចុងក្រោយបំផុតបានបង្ហាញថា ទាំងគណបក្សប្រជាជននិងបេក្ខជននាយករដ្ឋមន្ត្រីរបស់ខ្លួនគឺលោក Natthaphong Rueangpanyawut កំពុងមានសំឡេងគាំទ្រលើសដាច់គេ។

តាមការផ្សាយរបស់ Bangkok Post កាលពីថ្ងៃព្រហស្បតិ៍ទី២៩ខែមករាឆ្នាំ២០២៦, ប្រព័ន្ធសកលវិទ្យាល័យ Rajabhat បានធ្វើការស្ទង់មតិទូទាំងប្រទេសលើមនុស្ស ១១ ៧០០នាក់ចន្លោះថ្ងៃទី១៩ដល់២៥ខែមករា ដែលជាលទ្ធផលបង្ហាញថា គណបក្សប្រជាជនឈរនៅលេខ១ ភឿថៃលេខ២ និងភូមិចៃថៃឈរនៅលេខ៣។

លទ្ធផលបង្ហាញថា គណបក្សប្រជាជនមានសំឡេងគាំទ្រ៣៨.៨% នាំមុខគណបក្សភឿថៃដាច់ ដែលមានត្រឹម១៧.៩% ចំណែកភូមិចៃថៃ មានសំឡេងគាំទ្រ១៥.៦%។

បើនិយាយពីបេក្ខជននាយករដ្ឋមន្ត្រីវិញ លោក Natthaphong ទទួលបានសំឡេងគាំទ្រ៣៩.២% ក៏នាំមុខដាច់ដែរលើលោក Yodchanan Wongsawat នៃគណបក្សភឿថៃ ដែលមានសំឡេងគាំទ្រ១៥.៩% ខណៈ Anutin Charnvirakul មកពីភូមិចៃថៃ មានសំឡេង១៥.២%។

ងាកទៅមើលការស្ទង់មតិរបស់ Suan Dusit ដែលធ្វើឡើងលើមនុស្ស ២ ៥៨៦ នាក់ទូទាំងប្រទេស ចន្លោះថ្ងៃទី ១៣ ដល់ ១៦ ខែមករា ក៏បង្ហាញដែរថា គណបក្សប្រជាជន មានសំឡេងនាំមុខដាច់នៅក្នុងជម្រើសគោលនយោបាយធំៗចំនួន ៤ ក្នុងចំណោម ៥ ខណៈគណបក្សភឿថៃ កំពុងតាមពីក្រោយ នៅលំដាប់ទី២។

ក្នុងចំណោមគោលនយោបាយទាំង៥ គឺគណបក្សប្រជាជនបាននាំមុខគេចំនួន៤បាត់ទៅហើយ ក្នុងនោះមានដូចជា៖វិស័យអប់រំ ៤៣.៩៣%, ការប្រឆាំងអំពើពុករលួយ ៣៩.៨៩%, នយោបាយនិងសន្តិសុខ ៣៨.១៤% និងវិស័យកសិកម្ម ៣៥.៨២% ចំណែកគោលនយោបាយតែមួយគត់ដែលគណបក្សភឿថៃ នាំមុខគឺតម្លៃទំនិញ និងសេដ្ឋកិច្ចគ្រួសារ ដែលទទួលបានសំឡេងគាំទ្រ ៣៥.៦៣%។

បើនិយាយពីសំឡេងគាំទ្រសម្រាប់សន្លឹកឆ្នោតបញ្ជីឈ្មោះបក្ស (Party-list) វិញ ការស្ទង់មតិបង្ហាញថា គណបក្សប្រជាជនមានសំឡង ៣៤.១១% បើប្រៀបធៀបគណបក្សភឿថៃ ដែលមានត្រឹម១៨.៣៧% ប៉ុណ្ណោះ។

ទន្ទឹមនោះ បើនិយាយពីការគាំទ្រសមាជិកសភាមណ្ឌលវិញ គណបក្សប្រជាជនក៏កំពុងនាំមុខដាច់ដែរ ដោយមានសំឡេង ៣៣.១៤% បើធៀបនឹងសំឡេង ១៩.៤៩% របស់បក្សភឿថៃ៕

អត្ថបទ៖ សុខ សុវណ្ណ