ព័ត៌មានអន្ដរជាតិ

ប្រជុំសម្ងាត់ជាមួយអាមេរិកចប់ មេទ័ពអ៊ីស្រាអែល រៀបផែនការសម្រាប់សង្គ្រាមជាមួយអ៊ីរ៉ង់

បានផុស

៣ ខែ មុន

នៅ

ថ្ងៃអង្គារ ៣ កុម្ភៈ ២០២៦

ដោយ

បន្ទាប់ពីធ្លាយព័ត៌មានអំពីជំនួបសម្ងាត់របស់មេទ័ពអ៊ីស្រាអែលនៅទីក្រុងវ៉ាស៊ីនតោន រដ្ឋមន្ត្រីការពារជាតិអ៊ីស្រាអែល Israel Katz ក៏រៀបចំកិច្ចប្រជុំបន្ទាន់ជាមួយអគ្គសេនាធិការ IDF លោក Eyal Zamir ដើម្បីពិភាក្សាក៏ដូចជាដាក់ចេញផែនការនិងការត្រៀមលក្ខណៈសម្រាប់សង្គ្រាមជាមួយអ៊ីរ៉ង់។ នេះបើតាមការផ្សាយរបស់ Sentinel នៅថ្ងៃអង្គារទី៣ខែកុម្ភៈឆ្នាំ២០២៦។

កាលពីចុងសប្តាហ៍ លោក Zamir បានដឹកនាំគណៈប្រតិភូអ៊ីស្រាអែលមួយក្រុម ធ្វើដំណើរដោយសម្ងាត់ទៅទីក្រុងវ៉ាស៊ីនតោន ដើម្បីពិភាក្សាជាមួយប្រធានអគ្គសេនាធិការចម្រុះ Dan Caine និងមន្ត្រីការពារជាតិជាន់ខ្ពស់ដទៃទៀតរបស់សហរដ្ឋអាមេរិកនៅឯមន្ទីរបញ្ចកោណ ខណៈមានព័ត៌មានលេចធ្លាយថា ក្នុងអំឡុងពេលនោះ គណៈប្រតិភូអ៊ីស្រាអែល បានបង្ហាញនូវព័ត៌មានសម្ងាត់ដ៏រសើប ហើយជជែកអំពីជម្រើសយោធាប្រឆាំងអ៊ីរ៉ង់។

ពេលមកដល់អ៊ីស្រាអែលវិញ លោក Zamir ក៏ជួបជាមួយលោក Katz ដោយមេទ័ពទាំងពីរបានរៀបចំកិច្ចប្រជុំដើម្បីវាយតម្លៃលើការត្រៀមលក្ខណៈប្រតិបត្តិការរបស់យោធា ដែលផ្ដោតសំខាន់ចំពោះគ្រប់សេណារីយ៉ូដែលអាចកើតមាន ចំពោះមុខស្ថានភាពយ៉ាងក្តៅគគុកនិងតានតឹងខ្លាំងបំផុតនៅក្នុងតំបន់។ យ៉ាងណា មិនមានព័ត៌មានលម្អិតអំពីផែនការនេះទេ។

ពិតណាស់ បើអាមេរិកវាយប្រហារអ៊ីរ៉ង់មែន, អ៊ីស្រាអែល ក៏ត្រូវរងផលប៉ះពាល់ខ្លាំងផងដែរ ព្រោះអ៊ីស្រាអែលត្រូវបានចាត់ទុកថាជា «សម្ព័ន្ធមិត្តដែកថែប» របស់អាមេរិក និងជា «សត្រូវស៊ូពូជ» របស់អ៊ីរ៉ង់។

ជុំវិញរឿងនេះ លោក Amos Yadlin ដែលជាអតីតប្រធានចារកម្មយោធាអ៊ីស្រាអែលនិងជានាយកវិទ្យាស្ថានសិក្សាសន្តិសុខជាតិ INSS ធ្លាប់ព្រមានថា សង្គ្រាមអាមេរិក-អ៊ីរ៉ង់ អាចនាំឲ្យមាន «សង្គ្រាមតំបន់ពេញទំហឹង» ដែលអ៊ីស្រាអែលត្រូវប្រឈមមុខនឹងសត្រូវពី ៥ ទៅ ៧ ទិសដៅក្នុងពេលតែមួយដូចជាហ្គាហ្សា លីបង់ ស៊ីរី អ៊ីរ៉ាក់ យេម៉ែន និងអ៊ីរ៉ង់ផ្ទាល់។

ចំណែកលោក Jonathan Spyer អ្នកយកព័ត៌មានសង្គ្រាម និងជាអ្នកវិភាគនៅ Middle East Forum បានវិភាគថា ផលប៉ះពាល់ធំបំផុតគឺការបំផ្លិចបំផ្លាញហេដ្ឋារចនាសម្ព័ន្ធស៊ីវិលនៅក្នុងប្រទេសអ៊ីស្រាអែល ដែលប្រព័ន្ធ Iron Dome ប្រហែលជាមិនអាចទប់ទល់បាន ១០០% ទេ ប្រសិនបើមានការបាញ់សម្រុកក្នុងបរិមាណដ៏មហិមា។

លោក Mark Dubowitz នាយកប្រតិបត្តិមូលនិធិការពារលទ្ធិប្រជាធិបតេយ្យ FDD ក៏ធ្លាប់វិភាគដែរថា អ៊ីស្រាអែលនឹងរងគ្រោះខ្លាំងបំផុតពី «យុទ្ធសាស្ត្រឡោមព័ទ្ធ» របស់អ៊ីរ៉ង់ តាមរយៈការវាយប្រហារចេញពីគ្រប់ច្រកល្ហក៕

អត្ថបទ៖ សុខ សុវណ្ណ