កិច្ចពិភាក្សារវាងអាមេរិក-អ៊ីរ៉ង់ គ្រោងធ្វើនៅចុងសប្តាហ៍ ក្រោយទើបបោះសម្ដីធ្ងន់ឲ្យគ្នាទៅមក

យោងតាមប្រព័ន្ធផ្សព្វផ្សាយ NHK បានរាយការណ៍កាលពីថ្ងៃចន្ទទី២ ខែកុម្ភៈ ថា កិច្ចចរចានុយក្លេអ៊ែររវាងសហរដ្ឋអាមេរិក និងអ៊ីរ៉ង់ គ្រោងនឹងធ្វើឡើងនៅប្រទេសទួកគីនាចុងសប្តាហ៍នេះ បន្ទាប់ពីភាគីទាំងពីរបានបន្តបោះពាក្យសម្ដីផ្លែផ្កាឲ្យគ្នាទៅមក ចាប់តាំងពីជម្លោះតានតឹងដ៏យូរអង្វែង។

យ៉ាងណា នេះនឹងក្លាយជាកិច្ចប្រជុំលើកដំបូង រវាងភាគីទាំងពីរចាប់តាំងពីការចរចាបានដួលរលំ និងប្រយុទ្ធគ្នាកាលពីខែមិថុនាឆ្នាំមុន។ វាកើតឡើងក្នុងអំឡុងពេលនៃការកសាងយោធាដ៏ធំរបស់សហរដ្ឋអាមេរិកនៅឈូងសមុទ្រ ហើយប្រធានាធិបតីត្រាំថា មធ្យោបាយតែមួយគត់ដើម្បីចៀសវាងជម្លោះយោធាគឺកិច្ចព្រមព្រៀងរហ័ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពដដែល លោក Steve Witkoff បេសកជនពិសេសអាមេរិក លោក Jared Kushner កូនប្រសារលោកត្រាំ និងរដ្ឋមន្ត្រីការបរទេសអ៊ីរ៉ង់ Abbas Araghchi នឹងជួបគ្នានៅទីក្រុងអ៊ីស្តង់ប៊ុល ក្នុងកិច្ចខិតខំប្រឹងប្រែងដើម្បីស្តារការទូតឡើងវិញលើជម្លោះដ៏យូរអង្វែងអំពីកម្មវិធីនុយក្លេអ៊ែររបស់អ៊ីរ៉ង់ និងបំបាត់ការភ័យខ្លាចនៃសង្គ្រាមក្នុងតំបន់ថ្មី ខណៈដែលមន្ត្រីការទូតក្នុងតំបន់ម្នាក់បាននិយាយថា តំណាងមកពីប្រទេសដូចជាអារ៉ាប៊ីសាអូឌីត កាតា អារ៉ាប់រួម អេហ្ស៊ីប ក៏ដូចជាប្រទេសមួយចំនួនទៀត ក៏នឹងចូលរួមផងដែរ។

របាយការណ៍បានដកស្រង់សម្តីមន្ត្រីអាមេរិកម្នាក់លើកឡើងថា កិច្ចប្រជុំនឹងផ្តោតលើការដាក់បញ្ចូលគ្នានូវកិច្ចព្រមព្រៀងកញ្ចប់ដែលការពារសង្គ្រាម។ ជាពិសេស កិច្ចប្រជុំនេះគឺជាលទ្ធផលនៃការជំរុញការទូតដោយប្រទេសទួកគី អេហ្ស៊ីប និងកាតា ក្នុងរយៈពេលប៉ុន្មានថ្ងៃចុងក្រោយ។

ប្រព័ន្ធផ្សព្វផ្សាយរដ្ឋអ៊ីរ៉ង់ក៏បានរាយការណ៍ផងដែរថា ប្រធានាធិបតី Masoud Pezeshkian បានបញ្ជាឲ្យមានការចរចាថ្មីជាមួយសហរដ្ឋអាមេរិក។ ប៉ុន្តែនៅតែមានចន្លោះប្រហោងធំៗដដែល។ ជាក់ស្ដែង រដ្ឋបាលត្រាំកំពុងទាមទារឲ្យកិច្ចព្រមព្រៀងណាមួយគ្របដណ្តប់លើកម្មវិធីនុយក្លេអ៊ែរ និងមីស៊ីលរបស់អ៊ីរ៉ង់ ក៏ដូចជាក្នុងតំបន់ ប៉ុន្តែអ៊ីរ៉ង់ចង់បានតែបញ្ហានុយក្លេអ៊ែរនៅលើតុចរចាតែប៉ុណ្ណោះ។

លើសពីនេះ លោកត្រាំនៅតែបន្តបោះសម្ដីធំដាក់អ៊ីរ៉ង់ថា ទីក្រុងតេហេរ៉ង់នឹងជួបរឿងអាក្រក់ បើគ្មានកិច្ចព្រមព្រៀងណាមួយកើតឡើង។ ស្របពេលកងនាវាយោធាអាមេរិកមួយចំនួនធំ ដែលសុទ្ធសឹងជានាវាធំៗ កំពុងធ្វើដំណើរឆ្ពោះទៅកាន់ប្រទេសអ៊ីរ៉ង់៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ត្រាំ បន្ទន់ឥរិយាបទជាមួយអ៊ីរ៉ង់ ក្រោយលោក Khamenei ព្រមានផ្ទុះ «សង្គ្រាមក្នុងតំបន់»