អ្នកប្រឆាំងជាន់ខ្ពស់វ៉េណេស៊ុយអេឡាត្រូវចាប់ខ្លួនវិញ ត្រឹមប៉ុន្មានម៉ោងក្រោយការដោះលែង

ប្រទេសវ៉េណេស៊ុយអេឡាកំពុងស្ថិតក្នុងរបត់នយោបាយដ៏ធំមួយ ដោយ​បន្ទាប់ពីកងកម្លាំងអាមេរិកបានចាប់ខ្លួនមេដឹកនាំលោក Nicolás Maduro កាលពីដើម​ខែ​មករា​ រដ្ឋាភិបាលបណ្តោះអាសន្នថ្មីដែលដឹកនាំដោយលោកស្រី Delcy Rodríguez កំពុងរងសម្ពាធយ៉ាងខ្លាំងពីទីក្រុងវ៉ាស៊ីនតោន​ឲ្យ​ដោះលែងអ្នកទោសនយោបាយទាំងអស់។

កាលពីថ្ងៃអាទិត្យ​ទី​៨​ខែ​កុម្ភៈ​ឆ្នាំ​២០២៦​ វឌ្ឍនភាពដ៏ធំមួយបានកើតឡើង គឺ​អ្នកទោសជាន់ខ្ពស់យ៉ាងហោចណាស់ ៣០នាក់​ត្រូវបានដោះលែង រួមទាំងលោក Juan Pablo Guanipa និងលោក Perkins Rocha ដែលជាសម្ព័ន្ធមិត្តជិតស្និទ្ធរបស់​មេ​បក្ស​ប្រឆាំង​ និង​ជា​ម្ចាស់ពានរង្វាន់ណូបែលសន្តិភាព លោកស្រី Maria Corina Machado។

ទោះជាយ៉ាងណា ក្តីសាទរ​នេះមានរយៈពេលខ្លីណាស់។ តាម​ការផ្សាយរបស់ BBC ត្រឹមតែប៉ុន្មានម៉ោងក្រោយការដោះលែង លោក Guanipa ត្រូវបាន​គេ​ចាប់​ខ្លួន​វិញ។ នៅពាក់កណ្តាលអធ្រាត្រ មនុស្ស​មួយ​ក្រុម​ប្រដាប់អាវុធស្លៀកពាក់ស៊ីវិលបានបង្ខំលោក​ឲ្យ​ចូលក្នុងរថយន្តនៅទីក្រុងការ៉ាកាស។ ក្រុមគ្រួសារ និងគណបក្សរបស់លោកមានការភ័យខ្លាចយ៉ាងខ្លាំង ហើយបានហៅទង្វើនេះថាជា «ការចាប់ពង្រត់ដោយហិង្សា»។ ការដោះលែងហើយចាប់ខ្លួនវិញភ្លាមៗបែបនេះ បានធ្វើ​ឲ្យ​ប៉ះពាល់ដល់ការសន្យារបស់រដ្ឋាភិបាលក្នុងការនាំមកនូវសន្តិភាព។

ក្រសួងសាធារណៈនៃប្រទេសវ៉េណេស៊ុយអេឡាបាន​ប្រកាស​ថា លោក Guanipa ត្រូវបានចាប់ខ្លួនជាថ្មីម្តងទៀត ពីបទល្មើសនឹងលក្ខខណ្ឌនៃការដោះលែង ខណៈដែលព័ត៌មានលម្អិតផ្លូវការអំពីការរំលោភបំពានជាក់លាក់ណាមួយមិនត្រូវបានផ្តល់​​​ឲ្យ​នោះទេ។ នេះ​បើ​តាម​ការ​ចុះ​ផ្សាយ​របស់​ទីភ្នាក់ងារ​ព័ត៌មាន​រ៉យទ័រ។

ទោះបីជាមានរឿងនេះកើតឡើងក៏ដោយ ក៏រដ្ឋាភិបាលបណ្តោះអាសន្ននៅតែបន្តជំរុញ «ច្បាប់លើកលែងទោសទូទៅ» ថ្មីមួយ។ ច្បាប់នេះនឹងលុបចោលរាល់ការចោទប្រកាន់លើមនុស្សរាប់រយ​ពាន់​នាក់ដែលត្រូវបានជាប់ពន្ធនាគារដោយសារការតវ៉ា ឬរិះគន់រដ្ឋាភិបាល។ ពួកគេថែមទាំងគ្រោងនឹងប្រែក្លាយ​មន្ទីរឃុំឃាំង Helicoide ដែលជាកន្លែងល្បីខាងការធ្វើទារុណកម្ម ឲ្យទៅជាមជ្ឈមណ្ឌលកីឡាវិញទៀត​ផង។ ខណៈដែលមនុស្សជាច្រើនត្រូវបានដោះលែង ការបាត់ខ្លួនភ្លាមៗរបស់លោក Guanipa បង្ហាញថា ផ្លូវឆ្ពោះទៅរកប្រជាធិបតេយ្យពិតប្រាកដនៅវ៉េណេស៊ុយអេឡា នៅតែមានគ្រោះថ្នាក់ និងមិនទាន់ច្បាស់លាស់នៅឡើយទេ៕

ប្រែសម្រួល៖ ឈាង