គណបក្សជាបន្តបន្ទាប់ ចេញមុខចោទប្រកាន់ គណៈកម្មាធិការរៀបចំការបោះឆ្នោតថៃ

ពេលនេះ គណបក្សថៃជាបន្តបន្ទាប់បានបញ្ចេញប្រតិកម្មនិងតវ៉ា ចំពោះគណៈកម្មាធិការរៀបចំការបោះឆ្នោត (EC) ជុំវិញការចោទប្រកាន់អំពីភាពមិនប្រក្រតីនិងក្លែងបន្លំសន្លឹកឆ្នោត។

តាមការផ្សាយរបស់ Khaosod នៅថ្ងៃអង្គារទី១០ខែកុម្ភឆ្នាំ២០២៦ នាង Rukchanok Srinork សមាជិកសភាជាប់ឆ្នោតមកពីគណបក្សប្រជាជនថៃ បានបង្ហោះសារនៅលើបណ្តាញសង្គម ដោយចោទប្រកាន់ថាមាន «មានការលួចបន្លំកាសន្លឹកឆ្នោតទ្រង់ទ្រាយធំ»។

ក្នុងសារនោះ Rukchanok លើកឡើងថា៖ «មកដល់ចំណុចនេះ វាបានបង្ហាញយ៉ាងច្បាស់ថា នេះគឺជាការលួចបន្លំសន្លឹកឆ្នោតយ៉ាងធំធេង។ តើឥឡូវនេះ អ្នកយល់ហើយឬនៅថា ហេតុអ្វីបានជាត្រូវតែមានការឃុបឃិតគ្នាក្នុងការជ្រើសរើសសមាជិកព្រឹទ្ធសភា? ពីព្រោះវានឹងធ្វើឲ្យគេអាចបង្គាប់បញ្ជាឲ្យសមាជិកព្រឹទ្ធសភា ជ្រើសរើសសមាជិកគណៈកម្មាធិការរៀបចំការបោះឆ្នោត (EC), គណៈកម្មាធិការជាតិប្រឆាំងអំពើពុករលួយ (NACC) និងតុលាការធម្មនុញ្ញ។

ទន្ទឹមនោះដែរ មេបក្សប្រជាជន Natthaphong Ruangpanyawut បានសម្រក់ទឹកភ្នែកតាមកញ្ចក់ទូរទស្សន៍តែម្តង ដោយក្នុងបទសម្ភាសន៍មួយ លោកបង្ហាញអារម្មណ៍វិប្បដិសារី និងសោកស្តាយចំពោះសមាជិកបក្សជាច្រើនរូបដែលមិនអាចរក្សាអាសនៈសភាបាន។

យ៉ាងណា Natthaphong ថ្លែងថា លោកទទួលយកលទ្ធផលបោះឆ្នោត ប៉ុន្តែជំរុញឲ្យ EC ត្រូវតែបំពេញតួនាទីរបស់ខ្លួនប្រកបដោយតម្លាភាពនិងយុត្តិធម៌។

ងាកទៅមើលគណបក្សភឿថៃឯណោះវិញ បើតាមការផ្សាយរបស់ Amarin, គណបក្សនេះ ជំរុញឲ្យ EC ពន្លឿនការស៊ើបអង្កេតលើបណ្តឹងនានា ពាក់ព័ន្ធនឹងកង្វះតម្លាភាពក្នុងដំណើរការបោះឆ្នោត។

ក្នុងសន្និសីទកាសែតមួយ មេបក្សភឿថៃលោក Chulaphan Amornvivat រួមជាមួយលោក Phumtham Wechayachai សមាជិកបក្ស និងលោក Krit Uawong ប្រធានផ្នែកច្បាប់ បានជំរុញឲ្យគណៈកម្មាធិការរៀបចំការបោះឆ្នោត ប្រញាប់ស៊ើបអង្កេតលើបណ្តឹងនានារបស់ប្រជាពលរដ្ឋ ពាក់ព័ន្ធនឹងការចោទប្រកាន់អំពីភាពមិនប្រក្រតីក្នុងដំណើរការបោះឆ្នោត។ ការធ្វើបែបនេះ គឺដើម្បីស្តារទំនុកចិត្តរបស់សាធារណជន ចំពោះដំណើរការបោះឆ្នោត។

លោក Chulaphan និយាយថា បក្សភឿថៃ ទទួលពាក្យបណ្តឹងពីសាធារណជន និងអ្នកសង្កេតការណ៍បោះឆ្នោត ក៏ដូចជាពីបេក្ខជនសមាជិកសភារបស់បក្សនៅក្នុងតំបន់ជាច្រើន ពាក់ព័ន្ធសុក្រឹតភាព និងតម្លាភាពនៃដំណើរការរាប់សន្លឹកឆ្នោត។ គណបក្សនេះ ខ្វល់ខ្វាយណាស់ចំពោះដំណើរការបោះឆ្នោតនាពេលបច្ចុប្បន្ន៕

អត្ថបទ៖ សុខ សុវណ្ណ