ព័ត៌មានអន្ដរជាតិ

រដ្ឋមន្ត្រីការបរទេសថៃ បង្ហាញជំហរខ្វះភាពច្បាស់លាស់លើកិច្ចព្រមព្រៀង ក្នុងសម្ភាសន៍សារព័ត៌មានបារាំង

បានផុស

៥ ខែ មុន

នៅ

ថ្ងៃអង្គារ ២៤ កុម្ភៈ ២០២៦

ដោយ

ក្នុងកិច្ចសម្ភាសន៍ថ្មីមួយជាមួយទូរទស្សន៍បារាំង FRANCE 24 រដ្ឋមន្ត្រីការបរទេសថៃ លោក ស៊ីហៈសាក់ ភូងកេតកែវ ( Sihasak Phuangketkeow) បានឆ្លើយយករួចតែខ្លួន និងគ្មានជំហរដោះស្រាយឈានទៅបញ្ចប់ជម្លោះជាមួយកម្ពុជាដោយឆន្ទៈពិតប្រាកដនោះទេ ខណៈពិធីករទូរទស្សន៍បារាំង បានដាក់សំណួរក្តៅៗនិងចំៗមួយចំនួនជុំវិញជំហរដោះស្រាយជាមួយកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងកិច្ចសម្ភាសន៍នោះ រដ្ឋមន្ត្រីការបរទេសថៃដែលតែងតែបង្ហាញការប្រែប្រួលទឹកមុខខុសប្រក្រតីជាញឹកញាប់ បាននិយាយដោយគ្មានមូលដ្ឋានដំណោះស្រាយ និងឆ្លុះបញ្ចាំងពីសកម្មភាពពិតរបស់យោធារបស់ខ្លួនដែលកំពុងរំលោភបំពានទឹកដីចូលជ្រៅក្នុងព្រំដែនរបស់ប្រទេសកម្ពុជានោះទេ។

ក្នុងកិច្ចស្វាគមន៍ចូលរួមកម្មវិធីកិច្ចសម្ភាសន៍ជាមួយពិធីករព័ត៌មាន លោក Marc Perelman មុនចាប់ផ្តើមសួរសំណួរក្តៅៗជុំវិញស្ថានការចុងក្រោយក្នុងជម្លោះកម្ពុជានិងថៃនោះ លោក ស៊ីហៈសាក់ បាននិយាយរាក់ទាក់ទៅកាន់ពិធីករថា លោកធ្លាប់ទៅប្រទេសរាំង ហើយថា លោកនឹងរីករាយទៅម្តងទៀត ដើម្បីសម្រួលការពិភាក្សាកុំឲ្យតានតឹងពេក។

នៅសំណួរដំបូងដែលពិធីករព័ត៌មាន លោក Marc Perelman គឺថា បើទោះបីជាភាគីទាំងពីរមានកិច្ចព្រមព្រៀងបទឈប់បាញ់ដាក់ចេញកាលពីចុងខែធ្នូ ប៉ុន្តែស្ថានភាពនៅតែងាយរំលោភបំពាន ហើយនាយករដ្ឋមន្ត្រីកម្ពុជា លោក ហ៊ុន ម៉ាណែត បានអះអាងប៉ុន្មានថ្ងៃមុននេះថា ប្រទេសថៃនៅតែបន្តកាន់កាប់ផ្នែកខ្លះនៃកម្ពុជាមិនត្រឹមតែនៅព្រំដែននោះទេ ប៉ុន្តែចូលជ្រៅទៅក្នុងទឹកដីប្រទេសកម្ពុជាលើសពីព្រំដែនដែលថៃអះអាងផ្ទាល់ខ្លួនជាឯកតោភាគីទៅទៀត។ តើអ្នកឆ្លើយតបយ៉ាងដូចម្តេចចំពោះការចោទប្រកាន់ចំៗបែបនោះ?

លោក ស៊ីហៈសាក់ បានទទួលស្គាល់ថា ភាគីទាំងពីរសម្រេចបានកិច្ចព្រមព្រៀងបទឈប់បាញ់ ប៉ុន្តែបទឈប់បាញ់នោះផុយស្រួយណាស់។ លោក អះអាងទៀតថា ភាគីថៃនៅពេលនេះបានធ្វើការដើម្បីបន្ថយស្ថានភាពតានតឹង ដើម្បីអាចធ្វើការបន្តទៅមុខទៀត។

នៅក្នុងចម្លើយនោះដែរ រដ្ឋមន្ត្រីការបរទេសថៃរូបនេះបានសង្កត់ម្តងហើយម្តងទៀតថា «កិច្ចព្រមព្រៀងនោះ បានចែងថា ឈរជើងនៅកន្លែងដែលពួកគេនៅ» ប៉ុន្តែលោកមិនបានលើកឡើងពីការឈានទៅអនុវត្តនូវកិច្ចព្រមព្រៀងសន្តិភាពដែលភាគីទាំងពីរព្រមព្រៀងគ្នាចុះហត្ថលេខានៅទីក្រុងកូឡាឡាំពូកាលពីថ្ងៃទី២៦ខែតុលាឆ្នាំ២០២៥នោះទេ។

ផ្ទុយពីការអះអាងនិយាយយកល្អលើបណ្តាញផ្សព្វផ្សាយអន្តរជាតិដោយរដ្ឋមន្ត្រីការបរទេស យោធារបស់ភាគីថៃ បានធ្វើសកម្មភាពរំលោភបំពានបទឈប់បាញ់ ដោយការសាងសង់លេណដ្ឋាន សាងសង់ផ្លូវ ការរាយបន្លាលួស ការដាក់តួកុងតឺន័រ និង សកម្មភាពបង្ហហេតុជាច្រើនទៀត។

នៅក្នុងបទសម្ភាសន៍ដែលធ្វើឡើងតាមអនឡាញនោះ លោក ស៊ីហៈសាក់ បានងាកចេញពីការផ្តោតលើកម្មវិធីជាច្រើនលើក ដែលទំនងងាកទៅសហការីរបស់លោក ដែលជាបោះព័ត៌មានឲ្យនិយាយ៕

រ៉ាន់ រើយ