អាមេរិក បញ្ជូន​ F-22​ ៦គ្រឿងទៀតទៅអ៊ីស្រាអែល បន្ថែមលើ១២គ្រឿងដែលនៅទីនោះស្រាប់ ត្រៀមវាយអ៊ីរ៉ង់

សហរដ្ឋអាមេរិក បានបញ្ជូនយន្តហោះចម្បាំងបំបាំងកាយ F-22 ចំនួន៦គ្រឿងបន្ថែមទៀតហើយ ទៅកាន់ប្រទេសអ៊ីស្រាអែល ស្របពេលស្ថានការណ៍ជាមួយអ៊ីរ៉ង់ កាន់តែក្តៅ។

តាមការផ្សាយរបស់ Times of Israel កាលពីថ្ងៃពុធទី២៥ខែកុម្ភៈ, យន្តហោះទាំងនេះ នឹងបន្ថែមពីលើ F-22 ចំនួន១២គ្រឿង ដែលកំពុងដាក់ពង្រាយនៅមូលដ្ឋាន Ovda ស្រាប់ នាភាគខាងត្បូងប្រទេសអ៊ីស្រាអែល។

ការបង្កើនកម្លាំងនេះ កើតឡើងមុនពេលអាមេរិក-អ៊ីរ៉ង់ រៀបចំជួបពិភាក្សាគ្នានៅទីក្រុងហ្សឺណែវប្រទេសស្វីស ដើម្បីចរចាលើកម្មវិធីនុយក្លេអ៊ែររបស់ទីក្រុងតេហេរ៉ង់។

យ៉ាងណា មុនពិភាក្សាគ្នា ទីក្រុងវ៉ាស៊ីនតោន បានគំរាមខ្លាំងៗទៅអ៊ីរ៉ង់ ជាការសង្កត់តុចរចា ដោយរដ្ឋមន្ត្រីការបរទេសអាមេរិក Marco Rubio ប្រកាសក្តែងៗថា ទីក្រុងតេហេរ៉ង់នឹងកើតរឿងធំ បើមិនព្រមចរចាកម្មវិធីមីស៊ីល។

លោកនិយាយថា អ៊ីរ៉ង់កំពុងព្យាយាមបង្កើត មីស៊ីលផ្លោងអន្តរទ្វីប (ICBM) ហើយការចរចានៅថ្ងៃព្រហស្បតិ៍ជាមួយអ៊ីរ៉ង់ នឹងផ្តោតសំខាន់លើកម្មវិធីនុយក្លេអ៊ែររបស់ទីក្រុងតេហេរ៉ង់តែម្តង។

ទន្ទឹមនោះ អនុប្រធានាធិបតីអាមេរិក JD Vance ក៏ចេញមុខអះអាងដែរថា ទីក្រុងវ៉ាស៊ីនតោន មើលឃើញអស់ហើយនូវព័ស្តុតាងដែលថា អ៊ីរ៉ង់កំពុងព្យាយាមកសាងកម្មវិធីនុយក្លេអ៊ែររបស់ខ្លួនឡើងវិញ បន្ទាប់ពីការវាយប្រហារដឹកនាំដោយអាមេរិក កាលពីខែមិថុនាឆ្នាំមុន។

លោក Vance ប្រាប់ក្រុមអ្នកយកព័ត៌មាន៖ «គោលការណ៍គឺសាមញ្ញណាស់៖ អ៊ីរ៉ង់មិនអាចមានអាវុធនុយក្លេអ៊ែរបានទេ។ ប្រសិនបើពួកគេព្យាយាមកសាងអាវុធនុយក្លេអ៊ែរឡើងវិញ វានឹងបង្កបញ្ហាដល់យើង។ តាមពិតទៅ យើងបានឃើញព័ស្តុតាងដែលថា ពួកគេព្យាយាមធ្វើរឿងនោះអស់ទៅហើយ»៕

អត្ថបទ៖ សុខ សុវណ្ណ