​​​ព្រះ​អង្គម្ចាស់ Reza Pahlavi​៖ អ្នកស្នងតំណែង​របប​នៅអ៊ីរ៉ង់​គឺខុសច្បាប់ និង​រស់មិនយូរទេ​

អនាគត​​នៃ​​​​​ប្រទេសអ៊ីរ៉ង់​​អាច​​ប្រែប្រួល​របៀប​ដឹកនាំ​​ និង​គោលនយោបាយ​ការបរទេស ក្រោយ​ពេល​មរណភាព​នៃ​មេដឹកនាំ​​កំពូល​អ៊ីរ៉ង់​​​ក្នុង​​ការ​វាយ​ប្រហារ​​របស់​​អ៊ីស្រា​អែល​និងសហរដ្ឋអាមេរិក ខណៈ​​​​មាន​ការ​លើក​ឡើង​អំពី​​​លទ្ធភាព​ឲ្យ​មាន​កា​របោះឆ្នោត និង​ធ្វើគោល​យោបាយ​​​​ជិតស្និទ្ធ​ទៅរក​អ៊ីស្រាអែល រំសាយ​​​កម្មវិធីនុយក្លេអ៊ែរ​។​

​​​ខណៈពេលដែល​ប្រជាជន​​​អ៊ីរ៉ង់​​​ដែលមានសមានចិត្ត​ស្រឡាញ់​​របប​​ដឹកនាំ​​​របស់​អតីត​​មេដឹកនាំ​កំពូល Ayatolah Ali Khamenei បាន​ចេញ​មក​គោរព​វិញ្ញាណក្ខន្ធ​​​ មេ​ដឹកនាំ​​របស់​ពួកគេ​នៅថ្ងៃ​​​អាទិត្យ​ទី១ខែ​​មិនា​នេះ ​​​​រលក​នៃ​នយោបាយ​របស់​អ៊ីរ៉ង់​អាច​​ប្រែប្រួលខ្លាំង​ក្នុងពេលអនាគត​ដ៏ខ្លី​ខាងមុខ​នេះ​។​​

​ការ​ប្រែប្រួល​នយោបាយ​អ៊ីរ៉ង់​អាច​កើត​ឡើង​ដោយសារ​តែ​ ព្រះអង្គម្ចាស់​​ Reza Pahlavi របស់​ប្រទេស​​អ៊ីរ៉ង់​ដែល​ត្រូវ​បាន​របប​ដឹកនាំ​បច្ចុប្បន្ន​​​ធ្វើបដិវត្តន៍​ទម្លាក់​របបស្តេច​អ៊ីរ៉ង់​កាលឆ្នាំ​១៩៧៩​ បាន​ចេញ​មក​​​អះអាង​​ បង្ហាញ​បំណង​ ចង់ដឹកនាំ​រដ្ឋាភិបាល​​អ៊ីរ៉ង់​​​​បណ្តោះ​​អាសន្ន ដើម្បី​រៀបចំ​ឲ្យ​មានការ​បោះឆ្នោត និង​ការ​កែប្រែ​គោល​នយោបាយការ​បរទេស។ ​ នេះ​បើ​យោង​ការ​ចេញផ្សាយ​របស់ The Jerusalem Post ​។​

​ដែល​បាន​ស្លាប់​ក្នុងការ​វាយ​ប្រហារ​របស់​អ៊ីស្រាអែល​និងសហរដ្ឋអាមេរិក​កាលថ្ងៃសៅរ៍​ទី២៨ខែកុម្ភៈ ហើយ មរណភាព​ផ្លូវការ​ត្រូវ​បាន​ប្រកាស​នៅថ្ងៃ​អាទិត្យ​ទី១ខែ​​​មិនា​​

​ការ​ផ្សាយ​​របស់​ Express Global Desk នៅ​ថ្ងៃទី១ខែមីនា ឆ្នាំ ២០២៦ ​បាន​លើក​ឡើង​ថា ព្រះអង្គម្ចាស់ Reza Pahlavi បានថ្លែងអំណរគុណដល់​ប្រធានាធិបតី​សហរដ្ឋអាមេរិក លោក ដូណាល់ ត្រាំ (Donald Trump) ចំពោះការវាយប្រហារលើអ៊ីរ៉ង់​ ដោយ​សម្លាប់​មេដឹកនាំ​កំពូល​អ៊ីរ៉ង់ ក៏ដូចជា​មេដឹកនាំ​កងកម្លាំង​​​ឆ្មាំបដិវត្តន៍អ៊ីរ៉ង់​មួយចំនួន​។

រាជវង្សអ៊ីរ៉ង់ដែលកំពុងនិរទេសខ្លួន Reza Pahlavi បានថ្លែងអំណរគុណដល់ប្រធានាធិបតីអាមេរិក ដូណាល់ ត្រាំ ចំពោះប្រតិបត្តិការ Epic Fury ប្រឆាំងនឹងរបបនៅអ៊ីរ៉ង់ និងទីបំផុតបានសម្លាប់មេដឹកនាំកំពូល Ayotollah Khamenei។

នៅក្នុងអត្ថបទមួយនៅក្នុងកាសែត Washington Post លោក Pahlavi បាននិយាយថា «ក្នុងការប្រកាសពីការវាយប្រហារនេះ ប្រធានាធិបតី ត្រាំ បានបង្ហាញពីការគំរាមកំហែងដ៏ធ្ងន់ធ្ងរដែលអ្នកឧបត្ថម្ភ​គាំទ្រ​​ដល់​ភេរវកម្មឈានមុខគេរបស់ពិភពលោកបានបង្កឡើងចំពោះសហរដ្ឋអាមេរិក និងសម្ព័ន្ធមិត្តរបស់ខ្លួន។

ព្រះអង្គម្ចាស់​នេះ​ ក៏បានថ្លែងទៅកាន់ប្រជាជនអ៊ីរ៉ង់ ដែលជាជនរងគ្រោះដែលរងទុក្ខវេទនាយូរបំផុតរបស់របបនេះ ដោយប្រកាសថា «ម៉ោងនៃសេរីភាពរបស់អ្នកជិតមកដល់ហើយ»។

នៅក្នុងសារមួយនៅលើហ្វេសប៊ុក លោក Pahlavi បាននិយាយថា «លោក Ali Khamenei ដែលជាមេដឹកនាំផ្តាច់ការដ៏បង្ហូរឈាមនៃសម័យកាលរបស់យើង ជាឃាតករសម្លាប់កូនប្រុសស្រីដ៏ក្លាហានរាប់ម៉ឺននាក់របស់អ៊ីរ៉ង់ ត្រូវបានកម្ចាត់ចេញ​ពីមុខមាត់នៃប្រវត្តិសាស្ត្រ។ ជាមួយនឹងការស្លាប់របស់លោក សាធារណរដ្ឋអ៊ីស្លាមបានឈានដល់ទីបញ្ចប់របស់ខ្លួន ហើយឆាប់ៗនេះនឹងត្រូវបញ្ជូនទៅក្នុងធុងសំរាមនៃប្រវត្តិសាស្ត្រ”។

លោកបានព្រមានថា «ការប៉ុនប៉ងណាមួយដោយសំណល់នៃរបបនេះ ដើម្បីតែងតាំងអ្នកស្នងតំណែង​បន្ត​ពី​ លោក Khamenei នឹងត្រូវបរាជ័យតាំងពីដំបូង។ អ្នកណាដែលពួកគេដាក់ជំនួសលោកនឹងមិនមានទាំងភាពស្របច្បាប់ ឬអាយុយឺនយូរទេ ហើយច្បាស់ជានឹងជាប់ពាក់ព័ន្ធនឹងឧក្រិដ្ឋកម្មនៃរបបនេះផងដែរ»​។

លោកបានគាំទ្រការទាមទាររបស់លោក ប្រធានាធិបតី ត្រាំ​ សម្រាប់ការបិទកម្មវិធីនុយក្លេអ៊ែររបស់អ៊ីរ៉ង់ ហើយបាននិយាយថា សាធារណរដ្ឋអ៊ីស្លាម «បានដំណើរការជាសហគ្រាសបដិវត្តន៍ពង្រីកខ្លួន ដោយបំផ្លាញអធិបតេយ្យភាពរបស់ប្រទេសជិតខាង បញ្ឆេះជម្លោះនៅជុំវិញពិភពលោក និងបន្តអាវុធនុយក្លេអ៊ែរ និងមីស៊ីលរយៈចម្ងាយឆ្ងាយដើម្បីបញ្ជូនវា»​។

​​​យោងកា​រផ្សាយ​របស់​ Al Jaazeera ​ប្រជាជន​អ៊ីរ៉ង់រាប់ពាន់​ រាប់​ម៉ឺននាក់​ក៏បាន​​ចេញ​​មក​​តាមផ្លូវ​បង្ហា​​ញ​​សមានចិត្ត​​ចំពោះ​មេដឹកនាំរបស់​ពួកគេ​​ដែលបាន​ស្លាប់​ក្រោម​​គ្រាប់ផ្លោង​របស់​អាមេរិក និង​អ៊ីស្រាអែល​៕​

រ៉ាន់ រើយ​