វិបត្តិ​នៅ​ហ្គាហ្សា៖ អ៊ីស្រាអែលបិទច្រកចូល​ហ្គាហ្សា ចាប់​ពី​សង្គ្រាមអ៊ីរ៉ង់ វិ​បត្តិប្រេង​និង​ស្បៀង​កំពុង​ប្រឈម​​ថ្មី​

មន្ត្រីក្នុងតំបន់ម្នាក់បាននិយាយកាលពីថ្ងៃទី២មីនាថា តំបន់ហ្គាហ្សាកំពុងអស់ការផ្គត់ផ្គង់ប្រេងឥន្ធនៈមានកំណត់របស់ខ្លួនយ៉ាងឆាប់រហ័ស ហើយស្តុកស្បៀងអាហារអាចនឹងកាន់តែខ្សត់​ បន្ទាប់ពីអ៊ីស្រាអែលបានរារាំងការ​នាំ​ចូលប្រេងឥន្ធនៈ និងទំនិញ​ទៅក្នុងទឹកដីដែលរងការបំផ្លិចបំផ្លាញដោយសង្គ្រាម ដោយលើកឡើងពីការប្រយុទ្ធជាមួយអ៊ីរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍ពី Reuters យោធាអ៊ីស្រាអែលបានបិទច្រកព្រំដែនហ្គាហ្សាទាំងអស់ ចាប់តាំងពីថ្ងៃទី២៨ខែកុម្ភៈ បន្ទាប់ពីប្រកាសពីការវាយប្រហារតាមអាកាសលើ​ប្រទេស​អ៊ីរ៉ង់ ដែលធ្វើឡើងរួមគ្នាជាមួយសហរដ្ឋអាមេរិក និងលើកឡើងពីហេតុផលថា ច្រកឆ្លងកាត់ទាំងនោះមិនអាចដំណើរការបានដោយសុវត្ថិភាពក្នុងអំឡុងពេលសង្គ្រាមនោះទេ។

ក្រោយមកនៅយប់ថ្ងៃទី ២ខែមីនា អាជ្ញាធរអ៊ីស្រាអែលបែរជាប្រកាសថា ពួកគេនឹងបើកច្រកឆ្លងកាត់ Kerem Shalom ពីអ៊ីស្រាអែលទៅហ្គាហ្សាឡើងវិញនៅថ្ងៃទី ៣ខែមីនានេះ​ សម្រាប់ «ការចូលបន្តិចម្តងៗនៃជំនួយមនុស្សធម៌» ចូលទៅក្នុងតំបន់នោះ ដោយមិន​លើក​ឡើង​ពីចំនួន​​ប៉ុន្មាននោះទេ។

លោកស្រី Karuna Herrmann នាយិកាការិយាល័យសេវាកម្មគម្រោងរបស់អង្គការសហប្រជាជាតិ (UNOPS) នៅក្រុងយេរូសាឡឹម ដែលគ្រប់គ្រងការចែកចាយប្រេងឥន្ធនៈនៅហ្គាហ្សា បាននិយាយថា ប្រេងនៅសល់តិចតួច​បំផុតនោះ អាចដំណើរការប្រហែលពីរបីថ្ងៃទៀតប៉ុណ្ណោះ។

លោក Amjad Al-Shawa មេដឹកនាំជំនួយប៉ាឡេស្ទីននៅតំបន់​ហ្គាហ្សា ដែលធ្វើការជាមួយអង្គការសហប្រជាជាតិ និង​អង្គការក្រៅ​រដ្ឋាភិបាល បានប៉ាន់ប្រមាណថា ការផ្គត់ផ្គង់ប្រេងឥន្ធនៈអាចមានរយៈពេលបីឬបួនថ្ងៃ ខណៈដែលស្តុកបន្លែ ម្សៅ និងរបស់ចាំបាច់ផ្សេងទៀតក៏អាចអស់ឆាប់ៗនេះដែរ ប្រសិនបើច្រកឆ្លងកាត់នៅតែបិទដដែល។

ដោយឡែក ទីភ្នាក់ងារយោធា COGAT របស់អ៊ីស្រាអែល ដែលគ្រប់គ្រង​ដំណើរ​ចេញចូលទៅកាន់ហ្គាហ្សា បាននិយាយ​ថា អាហារគ្រប់គ្រាន់ត្រូវបានដឹកជញ្ជូនទៅកាន់ទឹកដីនេះ ចាប់តាំងពីការចាប់ផ្តើមនៃបទឈប់បាញ់ខែតុលា ដើម្បីផ្គត់ផ្គង់ដល់ប្រជាជន។ ប៉ុន្តែខ្លួនបានបដិសេធមិនធ្វើអត្ថាធិប្បាយលើកង្វះខាតប្រេងឥន្ធនៈ ដែលអាចកើតមានក្នុងពេលបច្ចប្បន្ននេះទេ។

គួរបញ្ចាក់ដែរថា កន្លងមកតំបន់ហ្គាហ្សាច្រើនតែពឹងផ្អែកទាំងស្រុងលើប្រេងឥន្ធនៈដែលនាំមកដោយរថយន្តដឹកទំនិញពីអ៊ីស្រាអែល និងអេហ្ស៊ីប ហើយកង្វះការផ្គត់ផ្គង់ថ្មីនឹងធ្វើឲ្យប្រតិបត្តិការមន្ទីរពេទ្យស្ថិតក្នុងហានិភ័យ និងគំរាមកំហែងដល់សេវាទឹក និងអនាម័យ មន្ត្រីមូលដ្ឋាននិយាយ។ ជាងនេះទៀតនោះ ប្រជាជនប៉ាឡេស្ទីនភាគច្រើននៅក្នុងតំបន់ហ្គាហ្សា ត្រូវបានផ្លាស់ទីលំនៅក្នុងស្រុក បន្ទាប់ពីសង្គ្រាមរយៈពេលពីរឆ្នាំរបស់អ៊ីស្រាអែលជាមួយពួកសកម្មប្រយុទ្ធហាម៉ាស៕

អត្ថបទ៖ សាង ស្រីល័ក្ខ