ត្រាំ អះអាងថា អ៊ីរ៉ង់ សុំចរចា តែលោកប្រាប់ទៅវិញ «ហួសពេលហើយ!»

មីស៊ីលនៅតែហោះពេញមេឃមជ្ឈិមបូព៌ាចំពេលអណ្តាតភ្លើងសង្គ្រាម បន្តឆាបឆេះរោលរាលមិនទាន់ឃើញសញ្ញារលត់។ យ៉ាងណា ប្រធានាធិបតីអាមេរិក ដូណាល់ ត្រាំ អះអាងថា អ៊ីរ៉ង់ បានសុំចរចាប៉ុន្តែលោកប្រាប់ទៅវិញថា ហួសពេលហើយ។

ក្នុងជំនួបជាមួយក្រុមកីឡាករបាល់ទាត់ក្លឹប Inter Miami ដែលជាម្ចាស់ជើងឯកក្របខ័ណ្ឌអាមេរិក Major League Soccer (MLS) រដូវកាលចាស់ នៅសេតវិមានកាលពីថ្ងៃព្រហស្បតិ៍ទី៥ខែមីនា លោកត្រាំ ប្រាប់ទៅអ្នកសារព័ត៌មានទាក់ទងនឹងសង្គ្រាមនៅមជ្ឈិមបូព៌ាថា អ៊ីរ៉ង់ចង់ចរចា ប៉ុន្តែលោកព្រមានទៅវិញវា «ហួសពេលហើយ» ព្រោះការវាយប្រហារដឹកនាំដោយសហរដ្ឋអាមេរិក កាន់តែខ្លាំងក្លានិងមានឥទ្ធិពល។

លោក ត្រាំ និយាយថា៖ «ពួកគេទូរស័ព្ទមកហើយសួរថា តើយើងអាចធ្វើកិច្ចព្រមព្រៀងដោយរបៀបណាទៅ? ខ្ញុំក៏ឆ្លើយទៅវិញ! អ្នកប្រហែលត្រូវរង់ចាំយូរបន្តិចហើយ ព្រោះឥឡូវ យើងចង់ប្រយុទ្ធខ្លាំងជាងអ្នកទៅទៀត»។

ទោះបីជាយ៉ាងណាក៏ដោយ មុននេះរដ្ឋមន្ត្រីការបរទេសអ៊ីរ៉ង់ Abbas Araghchi បានបញ្ជាក់រួចហើយថា ទីក្រុងតេហេរ៉ង់មិនចង់ឈប់បាញ់ឡើយ ហើយក៏គ្មានហេតុផលអ្វីដែលត្រូវចរចានោះដែរ។

លោក Araghchi ថែមទាំងចោទប្រកាន់ចំៗទៅអាមេរិកទៀតផងថា បានប្រព្រឹត្ត «អំពើឃោរឃៅ» តាមរយៈការបាញ់ពន្លិចនាវាចម្បាំងរបស់កងទ័ពជើងទឹកអ៊ីរ៉ង់នៅក្បែរឆ្នេរសមុទ្រស្រីលង្កា ហើយព្រមានខ្លាំងៗថា ទីក្រុងវ៉ាស៊ីនតោន នឹង «ស្តាយក្រោយបំផុត» ចំពោះការបង្កើតឲ្យមានទម្លាប់វាយប្រហារបែបនេះ។

លោកសរសេរថា៖ «សហរដ្ឋអាមេរិកបានប្រព្រឹត្តអំពើឃោរឃៅនៅលើលំហសមុទ្រ ដែលមានចម្ងាយរហូតដល់ទៅ ២ ០០០ ម៉ាយល៍ ពីឆ្នេររបស់ប្រទេសអ៊ីរ៉ង់។ នាវាចម្បាំង Dena ដែលជាភ្ញៀវរបស់កងទ័ពជើងទឹកឥណ្ឌា និងមានផ្ទុកនាវិកជិត ១៣០ នាក់ ត្រូវរងការវាយប្រហារនៅក្នុងដែនទឹកអន្តរជាតិទាំងគ្មានការព្រមានជាមុន។ ចាំសម្ដីខ្ញុំទុកចុះ! សហរដ្ឋអាមេរិកនឹងស្តាយក្រោយ ចំពោះរឿងដែលខ្លួនធ្វើនេះ»។

យោងតាមព័ត៌មានថ្មីបំផុតពីបញ្ជាការដ្ឋានកណ្តាលអាមេរិក (CENTCOM), អាមេរិក បានបាញ់ពន្លិចនាវាអ៊ីរ៉ង់ជាង៣០គ្រឿងហើយ ហើយក្នុងរយៈពេល៧២ម៉ោងចុងក្រោយ យន្តហោះទម្លាក់គ្រាប់បែក បានកម្ទេចគោលដៅជិត ២០០កន្លែងក្នុងប្រទេសអ៊ីរ៉ង់៕

អត្ថបទ៖ សុខ សុវណ្ណ